Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Jeremias 52:1-34

BALAYAN SANG KAUNDAN

  • Si Sedequias nagrebelde sa Babilonia (1-3)

  • Ginkibon ni Nabocodonosor ang Jerusalem (4-11)

  • Nalaglag ang siudad kag templo (12-23)

  • Ang katawhan gindala nga bihag sa Babilonia (24-30)

  • Si Jehoiakin ginpagua sa prisuhan (31-34)

52  Nagaedad si Sedequias+ sing 21 ka tuig sang nangin hari sia, kag naggahom sia sa Jerusalem sing 11 ka tuig. Ang iya iloy amo si Hamutal+ nga anak ni Jeremias nga taga-Libna.  Ginhimo niya ang malain sa panulok ni Jehova, pareho sang tanan nga ginhimo ni Jehoiakim.+  Natabo ini sa Jerusalem kag sa Juda bangod sa kaakig ni Jehova amo nga gintabog niya sila.+ Nagrebelde si Sedequias sa hari sang Babilonia.+  Sang ikasiam nga tuig sang paghari ni Sedequias, sa ikanapulo nga adlaw sang ikanapulo nga bulan, ginsalakay ni Hari Nabocodonosor* sang Babilonia ang Jerusalem upod ang tanan niya nga soldado. Nagkampo sila batok sa siudad kag nagpatindog sing pader sa palibot sini sa pagkibon sini.+  Kag nakibon ang siudad tubtob sang ika-11 nga tuig sang paggahom ni Hari Sedequias.  Sa ikasiam nga adlaw sang ikap-at nga bulan,+ sobra gid ang tiggulutom sa siudad kag wala na sing pagkaon ang katawhan.+  Sang ulihi, ginrumpag ang isa ka bahin sang pader sang siudad, gani pagkagab-i, nagpinalagyo ang tanan nga soldado kag nag-agi sila sa gawang sa ulot sang duha ka pader malapit sa hardin sang hari, samtang ginapalibutan sang mga Caldeanhon ang siudad. Nagpalagyo sila pakadto sa Araba.+  Apang ginlagas sang Caldeanhon nga mga soldado si Sedequias,+ kag naabtan nila ang hari sa desyerto nga kapatagan sang Jerico, kag nag-alaplaag ang tanan nga soldado sang hari.  Dayon gindakop nila ang hari kag gindala nila sia sa hari sang Babilonia sa Ribla sa duta sang Hamat, kag ginsentensiahan niya sia. 10  Ginpatay sang hari sang Babilonia ang mga anak nga lalaki ni Sedequias sa atubangan niya, kag ginpatay man niya sa Ribla ang tanan nga prinsipe sang Juda. 11  Dayon ginbulag sang hari sang Babilonia si Sedequias,+ kag ginkadenahan sing saway nga kadena kag gindala sa Babilonia kag ginbilanggo tubtob nga napatay sia. 12  Sa ikanapulo nga adlaw sang ikalima nga bulan sang ika-19 nga tuig sang paggahom ni Hari Nabocodonosor* nga hari sang Babilonia, nagkadto sa Jerusalem si Nebuzaradan nga pangulo sang mga bantay, nga alagad sang hari sang Babilonia.+ 13  Ginsunog niya ang balay ni Jehova,+ ang balay* sang hari, kag ang tanan nga balay sa Jerusalem. Ginsunog man niya ang tanan nga dalagku nga balay. 14  Ginrumpag sang tanan nga Caldeanhon nga mga soldado nga kaupod sang pangulo sang mga bantay ang pader sa palibot sang Jerusalem.+ 15  Ginbihag ni Nebuzaradan nga pangulo sang mga bantay ang pila sa kubos nga mga tawo, ang katawhan nga nabilin sa siudad, ang mga tawo nga nagdampig sa hari sang Babilonia, kag ang nabilin nga sampaton nga mga trabahador.+ 16  Apang ginbilin ni Nebuzaradan nga pangulo sang mga bantay ang pila sa pinakaimol nga mga tawo agod mag-atipan sang ulubasan kag magpanguma.+ 17  Gindugmok sang mga Caldeanhon ang mga haligi nga saway+ sa balay ni Jehova, ang mga karo+ kag ang saway nga suludlan sang tubig*+ sa balay ni Jehova, kag gindala nila ang tanan nga saway sa Babilonia.+ 18  Ginkuha man nila ang mga suludlan sang abo, mga pala, mga inugpalong, mga yahong,+ mga kopa,+ kag ang tanan nga saway nga kagamitan nga ginagamit nila anay sa pag-alagad sa templo. 