Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Josue 1:1-18

BALAYAN SANG KAUNDAN

  • Ginpalig-on ni Jehova si Josue (1-9)

    • Basahon ang Kasuguan (8)

  • Paghanda sa pagtabok sa Jordan (10-18)

1  Sang napatay na si Moises nga alagad ni Jehova, nagsiling si Jehova kay Josue*+ nga anak ni Nun kag alagad+ ni Moises:  “Patay na ang akon alagad nga si Moises.+ Maghanda ka kag magtabok sa Jordan upod ang tanan nga katawhan sang Israel kag magkadto kamo sa duta nga ihatag ko sa ila.+  Ihatag ko sa inyo ang tagsa ka lugar nga tapakan sang inyo tiil, subong sang ginsaad ko kay Moises.+  Ang inyo teritoryo magasugod sa kamingawan tubtob sa Lebanon kag sa daku nga suba sang Eufrates, nga amo ang bug-os nga duta sang mga Hethanon,+ kag tubtob sa Daku nga Dagat* sa katundan.*+  Wala sing makapierde sa imo sa bug-os mo nga kabuhi.+ Mangin kaupod mo ako pareho sang pag-upod ko kay Moises.+ Indi ko gid ikaw pagbayaan ukon pagpabay-an.+  Magpakaisog ka kag magpakabakod,+ kay ikaw ang magapanguna sa sini nga katawhan sa pagpanubli sa duta nga ginpanumpa ko sa ila mga katigulangan nga ihatag ko sa ila.+  “Magpakaisog ka lang kag magpakabakod kag tumana gid ang tanan nga Kasuguan nga ginsugo sa imo sang akon alagad nga si Moises. Indi ka magsipak sa sini sa tuo man ukon sa wala,+ agod mangin maalamon ka bisan ano ang himuon mo.+  Indi ka mag-untat sa paghambal tuhoy sa sining libro sang Kasuguan.+ Basahon mo ini kag pamalandungan* sa adlaw kag gab-i, agod matuman mo gid ang tanan nga nasulat sa sini;+ kag mangin madinalag-on ka kag maalamon.+  Gani ginasugo ko ikaw, ‘Magpakaisog ka kag magpakabakod. Indi ka mahadlok, kay kaupod mo si Jehova nga imo Dios bisan diin ka magkadto.’”+ 10  Dayon ginsugo ni Josue ang mga manugdumala sang katawhan: 11  “Libuta ninyo ang kampo kag sugua ang katawhan, ‘Maghanda kamo sang inyo mga balon, kay sa ikatlo nga adlaw magatabok kamo sa Jordan kag panag-iyahan ninyo ang duta nga ginahatag sa inyo ni Jehova nga inyo Dios.’”+ 12  Nagsiling si Josue sa mga Rubenhon, sa mga Gadhanon, kag sa katunga sang tribo ni Manases: 13  “Dumduma ninyo ang ginsugo sa inyo ni Moises nga alagad ni Jehova,+ ‘Si Jehova nga inyo Dios nagahatag sa inyo sing kalinong kag ginahatag niya sa inyo ini nga duta. 14  Ang inyo asawa, ang inyo mga kabataan, kag ang inyo mga kasapatan magaistar sa duta nga ginhatag sa inyo ni Moises sa sini nga bahin* sang Jordan,+ apang ang tanan ninyo nga isganan nga mga soldado+ maghanda sa pagpakig-away kag magpanguna sa inyo mga utod sa pagtabok.+ Dapat ninyo sila buligan 15  tubtob mahatagan man ni Jehova sing kalinong ang inyo mga utod pareho sa inyo, kag mapanag-iyahan man nila ang duta nga ginahatag sa ila ni Jehova nga inyo Dios. Dayon magbalik na kamo sa duta nga ginhatag sa inyo nga istaran ninyo, ang duta nga ginhatag sa inyo ni Moises nga alagad ni Jehova sa sidlangan nga bahin sang Jordan.’”+ 16  Nagsabat sila kay Josue: “Himuon namon ang tanan nga ginasugo mo sa amon, kag makadto kami bisan diin mo kami pakadtuon.+ 17  Mamati man kami sa imo pareho sang pagpamati namon kay Moises. Kabay pa nga si Jehova nga imo Dios mangin kaupod mo pareho sang pag-upod niya kay Moises.+ 18  Patyon ang bisan sin-o nga magrebelde sa imo sugo kag indi magtuman sa bisan ano nga ginasugo mo sa iya.+ Magpakaisog ka lang kag magpakabakod.”+

Footnote

Ukon “Jehosua,” nga nagakahulugan “Si Jehova ang Kaluwasan.”
Ang Mediteraneo.
Ukon “sa ginatunuran sang adlaw.”
Ukon “Basahon mo ini sa mahinay nga tingog.”
Sa sidlangan nga bahin.