Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Jeremias 34:1-22

BALAYAN SANG KAUNDAN

  • Ang paghukom kay Sedequias (1-7)

  • Ginlapas ang katipan sa paghilway sa mga ulipon (8-22)

34  Sang si Hari Nabocodonosor* sang Babilonia kag ang tanan niya nga soldado kag ang tanan nga ginharian sa duta nga iya ginagamhan kag ang tanan nga katawhan nagpakig-away batok sa Jerusalem kag sa tanan nga siudad sini,+ may mensahe si Jehova kay Jeremias, nga nagasiling:  “Amo ini ang ginasiling ni Jehova nga Dios sang Israel, ‘Lakat ka kag isiling mo ini kay Hari Sedequias+ sang Juda: “Amo ini ang ginasiling ni Jehova, ‘Itugyan ko ini nga siudad sa hari sang Babilonia, kag sunugon niya ini.+  Indi ka makapalagyo sa iya, kay pat-od nga madakpan ka kag itugyan ka sa iya.+ Magaatubang ka sa hari sang Babilonia, kag magapakighambal ka sa iya, kay dalhon ka sa Babilonia.’+  Apang, pamatii ang ginsiling ni Jehova, O Hari Sedequias sang Juda, ‘Amo ini ang ginasiling ni Jehova tuhoy sa imo: “Indi ka mapatay sa espada.  Mapatay ka nga malinong,+ kag magasunog sila sing mga pahumot para sa imo pareho sang ginhimo nila sa imo mga amay, ang mga hari nga nauna sa imo. Magalalaw sila sa imo kag magasiling, ‘Makaluluoy ang amon hari!’ kay ‘ako mismo ang nagsiling sini,’ siling ni Jehova.”’”’”  Ginsiling ini tanan ni Jeremias nga manalagna kay Hari Sedequias sang Juda didto sa Jerusalem,  sang nagapakig-away ang mga soldado sang hari sang Babilonia batok sa Jerusalem kag batok sa tanan nga siudad sang Juda nga nabilin,+ ang Laquis+ kag ang Azeka,+ kay amo na lang ini nga mga siudad sang Juda nga may mabakod nga depensa ang wala pa masakop.  May mensahe si Jehova kay Jeremias sa tapos maghimo sing katipan si Hari Sedequias sa tanan nga katawhan sa Jerusalem nga magahatag sia sing kahilwayan,+  nga dapat hilwayon sang tanan ang ila mga ulipon nga Hebreo, lalaki kag babayi, agod wala sing bisan sin-o ang padayon nga mag-ulipon sa pareho nila nga Judiyo. 10  Gani nagtuman ang tanan nga prinsipe kag ang tanan nga katawhan. Nag-ugyon sila sa katipan nga ang kada isa dapat maghilway sang iya mga ulipon nga lalaki kag babayi, kag indi na sila paghimuon nga mga ulipon. Nagtuman sila kag ginpalakat nila ang ila mga ulipon. 11  Apang sang ulihi, ginpabalik nila ang ila ginhilway nga mga ulipon, kag gin-ulipon sila liwat. 12  Gani may mensahe si Jehova kay Jeremias, kag nagsiling si Jehova: 13  “Amo ini ang ginasiling ni Jehova nga Dios sang Israel, ‘Naghimo ako sing katipan sa inyo mga katigulangan+ sang ginpagua ko sila sa duta sang Egipto diin naulipon sila,+ nga nagasiling: 14  “Pagkatapos sang pito ka tuig, dapat ninyo hilwayon ang inyo utod nga isa ka Hebreo nga ginbaligya sa inyo kag nakaalagad sa inyo sing anom ka tuig. Dapat ninyo sia hilwayon.”+ Apang wala magpamati ukon magtuman sa akon ang inyo mga katigulangan. 15  Kag sining karon lang,* nagpanumbalik kamo sa akon kag ginhimo ninyo ang matarong sa akon panulok kay ginhatagan ninyo sing kahilwayan ang inyo naulipon nga isigkatawo, kag naghimo kamo sing katipan sa atubangan ko sa balay nga gintawag sa akon ngalan. 16  Apang nagbaylo ang inyo hunahuna kag ginpasipalahan ninyo ang akon ngalan+ sang ginpabalik ninyo ang inyo mga ulipon nga lalaki kag babayi. Ginhilway na ninyo sila suno sa ila luyag,* apang gin-ulipon ninyo sila liwat.’ 17  “Gani amo ini ang ginasiling ni Jehova: ‘Wala kamo magtuman sa akon sa paghatag sing kahilwayan sa inyo utod kag isigkatawo.+ Gani amo ini ang kahilwayan nga ihatag ko sa inyo,’ siling ni Jehova, ‘mapatay kamo sa espada, sa balatian, kag sa gutom,+ kag mahadlukan ang tanan nga ginharian sa duta bangod sang himuon ko sa inyo.+ 18  Gani amo ini ang matabo sa mga tawo nga naglapas sa akon katipan, kay wala nila gintuman ang katipan nga ginhimo nila sa atubangan ko sang ginpihak nila ang tinday nga baka kag naglakat sila sa tunga sini,+ 19  ang mga prinsipe sang Juda, ang mga prinsipe sang Jerusalem, ang mga opisyal sang palasyo, ang mga saserdote, kag ang tanan nga katawhan sini nga duta nga naglakat sa tunga sang ginpihak nga tinday nga baka: 20  Itugyan ko sila sa ila mga kaaway kag sa mga tawo nga nagatinguha sa pagkuha sang ila kabuhi,* kag kaunon sang mga pispis kag sang mga sapat ang ila mga bangkay.+ 21  Kag itugyan ko si Hari Sedequias sang Juda kag ang iya mga prinsipe sa ila mga kaaway kag sa mga tawo nga nagatinguha sa pagkuha sang ila kabuhi* kag sa mga soldado sang hari sang Babilonia+ nga nag-isol na sa pagsalakay sa inyo.’+ 22  “‘Manduan ko sila,’ siling ni Jehova, ‘kag pabalikon ko sila sa sini nga siudad, kag magapakig-away sila batok sa sini kag sakupon nila kag sunugon ini;+ kag himuon ko ang mga siudad sang Juda nga isa ka nahapay nga duog nga wala sing pumuluyo.’”+

Footnote

Sa literal, “Nabocodorosor,” lain pa nga pagtigbato.
Sa literal, “sini nga adlaw.”
Ukon “kalag.”
Ukon “nagapangita sang ila kalag.”
Ukon “nagapangita sang ila kalag.”