Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Hukom 4:1-24

BALAYAN SANG KAUNDAN

  • Israel ginpigos ni Hari Jabin (1-3)

  • Si Manalagna Debora kag si Hukom Barak (4-16)

  • Si Sisera ginpatay ni Jael (17-24)

4  Apang sang patay na si Ehud, naghimo liwat ang mga Israelinhon sing malain sa panulok ni Jehova.+  Gani gintugyan* sila ni Jehova kay Jabin nga hari sang Canaan+ kag nagagahom sa Hazor. Ang pangulo sang iya mga soldado amo si Sisera, nga nagaistar sa Haroset-hagoyim.*+  Ang mga Israelinhon nagpanawag kay Jehova,+ bangod si Jabin* may 900 ka kangga sa inaway nga ang mga ruweda sini may nagalabaw nga matalom nga mga salsalon,*+ kag ginpigos niya kag ginpintasan ang mga Israelinhon+ sa sulod sang 20 ka tuig.  Si Debora nga isa ka manalagna+ kag asawa ni Lapidot amo ang hukom sadto nga tion sa Israel.  Nagapungko sia sa idalom sang kahoy nga palma ni Debora sa ulot sang Rama+ kag Betel+ sa kabukiran sang Efraim. Ang mga Israelinhon nagakadto sa iya agod mahibaluan kon ano ang desisyon sang Dios.  Nagpadala sia sing mensahe kag ginpatawag si Barak+ nga anak ni Abinoam sa Kedes-neptali,+ kag nagsiling sia sa iya: “Indi bala nagsugo si Jehova nga Dios sang Israel? ‘Magkadto ka sa Bukid Tabor upod ang 10,000 ka lalaki halin sa tribo ni Neptali kag ni Zebulon.  Dalhon ko sa imo sa sapa* sang Kison+ si Sisera nga pangulo sang mga soldado ni Jabin kag ang iya mga kangga sa inaway kag ang iya mga soldado, kag itugyan ko sia sa imo.’ ”+  Gani nagsiling si Barak sa iya: “Kon mag-upod ka sa akon, malakat ako, apang kon indi ka mag-upod sa akon, indi ako maglakat.”  Kag nagsiling sia: “Magaupod ako sa imo. Apang, ang himaya indi mangin imo, kay itugyan ni Jehova si Sisera sa isa ka babayi.”+ Dayon nag-upod si Debora kay Barak sa Kedes.+ 10  Ginpatawag ni Barak si Zebulon kag si Neptali+ sa Kedes, kag 10,000 ka lalaki ang nag-upod sa iya. Nag-upod man sa iya si Debora. 11  Apang si Heber nga Kenhanon nagbulag sa mga Kenhanon+ nga mga kaliwat ni Hobab, nga ugangan ni Moises,+ kag nagpatindog sia sang iya tolda malapit sa daku nga kahoy sa Zaananim sa Kedes. 12  Ginsugid nila kay Sisera nga si Barak nga anak ni Abinoam nagtaklad sa Bukid Tabor.+ 13  Gintipon dayon ni Sisera ang tanan niya nga kangga sa inaway, ang 900 ka kangga nga ang mga ruweda sini may nagalabaw nga matalom nga mga salsalon,* kag ang tanan niya nga soldado. Halin sa Haroset-hagoyim, nagkadto sila sa sapa* sang Kison.+ 14  Nagsiling si Debora kay Barak: “Maglakat ka na, kay amo ini ang adlaw nga itugyan ni Jehova sa imo si Sisera. Indi bala nga si Jehova nagauna sa imo?” Kag nagdulhog si Barak halin sa Bukid Tabor upod ang 10,000 ka lalaki. 15  Dayon ginpasalasala ni Jehova+ si Sisera kag ang tanan niya nga kangga sa inaway kag ang tanan niya nga soldado, gani ginlaglag sila ni Barak paagi sa espada. Sang ulihi, nagpanaug si Sisera sa kangga kag nagpalagyo. 16  Ginlagas ni Barak ang mga kangga sa inaway kag ang mga soldado tubtob sa Haroset-hagoyim. Gani ang tanan nga soldado ni Sisera napatay paagi sa espada. Wala sing bisan isa nga nabilin.+ 17  Apang nagpalagyo si Sisera pakadto sa tolda ni Jael+ nga asawa ni Heber+ nga Kenhanon, kay may paghidait sa ulot ni Jabin+ nga hari sang Hazor kag sang panimalay ni Heber nga Kenhanon. 18  Naggua si Jael agod sugataon si Sisera kag nagsiling sia sa iya: “Dali diri, ginuo ko, sulod ka. Indi ka mahadlok.” Gani nagsulod sia sa tolda. Dayon ginhabulan niya sia. 19  Nagsiling sia sa iya: “Ginauhaw ako, palihug hatagi ako sing tubig.” Gani ginbuksan niya ang panit nga suludlan sang gatas kag ginpainom sia,+ kag ginhabulan niya sia liwat. 20  Nagsiling sia sa iya: “Magtindog ka sa puertahan sang tolda, kag kon may mag-abot kag mamangkot sa imo, ‘May iban pa bala nga tawo diri?’ sabton mo nga ‘Wala!’ ” 21  Apang si Jael nga asawa ni Heber nagkuha sing palpal sang tolda kag sing martilyo. Samtang nagakatulog si Sisera kag kapoy, hinayhinay sia nga nagpalapit sa iya kag ginpalpal sa iya mga dungandungan ang palpal kag naglapos ini kag nagdulot sa duta. Gani napatay sia.+ 22  Kag nag-abot si Barak nga nagalagas kay Sisera. Naggua si Jael agod sugataon sia kag nagsiling sia sa iya: “Dali ka, ipakita ko sa imo ang tawo nga ginapangita mo.” Gani nagsulod sia sa iya tolda, kag nakita niya si Sisera nga nagahamyang nga patay na kag may palpal nga nagalapos sa iya mga dungandungan. 23  Sadto nga adlaw, ginpadaug sang Dios ang mga Israelinhon batok kay Jabin nga hari sang Canaan.+ 24  Kag ang mga Israelinhon padayon nga nagpakig-away kag nagdaug batok sa mga Canaanhon,+ tubtob nalaglag nila si Jabin nga hari sang Canaan.+

Footnote

Sa literal, “ginbaligya.”
Ukon “Haroset sang mga pungsod.”
Sa literal, “sia.”
Sa literal, “kangga nga salsalon.”
Ukon “nalupyakan.” Tan-awa ang Glossary.
Sa literal, “kangga nga salsalon.”
Ukon “nalupyakan.” Tan-awa ang Glossary.