Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Jeremias 44:1-30

BALAYAN SANG KAUNDAN

  • Gintagna nga malaglag ang mga Judiyo sa Egipto (1-14)

  • Ginsikway sang katawhan ang paandam sang Dios (15-30)

    • “Rayna sang Langit” ginasimba (17-19)

44  May mensahe nga nag-abot kay Jeremias para sa tanan nga Judiyo nga nagaistar sa duta sang Egipto,+ sa Migdol,+ sa Tapanes,+ sa Nop,*+ kag sa Patros,+ nga nagasiling:  “Amo ini ang ginasiling ni Jehova sang mga kasuldadusan, ang Dios sang Israel, ‘Nakita ninyo ang tanan nga kalaglagan nga ginpahanabo ko sa Jerusalem+ kag sa tanan nga siudad sang Juda. Nakita ninyo subong nga nalaglag na ini kag wala sing nagaistar.+  Ginpaakig nila ako bangod sang malain nga ginhimo nila. Nagdangop sila kag naghalad+ kag nag-alagad sa iban nga mga dios nga wala nila makilala, kag wala man ninyo makilala kag sang inyo mga katigulangan.+  Padayon ko nga ginasugo sa inyo ang tanan ko nga alagad nga manalagna, kag ginasugo sila sing sulitsulit,* sa pagsiling: “Palihug, indi ninyo paghimua ining makangilil-ad nga butang nga ginakaugtan ko.”+  Apang wala sila magpamati ukon magtuman. Wala nila gin-untatan ang ila kalainan kag ang ila paghalad sa iban nga mga dios.+  Gani ang akon kaakig kag kasingkal nagdabdab sa mga siudad sang Juda kag sa mga dalan sang Jerusalem, kag nangin kagulub-an ini kag nahapay nga lugar tubtob subong.’+  “Amo ini ang ginasiling ni Jehova, ang Dios sang mga kasuldadusan kag Dios sang Israel, ‘Ngaa nagadala kamo sing daku nga kalaglagan sa inyo kaugalingon,* kag bangod sini malaglag ang tanan nga lalaki kag babayi, bata kag lapsag sa Juda, tubtob wala na sing mabilin sa inyo?  Ngaa ginapaakig ninyo ako bangod sang inyo ginahimo, bangod sang inyo paghalad sa iban nga mga dios sa Egipto diin nagaistar kamo? Malaglag kamo kag pakamalauton kag pakahuy-an sang tanan nga pungsod sa duta.+  Nalimtan na bala ninyo ang malaut nga ginhimo sang inyo mga katigulangan kag sang mga hari sang Juda+ kag sang ila mga asawa,+ kag ang malaut nga ginhimo ninyo kag sang inyo mga asawa,+ sa Juda kag sa mga dalan sang Jerusalem? 10  Wala sila magpaubos* tubtob sini nga adlaw, wala sila mahadlok,+ kag wala sila magsunod sa kasuguan kag sa pagsulundan nga ginhatag ko sa inyo kag sa inyo mga katigulangan.’+ 11  “Gani amo ini ang ginasiling ni Jehova sang mga kasuldadusan, ang Dios sang Israel, ‘Pahanabuon ko gid ang kalaglagan sa inyo, agod malaglag ang bug-os nga Juda. 12  Kuhaon ko ang mga nabilin sa Juda nga determinado nga magkadto sa Egipto agod mag-istar didto, kag malaglag sila tanan sa Egipto.+ Malaglag sila sa espada kag sa gutom; halin sa pinakakubos tubtob sa pinakadungganon, mapatay sila sa espada kag sa gutom. Sumpaon sila kag mangin butang nga kahadlukan, pakamalauton, kag pakahuy-an.+ 13  Silutan ko ang mga nagaistar sa Egipto pareho sang pagsilot ko sa Jerusalem. Silutan ko sila paagi sa espada, sa gutom, kag sa balatian.+ 14  Ang mga nabilin sa Juda nga nagkadto agod mag-istar sa Egipto indi makapalagyo ukon makaluwas agod magbalik sa duta sang Juda. Handum gid nila* nga magbalik kag mag-istar didto, apang indi sila makabalik, luwas sa pila lang nga makapalagyo.’” 15  Ang tanan nga lalaki nga nakahibalo nga ang ila mga asawa nagahalad sa iban nga mga dios kag ang tanan nga asawa nga nagtipon didto, nga isa ka daku nga grupo, kag ang tanan nga katawhan nga nagaistar sa duta sang Egipto,+ sa Patros,+ nagsiling kay Jeremias: 16  “Indi kami magpamati sa ginasiling mo sa amon sa ngalan ni Jehova. 17  Sa baylo, himuon namon ang tanan nga ginasiling namon. Magahalad kami sa Rayna sang Langit* kag magabubo kami sing mga dulot nga ilimnon para sa iya,+ pareho sang ginhimo namon kag sang amon mga katigulangan, sang amon mga hari, kag sang amon mga prinsipe, sa mga siudad sang Juda kag sa mga dalan sang Jerusalem sang tion nga nabusog kami sang tinapay kag maayo ang amon kahimtangan, kag wala sing kalaglagan nga natabo sa amon. 18  Sugod sang mag-untat kami sa paghalad sa Rayna sang Langit* kag sa pagbubo sing mga dulot nga ilimnon para sa iya, ginkulang na kami sing tanan nga butang kag nalaglag kami paagi sa espada kag sa gutom.” 