Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Josue 11:1-23

BALAYAN SANG KAUNDAN

  • Mga siudad sa aminhan nasakop (1-15)

  • Mga ginsakop ni Josue (16-23)

11  Sang mabatian ini ni Jabin nga hari sang Hazor, nagpadala sia sing mensahe kay Jobab nga hari sang Madon,+ kag sa hari sang Simron, sa hari sang Acsaf,+  sa mga hari sa kabukiran sa aminhan, sa mga hari sa kapatagan* sa bagatnan sang Cineret, sa mga hari sa Sepela, kag sa mga hari sa kabakuluran sang Dor+ sa katundan,  sa mga Canaanhon+ sa sidlangan kag sa katundan, sa mga Amornon,+ sa mga Hethanon, sa mga Pereznon, sa mga Jebusnon sa kabukiran, kag sa mga Hevhanon+ sa tiilan sang Hermon+ sa duta sang Mizpa.  Gani naglakat ang tanan nga hari upod sa ila mga soldado nga pareho kadamo sang mga balas sa baybayon, upod ang ila madamo gid nga mga kabayo kag mga kangga sa inaway.  Nagsugtanay ini nga mga hari nga magtingob sila, kag nagkampo sila malapit sa sapa sang Merom agod makig-away sa Israel.  Nagsiling si Jehova kay Josue: “Indi ka mahadlok sa ila,+ kay buas sa amo man sini nga oras itugyan ko sila tanan sa Israel kag pamatyon mo sila. Pamiangon mo ang ila mga kabayo+ kag sunugon mo ang ila mga kangga.”  Gani kibot nga ginsalakay sila ni Josue upod ang tanan nga soldado sa sapa sang Merom.  Gintugyan sila ni Jehova sa Israel+ kag napierde nila sila. Ginlagas nila sila tubtob sa Daku nga Sidon+ kag sa Misrefot-maim+ kag sa Nalupyakan sang Mizpe sa sidlangan, kag ginpamatay nila sila kag wala gid sing nabilin sa ila nga buhi.+  Dayon ginhimo ni Josue sa ila ang ginsiling ni Jehova sa iya; ginpamiang niya ang ila mga kabayo kag ginsunog niya ang ila mga kangga.+ 10  Dayon nagbalik si Josue kag ginsakop man niya ang Hazor. Ginpatay niya ang hari sini paagi sa espada,+ bangod ang Hazor amo sadto ang pinakagamhanan sa sining tanan nga ginharian. 11  Ginpamatay nila ang tanan nga tawo* sa sini paagi sa espada+ kag wala gid sing nabilin nga buhi.+ Dayon ginsunog niya ang Hazor. 12  Ginpierde ni Josue ining tanan nga hari kag ginsakop niya ang tanan nila nga siudad paagi sa espada.+ Ginlaglag niya sila,+ subong sang ginsugo ni Moises nga alagad ni Jehova. 13  Apang wala ginsunog sang Israel ang mga siudad sa mga bakulod luwas lang sa Hazor; amo lang ini ang siudad nga ginsunog ni Josue. 14  Ginpanguha sang mga Israelinhon ang tanan nga pagkabutang kag mga sapat sa sining mga siudad.+ Apang ginpamatay nila ang tanan nga tawo paagi sa espada tubtob naubos sila.+ Wala sila sing ginbilin nga buhi.+ 15  Subong sang ginsugo ni Jehova kay Moises nga iya alagad, amo man ang ginsugo ni Moises kay Josue,+ kag ginhimo ini ni Josue. Gintuman gid niya ang tanan nga ginsugo ni Jehova kay Moises.+ 16  Gani ginsakop ni Josue ining tanan nga duta, ang kabukiran, ang bug-os nga Negeb,+ ang bug-os nga duta sang Gosen, ang Sepela,+ ang Araba,+ kag ang kabukiran sang Israel kag ang manubo nga bahin sini,* 17  halin sa Bukid Halak, nga malapit sa Seir, tubtob sa Baal-gad+ sa Nalupyakan sang Lebanon sa tiilan sang Bukid Hermon,+ kag ginbihag niya ang tanan nila nga hari kag ginpamatay sila. 18  Malawig nga nagpakig-away si Josue sa sining tanan nga hari. 19  Wala sing siudad nga nagpakighidait sa mga Israelinhon luwas lang sa mga Hevhanon nga nagaistar sa Gibeon.+ Ginsakop nila ang tanan nga iban pa nga siudad paagi sa inaway.+ 20  Gintugutan ni Jehova nga magtig-a ang ila tagipusuon+ agod makig-away sila sa Israel, agod malaglag sila kag indi pagkaluuyan.+ Dapat sila laglagon, subong sang ginsugo ni Jehova kay Moises.+ 21  Sadto man nga tion, ginpamatay ni Josue ang mga Anakim+ sa kabukiran, sa Hebron, sa Debir, sa Anab, kag sa tanan nga kabukiran sang Juda kag sa tanan nga kabukiran sang Israel. Ginlaglag sila ni Josue kag ang ila mga siudad.+ 22  Wala sing Anakim nga nabilin sa duta sang mga Israelinhon. May nabilin lamang sa ila+ sa Gaza,+ sa Gat,+ kag sa Asdod.+ 23  Gani ginsakop ni Josue ang tanan nga duta, subong sang ginsaad ni Jehova kay Moises.+ Dayon ginhatag ini ni Josue sa Israel bilang ila palanublion kag ginpartida nila ini suno sa ila tribo.+ Kag nangin malinong ini nga duta.+

Footnote

Ukon “Araba.”
Ukon “kalag.”
Ukon “ang Sepela sini.”