Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Isaias 21:1-17

BALAYAN SANG KAUNDAN

  • Mensahe batok sa kamingawan (1-10)

    • Nagabantay sa lalantawan (8)

    • “Napukan ang Babilonia!” (9)

  • Mensahe batok sa Duma kag sa desyerto nga kapatagan (11-17)

    • “Manugbantay, malawig pa bala ang kagab-ihon?” (11)

21  Isa ka mensahe batok sa kamingawan sang dagat:*+ Magaabot ini kaangay sang unos halin sa bagatnan, Halin sa kamingawan, halin sa makahaladlok nga duta.+   Ginpakita sa akon ang isa ka makahaladlok nga palanan-awon: Ang maluib nga pungsod nagapangluib, Kag ang manuglaglag nga pungsod nagapanglaglag. Magtaklad ka, Elam! Magsalakay ka, Media!+ Pauntaton ko ang tanan nga pag-antos nga ginhimo niya.+   Amo nga nalisang gid ako.*+ Ginkombulsion ako, Kaangay sang babayi nga manugbata. Nalisdan gid ako sa pagpamati; Natublag gid ako sa pagtan-aw.   Nagkubakuba ang akon dughan; nagkurog ako sa kahadlok. Ang kasisidmon nga akon ginahandum nagapakurog sa akon.   Ihanda ang lamesa kag ang mga pulungkuan! Magkaon kag mag-inom!+ Magtindog kamo mga prinsipe, haplasi* ang taming!   Kay amo ini ang ginsiling ni Jehova sa akon: “Lakat ka, magbutang ka sing bantay kag ipasugid sa iya ang iya nakita.”   Kag nakakita sia sang kangga sa inaway nga ginaguyod sang mga kabayo, Kangga sa inaway nga ginaguyod sang mga asno, Kangga sa inaway nga ginaguyod sang mga kamelyo. Nagbantay gid sia sing maayo.   Kag nagpanawag sia kaangay sang leon: “O Jehova, nagabantay ako pirme sa torre nga lalantawan sa bug-os nga adlaw, Kag nagpabilin ako sa akon ginabantayan sa tagsa ka gab-i.+   Tan-awa kon ano ang nagapakari: Mga lalaki nga nagasakay sa kangga sa inaway nga ginaguyod sang mga kabayo!”+ Dayon nagsiling sia: “Napukan sia! Napukan ang Babilonia!+ Ang tanan nga imahen sang iya mga dios ginpamuka niya sa duta!”+ 10  Katawhan ko nga ginlinas kaangay sang uyas, Ang patubas* sang akon linasan,+ Ginsugid ko sa inyo ang tanan nga nabatian ko kay Jehova sang mga kasuldadusan, ang Dios sang Israel. 11  Isa ka mensahe batok sa Duma:* May nagapanawag sa akon halin sa Seir:+ “Manugbantay, malawig pa bala ang kagab-ihon? Manugbantay, malawig pa bala ang kagab-ihon?” 12  Ang manugbantay nagsabat: “Manug-aga na, kag maabot man ang gab-i. Kon luyag ninyo magpamangkot, magpamangkot kamo. Pamangkot kamo liwat!” 13  Isa ka mensahe batok sa desyerto nga kapatagan: Mga grupo sang manuglakbay halin sa Dedan nga nagasakay sa kamelyo, Magpaligad kamo sing gab-i sa kagulangan sang desyerto nga kapatagan.+ 14  Magdala kamo sing tubig kag sugataa ninyo ang nauhaw, Mga pumuluyo sang duta sang Tema,+ Magdala kamo sing pagkaon kag sugataa ninyo ang nagapalagyo. 15  Kay nagpinalagyo sila bangod sa nagabot nga espada, Bangod sa nabingat nga pana, kag sa kapintas sang inaway. 16  Kay amo ini ang ginsiling ni Jehova sa akon: “Sa sulod sang isa ka tuig, kaangay sang kalawigon sang pagtrabaho sang ginasuhulan nga manugpangabudlay,* madula ang kadungganan sang Kedar.+ 17  Diutay na lang ang mabilin nga mga manugpana sa hangaway sang Kedar, kay si Jehova nga Dios sang Israel ang nagsiling sini.”

Footnote

Mahimo nga nagapatuhoy sa rehiyon sang dumaan nga Babilonia.
Sa literal, “nga ang akon balikawang puno sang kasakit.”
Ukon “butangi sing lana.”
Sa literal, “anak.”
Buot silingon, “Kalinong.”
Ukon “nga gin-isip sing maayo subong sang ginahimo sang ginsuhulan nga manugpangabudlay”; eksakto nga isa ka tuig.