19  Nagsiling man ang mga babayi: “Kag sang naghalad kami sa Rayna sang Langit* kag nagbubo sing mga dulot nga ilimnon para sa iya, indi bala nga gintugutan kami sang amon bana nga maghimo sing mga halad nga tinapay sa iya dagway, kag magbubo sing mga dulot nga ilimnon para sa iya?” 20  Dayon nagsiling si Jeremias sa tanan nga katawhan, sa mga lalaki kag sa ila mga asawa kag sa tanan nga tawo nga nagpakighambal sa iya: 21  “Ang mga halad nga inyo ginhalad sa mga siudad sang Juda kag sa mga dalan sang Jerusalem,+ nga ginhimo man sang inyo mga katigulangan, sang inyo mga hari, sang inyo mga prinsipe, kag sang katawhan sang duta—gindumdom ini ni Jehova kag nag-abot sa iya tagipusuon! 22  Sang ulihi, indi na mabatas ni Jehova ang malain kag makangilil-ad nga mga butang nga ginahimo ninyo, gani nahapay ang inyo duta kag nangin butang ini nga kahadlukan kag pakamalauton, kag wala sing magaistar, pareho sang mahanabo subong.+ 23  Bangod naghalad kamo kag bangod nakasala kamo kay Jehova, kay wala ninyo gintuman si Jehova kag wala kamo magsunod sa iya kasuguan, sa iya mga pagsulundan, kag sa iya mga pahanumdom, natabo ini nga kalaglagan sa inyo, pareho sang matabo subong.”+ 24  Nagsiling si Jeremias sa tanan nga katawhan kag sa tanan nga babayi: “Pamatii ninyo ang ginasiling ni Jehova, kamo tanan nga katawhan sang Juda nga nagaistar sa Egipto. 25  Amo ini ang ginasiling ni Jehova sang mga kasuldadusan, ang Dios sang Israel, ‘Gintuman ninyo kag sang inyo asawa ang inyo ginsiling, kay nagsiling kamo: “Tumanon gid namon ang amon ginpanaad nga maghalad sa Rayna sang Langit* kag magbubo sing mga dulot nga ilimnon para sa iya.”+ Kamo nga mga babayi magatuman gid sini kag himuon gid ninyo ang inyo mga panaad.’ 26  “Gani pamatii ninyo ang ginasiling ni Jehova, kamo tanan nga katawhan sang Juda nga nagaistar sa Egipto: ‘“Nagapanumpa ako sa akon dungganon nga ngalan,” siling ni Jehova, “nga ang akon ngalan indi na pagsambiton sa panumpa sa bug-os nga Egipto sang bisan sin-o nga tawo halin sa Juda+ nga nagasiling, ‘Nagapanumpa ako sa buhi nga Dios, ang Soberanong Ginuong Jehova!’+ 27  Nagapangita ako sing kahigayunan agod pahanabuon sa ila ang kalaglagan kag indi ang kaayuhan.+ Ang tanan nga katawhan sang Juda nga nagaistar sa Egipto malaglag paagi sa espada kag sa gutom, tubtob mapatay sila tanan.+ 28  Pila lang ang makaluwas sa espada, kag makabalik sa Juda halin sa Egipto.+ Dayon mahibaluan sang tanan nga nabilin nga katawhan sa Juda nga nag-istar sa Egipto kon kay sin-o pulong ang natuman, ang akon ukon ang ila!”’” 29  “‘Amo ini ang tanda para sa inyo,’ siling ni Jehova, ‘nga silutan ko kamo sa sini nga lugar, agod mahibaluan ninyo nga matuman gid ang akon ginasiling sa inyo nga kalaglagan. 30  Amo ini ang ginasiling ni Jehova: “Ginatugyan ko si Paraon Hofra nga hari sang Egipto sa iya mga kaaway kag sa mga nagatinguha sa pagkuha sang iya kabuhi,* subong nga gintugyan ko si Hari Sedequias sang Juda kay Hari Nabocodonosor* sang Babilonia nga iya kaaway kag nagtinguha sa pagkuha sang iya kabuhi.”’”*+

Footnote

Ukon “Memfis.”
Sa literal, “aga pa nagabangon kag ginasugo.”
Ukon “kalag.”
Ukon “nakabatyag nga nadugmok.”
Ukon “Bayawon nila ang ila kalag.”
Titulo sang diosa nga ginsimba sang apostata nga mga Israelinhon; mahimo nga diosa sang pertilidad.
Titulo sang diosa nga ginsimba sang apostata nga mga Israelinhon; mahimo nga diosa sang pertilidad.
Titulo sang diosa nga ginsimba sang apostata nga mga Israelinhon; mahimo nga diosa sang pertilidad.
Titulo sang diosa nga ginsimba sang apostata nga mga Israelinhon; mahimo nga diosa sang pertilidad.
Ukon “nagapangita sang iya kalag.”
Sa literal, “Nabocodorosor,” lain pa nga pagtigbato.
Ukon “nagpangita sang iya kalag.”