Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Jeremias 19:1-15

BALAYAN SANG KAUNDAN

  • Ginsugo si Jeremias nga buk-on ang daga nga tibod (1-15)

    • Paghalad sing anak kay Baal (5)

19  Amo ini ang ginsiling ni Jehova: “Magbakal ka sing daga nga tibod sa maninihon.+ Upda ang pila ka gulang sang katawhan kag ang pila ka nagapanguna nga mga saserdote,  kag magkadto ka sa Nalupyakan sang Anak ni Hinom+ nga yara sa alagyan sang Gawang sang Buka nga mga Kolon. Ipahibalo mo didto ang mensahe nga ihambal ko sa imo.  Amo ini ang isiling mo, ‘Pamatii ninyo ang ginsiling ni Jehova, kamo nga mga hari sang Juda kag kamo nga mga pumuluyo sang Jerusalem. Amo ini ang ginasiling ni Jehova sang mga kasuldadusan, ang Dios sang Israel: “‘“Magapadala ako sing kalaglagan sa sini nga lugar, kag ang bisan sin-o nga makabati sini mahadlukan gid.*  Himuon ko ini tungod gintalikdan nila ako+ kag ginhimo nila ini nga lugar nga indi na makilal-an.+ Nagahalad sila diri para sa iban nga mga dios nga wala nila makilala kag sang ila mga katigulangan kag sang mga hari sang Juda, kag ginpuno nila ini nga lugar sing dugo sang mga tawo nga wala sing sala.+  Gintukod nila ang mataas nga mga duog para sa pagsimba kay Baal agod sunugon sa kalayo bilang halad ang ila mga anak para kay Baal,+ butang nga wala ko ginsugo ukon ginhambal sa ila kag wala gid magsulod sa akon tagipusuon.”’*+  “‘“Gani magaabot ang tion,” siling ni Jehova, “nga indi na ini pagtawgon nga Tofet ukon Nalupyakan sang Anak ni Hinom, kundi Nalupyakan nga Palatyan.+  Paslawon ko ang plano sang Juda kag sang Jerusalem sa sini nga lugar, kag itugyan ko sila sa espada sang ila mga kaaway kag sa kamot sang mga nagatinguha sa pagkuha sang ila kabuhi.* Ipakaon ko ang ila mga bangkay sa mga pispis kag sa mga sapat.+  Himuon ko ini nga siudad nga mangin butang nga kahadlukan kag panagutsutan. Ang tanan nga magalabay sa sini mahadlukan kag managutsot tungod sang tanan nga kalalat-an nga matabo sa sini.+  Pabay-an ko nga kaunon nila ang unod sang ila mga anak nga lalaki kag babayi, kag kaunon nila ang unod sang ila isigkatawo, bangod sang ila kabudlayan kag pagkibon sang ila mga kaaway kag sang mga nagatinguha sa pagkuha sang ila kabuhi.”’*+ 10  “Dayon buk-on mo ang tibod sa atubangan sang mga tawo nga nagaupod sa imo, 11  kag silinga sila, ‘Amo ini ang ginasiling ni Jehova sang mga kasuldadusan: “Buk-on ko ining katawhan kag ining siudad, pareho sang pagbuka sa kolon sang maninihon nga indi na makay-o pa; kag ilubong nila ang mga patay sa Tofet tubtob wala na sing lugar nga malubngan sa ila.”’+ 12  “‘Amo sina ang himuon ko sa sini nga lugar,’ siling ni Jehova, ‘kag sa mga pumuluyo sini. Himuon ko ini nga siudad nga mangin pareho sang Tofet. 13  Ang mga balay sa Jerusalem kag ang mga balay sang mga hari sang Juda mangin mahigko pareho sang Tofet,+ ang tanan nga balay diin sa atop sini naghalad sila sa tanan nga butang sa langit+ kag nagbubo sila sing mga dulot nga ilimnon sa iban nga mga dios.’”+ 14  Pag-abot ni Jeremias halin sa Tofet diin ginpadala sia ni Jehova agod magpanagna, nagtindog sia sa luwang sang balay ni Jehova kag naghambal sia sa tanan nga katawhan: 15  “Amo ini ang ginasiling ni Jehova sang mga kasuldadusan, ang Dios sang Israel, ‘Ipadala ko sa sini nga siudad kag sa tanan nga banwa nga sakop sini ang tanan nga kalaglagan nga ginsiling ko batok sa sini, bangod nangin batinggilan sila* kag wala nila gintuman ang akon ginsiling.’”+

Footnote

Sa literal, “ang iya mga dulunggan matingilan.”
Ukon “hunahuna.”
Ukon “nagapangita sang ila kalag.”
Ukon “nagapangita sang ila kalag.”
Sa literal, “ginpatig-a nila ang ila liog.”