Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Job 42:1-17

BALAYAN SANG KAUNDAN

  • Nagsabat si Job kay Jehova (1-6)

  • Ginpakamalaut tatlo ka kaupdanan (7-9)

  • Ginpasag-uli ni Jehova si Job (10-17)

    • Mga anak nga lalaki kag mga anak nga babayi ni Job (13-15)

42  Dayon nagsabat si Job kay Jehova:   “Nahibaluan ko na karon nga masarangan mo himuon ang tanan nga butang, Kag wala sing butang nga ginahunahuna mo nga indi mo mahimo.+   Namangkot ka, ‘Sin-o ining nagapangduhaduha sa akon katuyuan nga wala sing ihibalo?’+ Matuod nga naghambal ako sang mga butang nga wala ko mahangpan, Mga butang nga tuman ka makatilingala sa akon.+   Nagsiling ka, ‘Palihug, magpamati ka kay mahambal ako. Pamangkuton ko ikaw, kag sugiri ako.’+   Sang una nabatian ko lang sa iban ang tuhoy sa imo, Apang karon nakita ko na ikaw.   Gani ginabawi ko ang akon ginsiling,*+ Nagapungko ako sa yab-ok kag abo agod ipakita ang akon paghinulsol.”+  Pagkatapos nga makapakighambal si Jehova kay Job, nagsiling si Jehova kay Elifaz nga Temanhon: “Ang akon kaakig nagdabdab sa imo kag sa imo duha ka kaupod,+ kay wala kamo maghambal sing kamatuoran tuhoy sa akon.+ Indi kamo kaangay sang akon alagad nga si Job.  Magkuha kamo karon sing pito ka toro nga baka kag pito ka karnero nga lalaki, kag magkadto kamo kay Job nga akon alagad kag maghalad kamo sang halad nga sinunog para sa inyo kaugalingon. Kag si Job nga akon alagad magapangamuyo para sa inyo.+ Ang pangabay niya ang pat-od nga pamatian ko* nga indi kamo pagsilutan suno sa inyo kabuangan, kay wala kamo maghambal sing kamatuoran tuhoy sa akon. Indi kamo kaangay sang akon alagad nga si Job.”  Gani naglakat si Elifaz nga Temanhon, si Bildad nga Shuhanon, kag si Zofar nga Naamanhon kag gintuman nila ang sugo ni Jehova. Kag ginpamatian ni Jehova ang pangamuyo ni Job. 10  Pagkatapos makapangamuyo si Job para sa iya mga abyan,+ ginkuha ni Jehova ang kapipit-an+ ni Job kag ginpamanggaranon sia liwat.* Ginhatagan ni Jehova si Job sing pagkabutang nga doble pa sa ginpanag-iyahan niya sang una.+ 11  Nagduaw sa iya ang tanan niya nga utod nga lalaki kag babayi kag ang tanan niya nga abyan+ sang una, kag nagkinaon sila sa iya balay upod sa iya. Nag-unong sila kag naglipay sa iya tungod sa tanan nga kalisod nga gintugot ni Jehova nga mahanabo sa iya. Ang kada isa sa ila naghatag sa iya sing kuarta kag singsing nga bulawan. 12  Gani ginpakamaayo ni Jehova ang ulihi nga bahin sang kabuhi ni Job sing sobra pa sangsa una,+ amo nga nagpanag-iya sia sing 14,000 ka karnero kag 6,000 ka kamelyo kag 1,000 ka paris nga baka kag 1,000 ka asno nga babayi.+ 13  Ginhatagan man sia liwat sing pito ka anak nga lalaki kag tatlo ka anak nga babayi.+ 14  Ang kamagulangan nga babayi ginhingalanan niya nga Jemima, ang ikaduha, Kezia kag ang ikatlo, Keren-hapuc. 15  Ang mga anak nga babayi ni Job amo ang pinakamatahom sa ila lugar, kag ginhatagan sila sing palanublion sang ila amay kaangay sang ila mga utod nga lalaki. 16  Kag nagkabuhi pa si Job sing 140 ka tuig kag nakita niya ang iya mga anak kag mga apo tubtob sa ikap-at nga kaliwatan. 17  Sang ulihi, napatay si Job nga tigulang na kag kontento sa iya kabuhi.*

Footnote

Ukon “ginahinulsulan ko ang akon ginsiling.”
Sa literal, “Pat-od nga bayawon ko ang iya nawong.”
Sa literal, “ginhilway ni Jehova si Job sa iya pagkabihag.”
Sa literal, “tigulang kag puno sang mga adlaw.”