Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Jeremias 43:1-13

BALAYAN SANG KAUNDAN

  • Ang katawhan wala magtuman kag nagkadto sila sa Egipto (1-7)

  • Ang mensahe ni Jehova kay Jeremias sa Egipto (8-13)

43  Sang mahambal na ni Jeremias sa tanan nga katawhan ang tanan nga pulong halin kay Jehova nga ila Dios, nga siling ni Jehova nga ila Dios dapat niya isugid sa ila,  si Azarias nga anak ni Hosaias, si Johanan+ nga anak ni Karea, kag ang tanan nga makahas nga lalaki nagsiling kay Jeremias: “Kabutigan ang imo ginasiling! Wala ikaw ginpadala ni Jehova nga amon Dios, nga magsiling, ‘Indi kamo magkadto sa Egipto agod mag-istar didto.’  Ginasulsulan ka ni Baruc+ nga anak ni Neria agod itugyan kami sa mga Caldeanhon, agod patyon kami ukon agod dalhon kami nga bihag sa Babilonia.”+  Gani si Johanan nga anak ni Karea kag ang tanan nga pangulo sang mga soldado kag ang tanan nga katawhan wala magtuman sa ginsiling ni Jehova nga magpabilin sila sa Juda.  Sa baylo, gin-upod ni Johanan nga anak ni Karea kag sang tanan nga pangulo sang mga soldado ang tanan nga nabilin sa Juda. Amo ini sila ang nag-alaplaag sa nagkalainlain nga pungsod nga nagbalik agod mag-istar sa Juda.+  Gindala nila ang mga lalaki, ang mga babayi, ang mga kabataan, ang mga anak nga babayi sang hari, kag ang tanan* nga ginbilin ni Nebuzaradan+ nga pangulo sang mga bantay kay Gedalias+ nga anak ni Ahikam+ nga anak ni Safan,+ pati si Jeremias nga manalagna kag si Baruc nga anak ni Neria.  Kag nagkadto sila sa Egipto, kay wala nila gintuman ang ginsiling ni Jehova. Sang ulihi, nakalab-ot sila sa Tapanes.+  Dayon nagsiling si Jehova kay Jeremias sa Tapanes:  “Magkuha ka sing dalagku nga mga bato, kag tagua ini sa tisa nga alagyan kag tabuni ini sing palitada sa alagyan pasulod sa balay sang Paraon sa Tapanes, samtang nagatan-aw ang mga Judiyo. 10  Dayon isiling mo sa ila, ‘Amo ini ang ginasiling ni Jehova sang mga kasuldadusan, ang Dios sang Israel: “Dalhon ko diri si Nabocodonosor* nga hari sang Babilonia, nga akon alagad,+ kag ibutang ko ang iya trono sa ibabaw sini nga mga bato nga gintago ko, kag humlaron niya sa sini ang iya harianon nga tolda.+ 11  Magaabot sia kag salakayon niya ang Egipto.+ Ang takus sa makamamatay nga kalalat-an, mapatay sa makamamatay nga kalalat-an, ang takus bihagon, pagabihagon, kag ang takus mapatay sa espada, mapatay sa espada.+ 12  Sunugon ko ang mga balay* sang mga dios sang Egipto.+ Sunugon niya ang mga balay sang mga dios kag dalhon sila nga mga bihag. Subong kahapos sang pagsuksok sang isa ka manugbantay sang iya bayo, amo man kahapos ang pagsakop niya sa bug-os nga Egipto kag magahalin sia nga madinalag-on.* 13  Dugmukon niya ang mga haligi* sa Bet-semes* sa Egipto, kag sunugon niya ang mga balay* sang mga dios sang Egipto.”’”

Footnote

Ukon “tanan nga kalag.”
Sa literal, “Nabocodorosor,” lain pa nga pagtigbato.
Ukon “templo.”
Ukon “indi mahalitan.”
Ukon “obelisko.”
Ukon “Balay (Templo) sang Adlaw,” nga amo ang Heliopolis.
Ukon “templo.”