Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Jeremias 14:1-22

BALAYAN SANG KAUNDAN

  • Tigpalamangag, gutom, espada (1-12)

  • Ang butig nga mga manalagna ginpakamalaut (13-18)

  • Ginbaton ni Jeremias nga nakasala ang katawhan (19-22)

14  Amo ini ang ginsiling ni Jehova kay Jeremias tuhoy sa tigpalamangag:+   Naglalaw ang Juda,+ kag nagkalaguba ang mga gawang sini. Naghalaplay sila nga nagapangasubo sa duta, Kag mabatian ang paghinibi halin sa Jerusalem.   Ginpasag-ub sang mga agalon ang ila mga alagad* sing tubig. Nagkadto sila sa mga bubon,* apang wala sila sing nakita nga tubig. Nagbalik sila nga wala sing sulod ang ila mga suludlan. Nahuy-an sila kag nalugaw-an, Gani gintabunan nila ang ila ulo.   Bangod naglitik ang duta, Kay wala sing ulan,+ Nasubuan ang mga mangunguma kag gintabunan nila ang ila ulo.   Ginpabay-an bisan sang usa nga babayi ang iya bag-o lang nabun-ag nga tinday Bangod wala sing hilamon.   Nagatindog ang mga asno nga talunon sa mahawan nga mga bakulod. Nagahangos sila pareho sang mga ido nga talunon;* Nagapalangdulom ang ila panulok bangod wala sing mga tanom.+   Bisan pa ang amon mga sala nagasaksi batok sa amon, O Jehova, maghulag ka tungod sa imo ngalan.+ Kay madamo nga beses nga indi kami matutom sa imo,+ Kag nakasala kami sa imo.   O ikaw nga ginalauman sang Israel, ang iya Manluluwas+ sa tion sang kabudlayan, Ngaa pareho ka sa isa ka estranghero sa duta, Pareho sa nagapanglakaton nga tawo nga naghapit lang sa pagpaligad sang gab-i?   Ngaa pareho ka sa isa ka tawo nga nakibot kag naurungan, Pareho sang isganan nga tawo nga indi makaluwas? Kay yara ka sa tunga namon, O Jehova,+ Kag gintawag kami sa imo ngalan.+ Indi kami pagpabay-i. 10  Amo ini ang ginasiling ni Jehova tuhoy sa sini nga katawhan: “Luyag nila maglakatlakat;+ wala nila ginapunggan ang ila mga tiil.+ Gani wala mahamuot sa ila si Jehova.+ Dumdumon niya ang ila mga kasaypanan kag manabat sila sa iya bangod sang ila mga sala.”+ 11  Dayon nagsiling si Jehova sa akon: “Indi ka magpangamuyo para sa kaayuhan sini nga katawhan.+ 12  Kon magpuasa sila, indi ko pagpamatian ang ila pagpakiluoy,+ kag kon maghalad sila sing mga dulot nga sinunog kag sing mga dulot nga uyas, indi ako mahamuot sa sini,+ kay laglagon ko sila paagi sa espada, sa gutom, kag sa balatian.”+ 13  Nagsiling ako: “O Soberanong Ginuong Jehova! Ang mga manalagna nagasiling sa ila, ‘Wala sing inaway kag wala sing gutom nga mahanabo sa inyo, kundi hatagan ko kamo sing matuod nga paghidait sa sini nga lugar.’”+ 14  Nagsiling si Jehova sa akon: “Ang mga manalagna nagapanagna sing kabutigan sa akon ngalan.+ Wala ko sila ginpadala ukon ginsugo, kag wala ako magpakighambal sa ila.+ Ang ila ginapanagna sa inyo indi matuod nga palanan-awon, wala pulos nga pagpamakot, kag pagpangdaya sang ila tagipusuon.+ 15  Gani amo ini ang ginasiling ni Jehova: ‘Ang mga manalagna nga nagapanagna sa akon ngalan bisan pa wala ko sila ginpadala kag nagasiling nga wala sing inaway kag gutom nga mahanabo sa sini nga duta, malaglag paagi sa espada kag gutom.+ 16  Ang mga tawo nga ginasugiran nila sing tagna ihaboy sa mga dalan sang Jerusalem bangod sang gutom kag inaway. Wala sing maglubong sa ila,+ sa ila mga asawa, mga anak nga lalaki, ukon mga anak nga babayi. Kay pahanabuon ko ang kalaglagan nga nagakadapat sa ila.’+ 17  “Dapat mo ini isiling sa ila, ‘Ang mga luha magatululagay sa akon mga mata adlaw kag gab-i, indi ini mag-untat,+ Kay ang birhen nga anak nga babayi sang akon katawhan naigo kag napukan,+ Kag grabe gid ang iya pilas. 18  Kon magkadto ako sa latagon kag magtan-aw, Makita ko ang mga napatay sang espada!+ Kag kon magsulod ako sa siudad, Makita ko ang mga nagabalatian bangod sang gutom!+ Kay ang manalagna kag ang saserdote naglibot sa duta nga wala nila mahibaluan.’”+ 19  Ginsikway mo bala sing bug-os ang Juda, ukon ginkangil-aran mo* ang Sion?+ Ngaa ginpilasan mo kami amo nga indi na kami mag-ayo?+ Naglaum kami sing paghidait, apang wala sing maayo nga nag-abot, Sing tion sang pag-ayo, apang kakugmat ang nag-abot!+ 20  O Jehova, ginabaton namon ang amon kalautan, Kag ang kasaypanan sang amon mga katigulangan, Kay nakasala kami sa imo.+ 21  Indi kami pagsikwaya tungod sa imo ngalan;+ Indi pagtamaya ang imo mahimayaon nga trono. Dumduma kag indi paggub-a ang imo katipan sa amon.+ 22  May isa bala sa wala pulos nga mga diosdios sang mga pungsod nga makapaulan, Ukon nagamatumato bala ang langit sa pagpaulan sing mabunok? Indi bala nga ikaw lang ang makahimo sini, O Jehova nga amon Dios?+ Kag nagalaum kami sa imo, Kay ikaw lamang ang nagahimo sining tanan nga butang.

Footnote

Ukon “mga magagmay.”
Ukon “kalog; pulunduhan sang tubig.”
Sa Ingles, jackal.
Ukon “sang imo kalag.”