Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Jeremias 26:1-24

BALAYAN SANG KAUNDAN

  • Si Jeremias gintinguhaan nga patyon (1-15)

  • Naluwas si Jeremias (16-19)

    • Ginkutlo ang tagna ni Miqueas (18)

  • Si manalagna Urija (20-24)

26  Sang nagsugod sa paghari sa Juda si Jehoiakim+ nga anak ni Josias, nag-abot ini nga mensahe halin kay Jehova:  “Amo ini ang ginasiling ni Jehova, ‘Magtindog ka sa luwang sang balay ni Jehova, kag maghambal ka sa* tanan nga katawhan sang mga siudad sang Juda nga nagakadto sa pagsimba* sa balay ni Jehova. Isiling mo sa ila ang tanan nga ginsugo ko sa imo; indi mo ini pagbuhinan sing bisan isa ka pulong.  Ayhan magapamati sila kag untatan nila ang ila malain nga dalanon, kag bag-uhon ko ang akon hunahuna* kag indi ko na pagdayunon ang kalaglagan nga gintuyo ko nga himuon sa ila bangod sang ila malain nga ginahimo.+  Isiling mo sa ila: “Amo ini ang ginasiling ni Jehova, ‘Kon indi kamo magpamati sa akon kag indi kamo magtuman sa akon kasuguan* nga ginhatag sa inyo,  kag indi kamo magpamati sa ginasiling sang akon mga alagad nga mga manalagna, nga ginasugo ko sa inyo sing sulitsulit,* apang wala ninyo ginpamatian,+  himuon ko ini nga balay pareho sang Shilo,+ kag himuon ko ini nga siudad nga butang nga pakamalauton sang tanan nga pungsod sa duta.’”’”+  Nabatian sang mga saserdote kag sang mga manalagna kag sang tanan nga katawhan si Jeremias nga nagahambal sini sa balay ni Jehova.+  Sang nakatapos na si Jeremias sa paghambal sang tanan nga ginsugo sa iya ni Jehova nga isiling sa tanan nga katawhan, gindakop sia sang mga saserdote kag sang mga manalagna kag sang tanan nga katawhan. Nagsiling sila: “Dapat ka mapatay.  Ngaa nagapanagna ka sini sa ngalan ni Jehova, ‘Ini nga balay mangin pareho sang Shilo, kag ini nga siudad laglagon kag wala na sing magaistar’?” Kag gintipunan sang tanan nga tawo si Jeremias sa balay ni Jehova. 10  Sang mabatian sang mga prinsipe sang Juda ini nga mga pulong, halin sa balay* sang hari nagkadto sila sa balay ni Jehova kag nagpungko sila sa alagyan sang bag-o nga gawang sang balay ni Jehova.+ 11  Ang mga saserdote kag ang mga manalagna nagsiling sa mga prinsipe kag sa tanan nga katawhan: “Dapat hukman sing kamatayon ini nga tawo,+ bangod nabatian ninyo mismo nga nagpanagna sia batok sa sini nga siudad.”+ 12  Nagsiling si Jeremias sa tanan nga prinsipe kag sa tanan nga katawhan: “Si Jehova ang nagpadala sa akon nga itagna batok sa sini nga balay kag sa sini nga siudad ang tanan nga nabatian ninyo.+ 13  Gani bag-uha ninyo ang inyo mga dalanon kag ang inyo ginahimo, kag tumana ninyo si Jehova nga inyo Dios, kag si Jehova magabag-o sang iya hunahuna* kag indi na niya pagdayunon ang kalaglagan nga ginsiling niya batok sa inyo.+ 14  Apang bahala na kamo sa akon. Himua ninyo sa akon kon ano ang maayo kag matarong sa inyo panulok. 15  Apang dapat ninyo mahibaluan nga kon patyon ninyo ako, manabat kamo kag ini nga siudad kag ang mga pumuluyo sini bangod ginpatay ninyo ang tawo nga wala sing sala, kay matuod gid nga ginpadala ako ni Jehova sa inyo agod ihambal sa inyo ini tanan nga pulong.” 16  Dayon nagsiling ang mga prinsipe kag ang tanan nga katawhan sa mga saserdote kag sa mga manalagna: “Indi dapat hukman sing kamatayon ini nga tawo, kay nagahambal sia sa aton sa ngalan ni Jehova nga aton Dios.” 17  May pila ka gulang sa sini nga duta nga nagtindog kag nagsiling sa bug-os nga katilingban sang katawhan: 18  “Sang panahon ni Hari Ezequias+ sang Juda, nagpanagna si Miqueas+ nga taga-Moreset kag nagsiling sia sa tanan nga katawhan sang Juda, ‘Amo ini ang ginasiling ni Jehova sang mga kasuldadusan: “Ang Sion araduhon pareho sang pag-arado sa uma, Ang Jerusalem mangin tinumpok sang kagulub-an,+ Kag ang bukid sang Balay* mangin pareho sang mataas nga lugar sa kagulangan.”’*+ 19  “Ginpatay bala sia ni Hari Ezequias sang Juda kag sang tanan nga taga-Juda? Indi bala nga nagkahadlok sia kay Jehova kag nagpakiluoy sia kay Jehova,* amo nga nagbag-o ang hunahuna ni* Jehova kag wala na gindayon ang kalaglagan nga ginsiling niya batok sa ila?+ Gani kita mismo ang magadala sing daku nga kalaglagan sa aton kaugalingon.* 20  “May isa pa nga nagpanagna sa ngalan ni Jehova, si Urija nga anak ni Semaias nga taga-Kiryat-jearim.+ Nagpanagna sia batok sa sini nga siudad kag batok sa sini nga duta pareho sa ginsiling ni Jeremias. 21  Nabatian ni Hari Jehoiakim+ kag sang tanan niya nga isganan nga tinawo kag sang tanan nga prinsipe ang iya ginsiling, gani gintinguhaan sang hari nga patyon sia.+ Sang mabalitaan ini ni Urija, hinadlukan sia, gani nagpalagyo sia pakadto sa Egipto. 22  Dayon ginsugo ni Hari Jehoiakim si Elnatan+ nga anak ni Acbor kag ang iban pa nga mga lalaki sa pagkadto sa Egipto. 23  Ginkuha nila si Urija sa Egipto kag gindala sia kay Hari Jehoiakim. Dayon ginpatay sia sang hari paagi sa espada+ kag ginhaboy ang iya bangkay sa lulubngan sang ordinaryo nga mga tawo.” 24  Apang si Ahikam+ nga anak ni Safan+ nagbulig kay Jeremias, gani wala sia matugyan sa mga tawo nga luyag magpatay sa iya.+

Footnote

Ukon “tuhoy sa.”
Ukon “pagyaub.”
Ukon “magakalisod ako.”
Ukon “instruksion.”
Sa literal, “aga pa nagabangon kag ginasugo.”
Ukon “palasyo.”
Ukon “magakalisod.”
Ukon “ang bungyod sang templo.”
Ukon “pareho sang madamo sing kahoy nga mga bungyod.”
Ukon “kag ginpahumok niya ang nawong ni Jehova.”
Ukon “nagkalisod si.”
Ukon “kalag.”