Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Josue 23:1-16

BALAYAN SANG KAUNDAN

  • Si Josue nagpaalam sa mga lider sang Israel (1-16)

    • Saad ni Jehova natuman tanan (14)

23  Pagkatapos sang madamo nga adlaw nga ginhatagan ni Jehova sing kalinong+ ang Israel batok sa tanan nila nga kaaway sa palibot, kag sang tigulang na gid si Josue kag malapit na sia mapatay,+  ginpatawag ni Josue ang bug-os nga Israel,+ ang mga gulang, ang mga pangulo, ang mga hukom, kag ang mga manugdumala.+ Nagsiling sia sa ila: “Tigulang na gid ako kag malapit na ako mapatay.  Nakita ninyo ang tanan nga ginhimo ni Jehova nga inyo Dios sa sining tanan nga pungsod tungod sa inyo bangod si Jehova nga inyo Dios ang nagapakig-away para sa inyo.+  Ginhatag ko sa inyo paagi sa pagabutgabot+ bilang palanublion sang inyo mga tribo ang nabilin nga duta sang mga pungsod,+ pati ang duta sang tanan nga pungsod nga ginlaglag ko,+ halin sa Jordan tubtob sa Daku nga Dagat* sa katundan.*  Ginpahalin sila ni Jehova nga inyo Dios sa inyo atubangan,+ kag gintabog niya sila tungod sa inyo, kag ginpanag-iyahan ninyo ang ila duta, suno sa ginsaad sa inyo ni Jehova nga inyo Dios.+  “Magpakaisog gid kamo sa pagtuman kag sa paghimo sang tanan nga nasulat sa libro sang Kasuguan+ ni Moises paagi sa indi gid pagsipak sa sini sa tuo man ukon sa wala,+  paagi sa indi gid pagpakig-upod sa sini nga mga pungsod+ nga nabilin sa tunga ninyo. Indi gid ninyo pagsambiton ang ngalan sang ila mga dios+ ukon magpanumpa kamo paagi sa ila, kag indi gid kamo mag-alagad ukon magyaub sa ila.+  Kundi magpabilin kamo nga matutom kay Jehova nga inyo Dios,+ pareho sang ginahimo ninyo tubtob sini nga adlaw.  Tabugon ni Jehova ang dalagku kag gamhanan nga mga pungsod sa inyo atubangan+ kay wala gid sing tawo nga nakapierde sa inyo tubtob sini nga adlaw.+ 10  Lagson sang isa lang sa inyo ang isa ka libo,+ bangod si Jehova nga inyo Dios ang nagapakig-away para sa inyo,+ suno sa ginsaad niya sa inyo.+ 11  Gani magbantay gid kamo pirme*+ paagi sa paghigugma kay Jehova nga inyo Dios.+ 12  “Apang kon magtalikod kamo kag magpabilin sa sining mga pungsod nga nabilin+ sa tunga ninyo, kag kon magpamana ukon magpangasawa kamo sa ila*+ kag makig-upod sa ila, 13  dapat mahibaluan gid ninyo nga indi pagpadayunon ni Jehova nga inyo Dios nga tabugon ining mga pungsod tungod sa inyo.+ Mangin tiglapak kag siod sila sa inyo, mangin latigo sila nga ginahanot sa inyo likod+ kag mga tunok sa inyo mga mata tubtob malaglag kamo sa sining maayo nga duta nga ginhatag sa inyo ni Jehova nga inyo Dios. 14  “Dali na lang ako mapatay,* kag nahibaluan gid ninyo sa bug-os ninyo nga tagipusuon kag sa bug-os ninyo nga kalag* nga wala sing bisan isa sa tanan nga ginsaad sa inyo ni Jehova nga inyo Dios ang napaslawan. Natuman ini tanan sa inyo. Wala sing bisan isa sa sini ang napaslawan.+ 15  Apang subong nga natuman sa inyo ang tanan nga maayo nga saad sa inyo ni Jehova nga inyo Dios,+ pahanabuon man sa inyo ni Jehova ang tanan nga kapahamakan nga ginsaad niya* kag laglagon niya kamo sa sining maayo nga duta nga ginhatag sa inyo ni Jehova nga inyo Dios.+ 16  Kon lapason ninyo ang katipan ni Jehova nga inyo Dios nga ginsugo niya nga tumanon ninyo kag kon mag-alagad kamo kag magyaub sa iban nga mga dios, maakig gid si Jehova sa inyo,+ kag mapapas kamo gilayon sa sining maayo nga duta nga ginhatag niya sa inyo.”+

Footnote

Ang Mediteraneo.
Ukon “sa ginatunuran sang adlaw.”
Ukon “Gani bantayi ninyo sing maayo ang inyo kalag.”
Ukon “makig-alyansa kamo sa ila paagi sa pag-asawahay.”
Sa literal, “Sa sini nga adlaw nagalakat ako sa dalanon sang bug-os nga duta.”
Tan-awa ang Glossary.
Ukon “tanan nga malain nga pulong.”