Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Job 11:1-20

BALAYAN SANG KAUNDAN

  • Nahauna nga pulong ni Zofar (1-20)

    • Nagpasibangod kay Job (2, 3)

    • Nagsiling nga kalainan untatan (14)

11  Dayon nagsabat si Zofar+ nga Naamanhon:   “Indi na lang bala pagsabton ang imo ginapanghambal, Ukon mangin husto ka bala tungod madamo ka sing ginahambal?*   Mahipos na lang bala ang mga tawo bangod sang imo wala pulos nga ginahambal? Wala bala sing magasaway sa imo pagpangyaguta?+   Kay nagsiling ka, ‘Husto ang akon pagpati,+ Kag matinlo ako sa imo atubangan.’+   Apang kon maghambal kuntani ang Dios Kag magbukas sang iya bibig sa imo!+   Dayon isugid niya sa imo ang mga tinago sang kaalam, Kay ang praktikal nga kaalam madamo sing bahin. Dayon mahibaluan mo nga ginkalimtan sang Dios ang iban mo nga sala.   Matungkad mo bala ang madalom nga mga butang sang Dios Ukon mahibaluan ang tanan tuhoy sa* Labing Gamhanan?   Mas mataas pa ini sangsa langit. May mahimo ka bala? Mas madalom pa ini sangsa Lulubngan.* May nahibaluan ka bala?   Mas masangkad pa ini sangsa duta Kag mas malapad pa sangsa dagat. 10  Sin-o ang makapugong sa iya kon sa paglabay niya, Dalhon niya kag itugyan ang isa ka tawo sa hukmanan? 11  Kay nakahibalo sia kon nagabinutig ang tawo. Indi bala niya pagtalupangdon kon may nakita sia nga kalainan? 12  Apang ang buangbuang makatigayon lang sing paghangop Kon ang asno nga talunon magbata sing tawo.* 13  Kon ihanda mo lamang ang imo tagipusuon Kag bayawon ang imo mga kamot sa Dios. 14  Kon nagahimo ka sing kalainan, untati na ini, Kag ang pagkadimatarong indi pagpapuy-a sa imo tolda. 15  Dayon mahangad mo ang imo ulo nga wala sing kasawayan; Kag makatindog ka sing malig-on nga wala sing kahadlok. 16  Dayon malimtan mo ang imo kalisdanan; Sa imo hunahuna daw tubig lang ini nga naglabay. 17  Ang imo kabuhi mangin masanag pa sangsa udtong-adlaw; Bisan ang kadulom sini mangin kaangay sang aga. 18  Magasalig ka bangod may paglaum ka, Magatan-aw ka sa imo palibot, kag magatulog ka nga may kalinong. 19  Magatulog ka nga wala sing ginakahadlukan, Kag madamo ang luyag nga matigayon ang imo kaayo. 20  Apang magadulom ang panulok sang mga malauton; Wala sila sing mapalagyuhan, Kag ang ila lang paglaum amo ang kamatayon.”*+

Footnote

Ukon “mangin husto bala ang bugalon?”
Ukon “matukiban ang latid sang.”
Ukon “Sheol,” nga amo ang kabilugan nga lulubngan sang katawhan. Tan-awa ang Glossary.
Ukon “Kon ang asno nga talunon mabun-ag nga tawo.”
Ukon “ang pagkapatay sang kalag.”