Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Josue 20:1-9

BALAYAN SANG KAUNDAN

  • Mga siudad nga dalangpan (1-9)

20  Dayon nagsiling si Jehova kay Josue:  “Silinga ang mga Israelinhon, ‘Magpili kamo sing mga siudad nga dalangpan+ nga ginsiling ko sa inyo paagi kay Moises,  agod makadangop didto ang indi hungod ukon aksidente* nga nakapatay sing tawo.* Kag mangin dalangpan ninyo ini batok sa manugtimalos sang dugo.+  Magdangop sia sa isa sini nga mga siudad+ kag magtindog sa gawang sang siudad+ kag ipaathag niya sa mga gulang sang siudad kon ano ang natabo. Dayon batunon nila sia sa siudad kag hatagan sia sing lugar nga mateneran niya kag mag-istar sia upod sa ila.  Kon lagson sia sang manugtimalos sang dugo, indi nila pag-itugyan sa iya ang nakapatay, kay aksidente lang* nga napatay niya ang iya isigkatawo kag wala niya sia ginadumtan sang una.+  Mag-istar sia sa amo nga siudad tubtob mabista ang iya kaso sa atubangan sang katilingban,+ kag magpabilin sia didto tubtob mapatay ang mataas nga saserdote+ nga nagaalagad sadto nga tion. Dayon makapauli na ang nakapatay sa siudad nga iya ginhalinan, kag magsulod sia sa iya siudad kag sa iya balay.’”+  Gani ginpakabalaan nila para sa sini nga katuyuan* ang Kedes+ sa Galilea sa kabukiran sang Neptali, ang Siquem+ sa kabukiran sang Efraim, kag ang Kiryat-arba+ nga amo ang Hebron sa kabukiran sang Juda.  Sa rehiyon sang Jordan, sa sidlangan sang Jerico, ginpili nila ang Bezer+ sa kamingawan sang kapatagan nga sakop sang tribo ni Ruben, ang Ramot+ sa Gilead nga sakop sang tribo ni Gad, kag ang Golan+ sa Basan nga sakop sang tribo ni Manases.+  Amo ini ang mga siudad nga ginpili para sa tanan nga Israelinhon kag para sa dumuluong nga mga pumuluyo nga nagaistar upod sa ila, agod makadangop didto ang bisan sin-o nga makapatay* sing indi hungod+ kag agod indi sia mapatay sang manugtimalos sang dugo tubtob mabista ang iya kaso sa atubangan sang katilingban.+

Footnote

Ukon “wala makahibalo.”
Ukon “kalag.”
Ukon “wala niya mahibaluan.”
Ukon “Gani ginpain nila.”
Ukon “makapatay sing kalag.”