Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Isaias 13:1-22

BALAYAN SANG KAUNDAN

  • Mensahe batok sa Babilonia (1-22)

    • Adlaw ni Jehova malapit na! (6)

    • Media lutuson ang Babilonia (17)

    • Babilonia indi na pag-istaran (20)

13  Isa ka mensahe batok sa Babilonia+ nga nakita ni Isaias+ nga anak ni Amoz sa palanan-awon:   “Magpatindog kamo sing palatandaan*+ sa batuhon nga bukid. Tawga sila kag sinyasi, Agod magsulod sila sa puertahan sang mga dungganon.   Naghatag ako sing mando sa akon mga gintangdo.*+ Gintawag ko ang akon mga hangaway agod ipabutyag ang akon kaakig, Ang akon mga hangaway nga nagakasadya sing tuman.   Pamatii! Isa ka ginahod sa mga bukid; Nga subong sang madamo nga katawhan! Pamatii! Isa ka ginahod sang mga ginharian, Sang nagtingob nga mga pungsod!+ Si Jehova sang mga kasuldadusan nagatipon sang mga hangaway para sa inaway.+   Halin sila sa malayo nga duta,+ Halin sa pinakamalayo nga bahin sang kalangitan, Si Jehova kag ang mga hinganiban sang iya kaakig, Sa paglaglag sa bug-os nga duta.+   Maghaya kamo, kay ang adlaw ni Jehova malapit na! Sa sina nga adlaw laglagon sang Labing Gamhanan ang tanan nga butang sa inyo duta.+   Amo kon ngaa ang tanan nga kamot magaluya, Kag ang tagipusuon sang mga tawo magakahadlok.+   Ang katawhan magasalasala.+ Magabatyag sila sing kalisang kag kasakit, Kaangay sang isa ka babayi nga manugbata. Magatinulukay sila sa kahadlok, Ang ila nawong magapalamula sa kahuya.   Tan-awa! Ang adlaw ni Jehova magaabot, Nga may mabangis nga kapintas kag nagadabdab nga kaakig, Agod himuon ang duta nga makahaladlok,+ Kag laglagon ang mga makasasala sa duta. 10  Kay ang mga bituon sang kalangitan kag ang mga konstelasyon sini*+ Indi na maghatag sing kasanag; Ang adlaw magadulom sa pagbutlak sini, Kag ang bulan indi na maghatag sing kasanag. 11  Silutan ko ang duta bangod sang kalainan sini,+ Kag ang mga malauton bangod sang ila kasaypanan. Tapuson ko ang pagpabugal sang mga matinaastaason, Kag pauntaton ang pagpahambog sang mga mapiguson.+ 12  Himuon ko ang tawo nga malaka pa sa puro nga bulawan,+ Kag ang tawo nga malaka pa sa bulawan sang Ofir.+ 13  Amo kon ngaa pakurugon ko ang langit, Kag ang duta magatay-ug sa nahamtangan sini+ Sa kasingkal ni Jehova sang mga kasuldadusan sa adlaw sang iya nagadabdab nga kaakig. 14  Kaangay sang gasela nga ginalagas kag kaangay sang panong nga wala sing manugbantay, Ang tagsa magabalik sa iya kaugalingon nga katawhan; Ang tagsa magapalagyo pakadto sa iya kaugalingon nga duta.+ 15  Ang tanan nga makita bun-on, Kag ang tanan nga madakpan mapatay sa espada.+ 16  Ang ila mga anak dugmukon sa atubangan nila,+ Ang tanan nga pagkabutang sa ila mga balay kuhaon, Kag ang ila mga asawa luguson. 17  Sugyuton ko ang mga Medianhon nga salakayon sila.+ Ang mga Medianhon wala nagasapak sa pilak Kag wala nalipay sa bulawan. 18  Ang ila mga pana magadugmok sa mga pamatan-on nga lalaki;+ Indi nila pagkaluy-an ang bunga sang tiyan Ukon ang mga kabataan. 19  Kag ang Babilonia, ang pinakamahimayaon sa* mga ginharian,+ Ang katahom kag bugal sang mga Caldeanhon,+ Mangin subong sang ginlaglag sang Dios ang Sodoma kag Gomorra.+ 20  Indi na sia pag-istaran, Ukon pagpuy-an sa wala sing katubtuban.+ Wala sang Arabianhon nga magapatindog sang tolda didto, Kag wala sang mga manugbantay nga magapaluko sang ila panong didto. 21  Ang mga sapat sang desyerto magaluko didto; Ang ila mga balay mapuno sang mga bukaw. Ang mga ostrits magaistar didto,+ Kag ang ilahas nga mga kanding* magaluksolukso didto. 22  Ang mga sapat magauwang sa iya mga torre, Kag ang mga ido nga talunon sa iya matahom nga mga palasyo. Ang iya tion malapit na, kag indi na sia magdugay.”+

Footnote

Ukon “hayahay.”
Sa literal, “ginpakabalaan.”
Sa literal, “kag ang mga Kesil sini,” ayhan nagapatuhoy sa Orion kag sa palibot nga mga konstelasyon.
Ukon “ang dekorasyon sang.”
Ukon mahimo, “ang daw kanding nga mga demonyo.”