19  Ginkuha sang pangulo sang mga bantay ang mga labador,+ mga incensario, mga yahong, mga suludlan sang abo, mga kandelero,+ mga kopa, kag mga yahong nga puro nga bulawan kag pilak.+ 20  Mabudlay gid mahibaluan kon daw ano kabug-at ang tanan nga saway halin sa duha ka haligi, sa suludlan sang tubig, sa 12 ka saway nga baka+ nga ginatungtungan sini, kag sa mga karo nga ginpahimo ni Hari Solomon para sa balay ni Jehova. 21  Ang kataason sang kada haligi 18 ka maniko,* ang palibot nga takus sini 12 ka maniko;+ ang kadamulon sini apat ka tudlo,* kag guhab ini sa sulod. 22  Kag saway ang uloulo sini. Ang kataason sang isa ka uloulo lima ka maniko;+ kag saway tanan ang sinalapid nga kulukadena nga dekorasyon kag ang prutas nga mga granada sa palibot sini. Amo man sini ang ikaduha nga haligi kag ang prutas nga mga granada. 23  May 96 ka prutas nga granada sa kilid; kag 100 tanan ka prutas nga granada sa palibot sang sinalapid nga kulukadena nga dekorasyon.+ 24  Ginbihag man sang pangulo sang mga bantay si Seraya+ nga puno nga saserdote, si Sofonias+ nga ikaduha nga saserdote, kag ang tatlo ka manugbantay sang puertahan.+ 25  Ginbihag man niya halin sa siudad ang isa ka opisyal sang palasyo nga nagadumala sa mga soldado, ang pito ka manuglaygay sang hari nga didto sa siudad, ang sekretaryo sang pangulo sang mga soldado nga amo ang nagatipon sa mga soldado, kag ang 60 ka lalaki halin sa katawhan sang duta nga didto sa siudad. 26  Ginbihag sila ni Nebuzaradan nga pangulo sang mga bantay kag gindala sila sa hari sang Babilonia sa Ribla. 27  Ginpatay sila sang hari sang Babilonia sa Ribla+ sa duta sang Hamat. Gani halin sa ila duta, gindala nga mga bihag ang katawhan sang Juda.+ 28  Amo ini ang kadamuon sang mga tawo nga ginbihag ni Nabocodonosor:* sang ikapito nga tuig sang iya paghari, 3,023 ka Judiyo.+ 29  Sang ika-18 nga tuig sang paghari ni Nabocodonosor,*+ 832 ka tawo* ang ginbihag halin sa Jerusalem. 30  Sang ika-23 nga tuig sang paghari ni Nabocodonosor,* gindala sa pagkatapok ni Nebuzaradan nga pangulo sang mga bantay ang mga Judiyo, 745 ka tawo.*+ Ang mga gintapok 4,600 tanan ka tawo.* 31  Dayon sang ika-37 nga tuig sang pagkabihag ni Hari Jehoiakin+ sang Juda, nangin hari si Hari Evil-merodac sa Babilonia. Sang ika-25 nga adlaw sang ika-12 nga bulan sadto nga tuig, ginpagua niya si* Hari Jehoiakin sang Juda sa prisuhan.+ 32  Maayo ang pagpakighambal niya kay Jehoiakin kag ginbayaw niya ang iya trono labaw sa mga trono sang iban nga mga hari nga kaupod niya sa Babilonia. 33  Gani gin-uba ni Jehoiakin ang bayo nga iya sang priso, kag nagakaon na sia upod sa hari sa bug-os niya nga kabuhi. 34  Ginahatagan sia sang hari sang Babilonia sing pagkaon adlaw-adlaw, sa bug-os niya nga kabuhi tubtob nga napatay sia.

Footnote

Sa literal, “Nabocodorosor,” lain pa nga pagtigbato.
Sa literal, “Nabocodorosor,” lain pa nga pagtigbato.
Ukon “palasyo.”
Sa literal, “saway nga Dagat.”
Ang isa ka maniko katumbas sang 44.5 ka sentimetro (17.5 ka pulgada). Tan-awa ang Apendise B14.
Ang isa ka tudlo katumbas sang 1.85 ka sentimetro (0.73 ka pulgada). Tan-awa ang Apendise B14.
Sa literal, “Nabocodorosor,” lain pa nga pagtigbato.
Sa literal, “Nabocodorosor,” lain pa nga pagtigbato.
Ukon “kalag.”
Sa literal, “Nabocodorosor,” lain pa nga pagtigbato.
Ukon “kalag.”
Ukon “kalag.”
Sa literal, “ginbayaw niya ang ulo ni.”