Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Hukom 21:1-25

BALAYAN SANG KAUNDAN

  • Benjamin naluwas subong tribo (1-25)

21  Ang mga lalaki sang Israel nagpanumpa sa Mizpa:+ “Indi naton pag-ipaasawa ang aton mga anak nga babayi sa mga Benjaminhon.”+  Gani, nagkadto ang mga Israelinhon sa Betel+ kag nagpungko didto sa atubangan sang matuod nga Dios tubtob maggab-i, kag nagahibi sila sing mabaskog.  Nagsiling sila: “O Jehova nga Dios sang Israel, ngaa natabo ini sa Israel? Ngaa wala na subong ang isa ka tribo sang Israel?”  Pagkadason nga adlaw, nagbangon sing temprano pa ang katawhan kag naghimo sila didto sing halaran agod maghalad sing mga dulot nga sinunog kag mga dulot sa pag-ambitanay.+  Dayon nagsiling ang katawhan sang Israel: “Sin-o sa tanan nga tribo sang Israel ang wala magtipon sa atubangan ni Jehova didto sa Mizpa?” kay nagpanumpa sila nga patyon ang bisan sin-o nga wala magkadto sa atubangan ni Jehova sa Mizpa.  Gani ginsubuan gid ang katawhan sang Israel tungod sa natabo sa mga Benjaminhon nga ila mga utod. Nagsiling sila: “Nabuhinan subong sang isa ka tribo ang Israel.  Ano ang himuon naton agod makapangasawa ang mga nabilin, bangod nagpanumpa na kita kay Jehova+ nga indi naton pag-ipaasawa sa ila ang aton mga anak nga babayi?”+  Nagpamangkot sila: “Sin-o sa mga tribo sang Israel ang wala magkadto sa atubangan ni Jehova sa Mizpa?”+ Wala sing bisan isa halin sa Jabes-gilead ang nagkadto sang nagtipon didto ang katawhan.  Sang gin-isip ang katawhan, nakita nila nga wala sing bisan isa didto nga pumuluyo sang Jabes-gilead. 10  Gani nagpadala didto ang katilingban sang Israel sing 12,000 ka isganan nga lalaki. Ginsugo nila sila: “Lakat kamo kag pamatya ninyo paagi sa espada ang mga pumuluyo sang Jabes-gilead, bisan ang mga babayi kag mga bata.+ 11  Amo ini ang himuon ninyo: Patyon ninyo ang tanan nga lalaki kag ang tanan nga babayi nga nakahulid na sa lalaki.” 12  Nakakita sila sa mga pumuluyo sang Jabes-gilead sing 400 ka birhen nga babayi nga wala pa makahulid sa lalaki. Gani gindala nila sila sa kampo sa Shilo,+ sa duta sang Canaan. 13  Dayon ang bug-os nga katilingban sang Israel nagpadala sing mensahe sa mga Benjaminhon didto sa daku nga bato sang Rimon+ kag nagpakighidait sila sa ila. 14  Gani nagbalik ang mga Benjaminhon sa ila duta sadto nga tion. Ginhatag nila sa ila ang mga babayi nga wala ginpatay sa Jabes-gilead,+ apang kulang gihapon ang mga babayi para sa ila. 15  Ginsubuan gid ang mga Israelinhon sa natabo kay Benjamin+ bangod ginbulag sia ni Jehova sa iban nga mga tribo sang Israel. 16  Nagsiling ang mga gulang sang katilingban: “Ano ang himuon naton agod makapangasawa ang mga lalaki nga nabilin, kay ginpamatay ang tanan nga babayi sang mga Benjaminhon?” 17  Nagsabat sila: “Dapat may palanublion ang mga nabilin nga Benjaminhon, agod indi madula ang isa ka tribo sang Israel. 18  Apang indi naton mapaasawa sa ila ang aton mga anak nga babayi, bangod nakapanumpa na ang katawhan sang Israel: ‘Pakamalauton ang tawo nga maghatag sing asawa sa mga Benjaminhon.’ ”+ 19  Dayon nagsiling sila: “May kapiestahan para kay Jehova kada tuig sa Shilo,+ nga yara sa aminhan sang Betel kag sa sidlangan sang dalan halin sa Betel pakadto sa Siquem kag sa bagatnan sang Lebona.” 20  Gani ginsugo nila ang mga lalaki nga Benjaminhon: “Lakat kamo kag magpanago sa mga ulubasan. 21  Kon makita ninyo ang lamharon nga mga babayi* sang Shilo nga naggua agod magsaot, maggua kamo sa ulubasan kag masigdakop kamo sang inyo pangasaw-on nga babayi halin sa Shilo. Dayon magpauli kamo sa duta sang Benjamin. 22  Kon magreklamo batok sa amon ang ila mga amay kag mga utod, silingan namon sila, ‘Palihug mangin mahinangpanon kamo, bangod kulang ang mga babayi nga nabihag sa inaway agod mapangasawa nila.+ Wala ninyo ginlapas ang aton ginpanumpa kay wala man ninyo sila ginhatag sing kinabubut-on.’ ”+ 23  Gani ginhimo ini sang mga lalaki nga Benjaminhon, kag ang kada isa sa ila nagkuha sing asawa halin sa mga babayi nga nagasaot. Pagkatapos sini, nagbalik sila sa ila ginpanubli nga duta kag gintukod nila liwat ang ila mga siudad+ kag nag-istar sila sa sini. 24  Sadto nga tion, nagpauli man ang mga Israelinhon sa ila kaugalingon nga tribo kag pamilya. Halin didto, nagbalik ang kada isa sa iya ginpanubli nga duta. 25  Sadto nga mga adlaw wala sing hari sa Israel.+ Ginahimo sang kada isa kon ano ang sa banta niya nga husto.*

Footnote

Sa literal, “ang mga anak nga babayi.”
Ukon “kon ano ang husto sa iya panulok.”