Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Job 16:1-22

BALAYAN SANG KAUNDAN

  • Nagsabat si Job (1-22)

    • “Kamo tanan masabad nga manuglugpay!” (2)

    • Nangangkon nga ginhimo sia nga iliguon sang Dios (12)

16  Kag nagsabat si Job:   “Makapila ko na ina mabatian. Kamo tanan masabad nga manuglugpay!+   San-o pa matapos ang wala sing pulos* nga hambal? Ano ang nagpaakig sa imo nga nagasabat ka sing subong sina?   Mahambal ko man ang ginahambal ninyo. Kon kamo ang yara sa lugar ko,* Makahambal man ako batok sa inyo Kag magalungolungo sang akon ulo.+   Apang sa baylo, palig-unon ko kamo, Kag pahaganhaganon ang inyo kasakit.+   Indi gid mabuhinan ang akon kasakit bisan pa maghambal ako,+ Apang mabuhinan bala ini kon maghipos lang ako?   Apang ginpalapyo niya ako;+ Ginhalitan niya ang bug-os ko nga panimalay.*   Nangin saksi ang pagdakop niya sa akon, Kag pamatuod sa sini ang akon pagniwang.   Ginlapalapa niya ako sa iya kaakig, kag gindumtan ako.+ Ginpabagrutan niya ako sang iya ngipon. Gintulok ako sing masakit sang akon kaaway.+ 10  Daw lamunon nila ako,+ Ginpasipalahan kag gintampa nila ako; Nagtipon sila batok sa akon.+ 11  Gintugyan ako sang Dios sa mga pamatan-on nga lalaki, Kag ginhaboy sa kamot sang mga malauton.+ 12  Nagapakalinong ako, apang gingamo niya ako;+ Gin-uyatan niya ako sa tangkugo kag ginlampos; Dayon ginhimo niya ako nga iliguon. 13  Ginlibutan ako sang iya mga manugpana;+ Gintuhog niya nga wala sing kaluoy ang akon batobato;+ Ginbubo niya ang akon apdo sa duta. 14  Ginbulwang niya ako kaangay sang pader; Ginsalakay niya ako kaangay sang isa ka hangaway. 15  Nagtahi ako sing sako agod itabon sa akon panit,+ Kag ginlubong ko sa yab-ok+ ang akon dignidad.* 16  Nagpalamula ang akon guya bangod sa paghibi,+ Kag nagpalanggit-om* ang akon mata, 17  Bisan pa wala ako sing ginhalitan Kag ang akon pangamuyo putli. 18  O duta, indi pagtabuni ang akon dugo!+ Kag indi paghatagi sing palahuwayan ang akon pagsinggit! 19  Ang nagasaksi sa akon yara sa langit; Ang isa nga makapamatuod para sa akon yara sa kahitaasan. 20  Ginatamay ako sang akon mga kaupod+ Samtang ang akon mata nagapatulo sang mga luha* sa Dios.+ 21  Kabay nga may magpatunga sa tawo kag sa Dios, Kaangay sa tawo kag sa iya isigkatawo.+ 22  Kay sa indi na lang madugay, Makadto ako sa isa ka lugar kag indi na ako makabalik.+

Footnote

Ukon “wala sing unod.”
Ukon “Kon ang inyo kalag yara sa lugar sang akon kalag.”
Ukon “ang mga nagatipon upod sa akon.”
Ukon “kusog.” Sa literal, “sungay.”
Ukon “may landong sang kamatayon.”
Ukon mahimo, “nagatulok nga wala sing tulog.”