Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Job 32:1-22

BALAYAN SANG KAUNDAN

  • Pamatan-on nga Elihu naghambal (1-22)

    • Akig kay Job kag sa kaupdanan (2, 3)

    • Naghulat antes maghambal (6, 7)

    • Indi lang edad ang nagapaalam (9)

    • Si Elihu luyag maghambal (18-20)

32  Gani ining tatlo ka lalaki wala na magsabat kay Job, bangod para sa iya matarong sia.*+  Apang si Elihu nga anak ni Barakel nga Buzhanon+ sang panimalay ni Ram naakig kay Job kay ginpakamatarong ni Job ang iya kaugalingon* sa baylo sang Dios.+  Naakig man sia sa tatlo ka kaupod ni Job kay indi sila makahatag sing nagakaigo nga sabat, sa baylo ginpagua nila nga malaut ang Dios.+  Nagahulat lang si Elihu sing kahigayunan nga makighambal kay Job. Ginpatapos niya anay sa paghambal ang tatlo nga mas magulang sangsa iya.+  Sang nakita ni Elihu nga wala na makasabat ang tatlo ka lalaki, labi pa sia nga naakig.  Dayon naghambal si Elihu nga anak ni Barakel nga Buzhanon: “Bataon pa* ako Kag kamo tigulang na.+ Gani wala ako naghambal bangod sang pagtahod ko sa inyo+ Kag wala ko ginsugid sa inyo ang akon nahibaluan.   Naghunahuna ako, ‘Tuguti nga ang edad* maghambal, Kag ang kadamuon sang tuig magpahayag sang kaalam.’   Pat-od gid nga ang balaan nga espiritu nga ginhatag sang Dios sa tawo, Kag ang ginhawa sang Labing Gamhanan, ang nagahatag sa ila sing paghangop.+   Indi lang ang edad* ang nagahimo sa isa nga maalam, Kag indi lamang ang mga tigulang ang nakahibalo sang husto.+ 10  Gani nagsiling ako, ‘Pamatii ninyo ako, Kag ihambal ko man sa inyo ang akon nahibaluan.’ 11  Ginpamatian ko ang inyo ginahambal; Nagahulat ako sang inyo pangatarungan+ Samtang nagapanumdom kamo sang inyo isabat.+ 12  Ginpamatian ko kamo sing maayo, Apang wala sing isa sa inyo ang makapamatuod nga sayop si Job* Ukon makasabat sa iya mga ginahambal. 13  Gani indi kamo magsiling, ‘Maalam kami; Ang Dios amo ang nagasabdong sa iya kag indi ang tawo.’ 14  Wala sia sing ginhambal batok sa akon, Gani indi ko sia pagsabton kaangay sang pagsabat ninyo sa iya. 15  Hinadlukan kamo kag naghipos; Kay wala na kamo sing inughambal. 16  Naghulat ako apang wala na kamo maghambal; Nagpahimunong na lang kamo kag wala na magsabat. 17  Gani mahambal man ako; Isugid ko man sa inyo ang akon nahibaluan, 18  Kay madamo ako sing inughambal; Ginpahulag ako sang espiritu sang Dios nga ihambal ini. 19  Ang akon tiyan daw kaangay sang suludlan sang alak nga wala sing sulungawan, Kaangay ini sang bag-o nga panit nga suludlan nga daw mabusdik.+ 20  Pahambala ninyo ako agod maumpawan ako! Itikab ko ang akon bibig agod makasabat ako. 21  Wala ako sing apinan;+ Wala ako sing bisan sin-o nga dayawdayawon;* 22  Kay indi ako makahibalo magdayawdayaw; Kon himuon ko ina patyon ako gilayon sang akon Manunuga.

Footnote

Ukon “bangod matarong sia sa iya mga mata.”
Ukon “kalag.”
Sa literal, “Gamay sa mga adlaw.”
Sa literal, “mga adlaw.”
Ukon “Indi lang ang madamo nga adlaw.”
Ukon “ang makasabdong kay Job.”
Ukon “nga hatagan sing dungganon nga titulo.”