Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Jeremias 28:1-17

BALAYAN SANG KAUNDAN

  • Si Jeremias kontra kay Hananias (1-17)

28  Sa amo gihapon nga tuig, sa ikalima nga bulan sang ikap-at nga tuig sang paggahom ni Hari Sedequias+ sa Juda, si manalagna Hananias nga anak ni Azur nga taga-Gibeon+ nagsiling sa akon sa balay ni Jehova sa atubangan sang mga saserdote kag sang tanan nga katawhan:  “Amo ini ang ginasiling ni Jehova sang mga kasuldadusan, ang Dios sang Israel, ‘Balion ko ang gota sang hari sang Babilonia.+  Sa sulod sang duha ka tuig,* ibalik ko sa sini nga duog ang tanan nga kagamitan sa balay ni Jehova nga ginkuha diri ni Hari Nabocodonosor sang Babilonia kag gindala sa Babilonia.’”+  “‘Kag ibalik ko sa sini nga duog si Jeconias+ nga anak ni Jehoiakim+ kag hari sang Juda, kag ang tanan nga taga-Juda nga gindala nga bihag sa Babilonia,’+ siling ni Jehova, ‘kay balion ko ang gota sang hari sang Babilonia.’”  Dayon nagpakighambal si Jeremias nga manalagna kay Hananias nga manalagna sa atubangan sang mga saserdote kag sang tanan nga katawhan nga nagatindog sa balay ni Jehova.  Nagsiling si Jeremias nga manalagna: “Kabay pa!* Kabay pa nga himuon ina ni Jehova! Kabay pa nga tumanon ni Jehova ang imo ginpanagna kag ibalik niya sa sini nga duog ang kagamitan sang balay ni Jehova kag ang tanan nga katawhan nga gindala nga bihag sa Babilonia!  Apang palihug, pamatii ining mensahe ko sa imo kag sa tanan nga katawhan.  Ang mga manalagna sang una nga nauna sa akon kag sa imo nagpanagna man tuhoy sa inaway, kalamidad, kag balatian sa madamo nga kadutaan kag sa gamhanan nga mga ginharian.  Apang ang manalagna nga nagapanagna sing paghidait makilal-an lamang nga ginpadala sia ni Jehova kon magmatuod ang iya ginsiling.” 10  Dayon ginkuha ni Hananias nga manalagna ang gota sa liog ni Jeremias nga manalagna kag ginbali ini.+ 11  Dayon nagsiling si Hananias sa tanan nga katawhan: “Amo ini ang ginasiling ni Jehova, ‘Pareho sini, balion ko sa liog sang tanan nga pungsod ang gota ni Hari Nabocodonosor sang Babilonia sa sulod sang duha ka tuig.’”+ Kag naglakat si Jeremias nga manalagna. 12  Sa tapos mabali ni Hananias nga manalagna ang gota sa liog ni Jeremias nga manalagna, nag-abot ini nga mensahe ni Jehova kay Jeremias: 13  “Lakat ka, kag isiling mo ini kay Hananias, ‘Amo ini ang ginasiling ni Jehova: “Ginbali mo ang mga gota nga kahoy,+ apang islan ini sing mga gota nga salsalon.” 14  Kay amo ini ang ginasiling ni Jehova sang mga kasuldadusan, ang Dios sang Israel: “Takdan ko sing gota nga salsalon ang liog sining tanan nga pungsod, agod mag-alagad sila kay Hari Nabocodonosor sang Babilonia, kag dapat mag-alagad sila sa iya.+ Ihatag ko sa iya bisan ang ilahas nga mga sapat sa latagon.”’”+ 15  Dayon nagsiling si Jeremias nga manalagna kay Hananias+ nga manalagna: “Palihug mamati ka, Hananias! Wala ikaw ginpadala ni Jehova, apang ginpapati mo ini nga katawhan sa kabutigan.+ 16  Gani amo ini ang ginasiling ni Jehova, ‘Dulaon ko ikaw sa duta. Mapatay ka sini nga tuig, kay ginasugyot mo ang katawhan nga magrebelde kay Jehova.’”+ 17  Gani napatay si Hananias nga manalagna sang ikapito nga bulan sina nga tuig.

Footnote

Sa literal, “tinuig sang mga adlaw.”
Ukon “Amen” sa Hebreo.