Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Isaias 31:1-9

BALAYAN SANG KAUNDAN

  • Matuod nga bulig halin sa Dios, indi sa tawo (1-9)

    • Kabayo sang Egipto undanon (3)

31  Makaluluoy ang mga nagadulhog sa Egipto sa pagpangayo sing bulig,+ Nga nagasalig sa mga kabayo,+ Ang mga nagasalig sa madamo nga kangga sa inaway, Kag sa makusog nga mga kabayo.* Apang wala sila magsalig sa Balaan sang Israel, Kag wala nila ginpangita si Jehova.   Apang maalam gid sia kag magapadala sia sing kalaglagan, Kag indi niya pagbawion ang iya ginasiling. Magatindog sia batok sa panimalay sang mga malauton Kag sa mga nagabulig sa mga makasasala.+   Ang mga Egiptohanon tawo lamang Ang ila mga kabayo undanon kag indi espiritu.+ Kon untayon ni Jehova ang iya kamot, Ang bisan sin-o nga magabulig masandad, Kag bisan sin-o nga ginabuligan mapukan; Sila tanan mapapas sing dungan.   Kay amo ini ang ginsiling ni Jehova sa akon: “Subong nga ang makusog nga bataon nga leon* nagangurob sa iya tinukob, Bisan tawgon pa ang madamo nga manugbantay sa pagtabog sa iya, Indi sia mahadlok sa ila tingog Ukon makugmat sa ila gahod, Sa amo man nga paagi si Jehova sang mga kasuldadusan magapanaug agod makig-away Tungod sa Bukid Sion kag tungod sa iya bakulod.   Kaangay sang nagasurip nga mga pispis, pangapinan ni Jehova sang mga kasuldadusan ang Jerusalem.+ Pangapinan kag luwason gid niya sia. Amligan kag tipigan gid niya sia.”  “O katawhan sang Israel, balik kamo sa Isa nga ginsumpong ninyo.+  Kay sa sina nga adlaw ihaboy sang kada isa ang iya wala sing pulos nga mga dios nga pilak kag bulawan nga ginhimo ninyo para sa inyo kaugalingon, kag ini isa ka sala.   Kag ang Asiria mapukan sa espada nga indi iya sang tawo; Kag lamunon sia sang espada nga indi iya sang tawo.+ Magapalagyo sia bangod sang espada, Kag ang iya mga pamatan-on nga lalaki mangin ulipon.   Ang iya igang magataliwan bangod sang kahadlok, Kag ang iya mga prinsipe makugmat bangod sang palatandaan,” siling ni Jehova, Nga ang kapawa* yara sa Sion kag ang hurnuhan yara sa Jerusalem.

Footnote

Ukon “manugkabayo.”
Ukon “ang may bungaybungay nga bataon nga leon.”
Ukon “kalayo.”