Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Hukom 2:1-23

BALAYAN SANG KAUNDAN

  • Paandam sang anghel ni Jehova (1-5)

  • Kamatayon ni Josue (6-10)

  • Mga hukom sa pagluwas sa Israel (11-23)

2  Dayon halin sa Gilgal,+ ang anghel ni Jehova+ nagkadto sa Boquim kag nagsiling: “Ginpagua ko kamo sa Egipto kag gindala ko kamo sa duta nga ginpanumpa ko nga ihatag sa inyo mga katigulangan.+ Nagsiling pa ako, ‘Indi ko gid paglapason ang akon katipan sa inyo.+  Indi kamo dapat magpakigkatipan sa mga pumuluyo sini nga duta+ kag dapat gub-on ninyo ang ila mga halaran.’+ Apang wala ninyo ako gintuman.+ Ngaa ginhimo ninyo ini?  Gani nagsiling man ako, ‘Indi ko sila pagtabugon sa inyo atubangan,+ kag mangin siod sila sa inyo,+ kag mangin paon sa inyo ang ila mga dios.’ ”+  Sang ginhambal ini sang anghel ni Jehova sa tanan nga Israelinhon, naghibi sing mabaskog ang katawhan.  Gani gintawag nila yadto nga duog nga Boquim.* Kag naghalad sila didto kay Jehova.  Sang ginpalakat ni Josue ang katawhan, ang kada isa sa mga Israelinhon nagkadto sa iya ginpanubli nga duta.+  Nag-alagad ang katawhan kay Jehova sa bug-os nga kabuhi ni Josue kag sa bug-os nga kabuhi sang mga gulang nga buhi pa sang patay na si Josue. Nakita sini nga mga gulang ang tanan nga dalagku nga butang nga ginhimo ni Jehova para sa Israel.+  Si Josue nga anak ni Nun kag alagad ni Jehova napatay sa edad nga 110 ka tuig.+  Ginlubong nila sia sa iya ginpanubli nga duta sa Timnat-heres,*+ sa kabukiran sang Efraim sa aminhan sang Bukid Gaas.+ 10  Ining bug-os nga kaliwatan napatay pareho sang ila mga katigulangan, kag nagbulos sa ila ang isa ka kaliwatan nga wala nakakilala kay Jehova ukon nakahibalo sang mga ginhimo niya para sa Israel. 11  Ginhimo sang mga Israelinhon ang malain sa panulok ni Jehova kag nag-alagad* sila sa mga Baal.+ 12  Gintalikdan nila si Jehova, ang Dios sang ila mga amay, nga nagpagua sa ila sa duta sang Egipto.+ Nagsunod sila sa iban nga mga dios, sa mga dios sang katawhan sa palibot nila,+ kag nagyaub sila sa ila, amo nga nasaklaw sa ila si Jehova.+ 13  Gintalikdan nila si Jehova kag nag-alagad sila kay Baal kag sa mga imahen ni Astoret.+ 14  Bangod sini naakig gid si Jehova sa Israel amo nga gintugyan niya sila sa mga tulisan kag ginpanguha nila ang ila mga pagkabutang.+ Gintugyan* niya sila sa ila mga kaaway sa palibot,+ kag napierde sila sang ila mga kaaway.+ 15  Bisan diin sila magkadto sa pagpakig-away, ang kamot ni Jehova batok sa ila kag nagakapierde sila,+ suno sa ginsiling ni Jehova kag suno sa ginpanumpa ni Jehova sa ila,+ kag binudlayan gid sila.+ 16  Gani ginhatagan sila ni Jehova sing mga hukom, kag ginluwas nila sila sa kamot sang mga tulisan.+ 17  Apang wala sila magpamati bisan sa mga hukom, kag nagpakighilawas sila sa iban nga mga dios kag nagyaub sa ila. Nagsipak sila sa dalanon nga ginlaktan sang ila mga katigulangan nga nagtuman sa mga sugo ni Jehova.+ Indi sila pareho sa ila mga katigulangan. 18  Kon ginahatagan sila ni Jehova sing mga hukom,+ ginabuligan ni Jehova ang tagsa ka hukom kag ginaluwas niya sila sa ila mga kaaway samtang buhi ang hukom; kay naluoy* si Jehova+ sa ila pag-ugayong bangod sang pagpigos+ kag pagpamintas sa ila. 19  Apang kon mapatay gani ang hukom, ginahimo nila liwat ang mas malain pa sa ginhimo sang ila mga amay nga amo ang pag-alagad kag pagyaub sa iban nga mga dios.+ Wala nila gin-untatan ang ila ginhimo kag ang ila pagkabatinggilan. 20  Sang ulihi, naakig gid si Jehova sa Israel,+ kag nagsiling sia: “Bangod ginlapas sini nga pungsod ang akon katipan+ nga ginsugo ko sa ila mga katigulangan kag wala sila magtuman sa akon,+ 21  indi ko na pagtabugon sa ila atubangan ang bisan isa sa mga pungsod nga wala masakop ni Josue sang napatay sia.+ 22  Isa ini ka pagtilaw kon bala sundon sang Israel ang dalanon ni Jehova+ paagi sa paglakat sa sini pareho sang ginhimo sang ila mga amay.” 23  Gani gintugutan ni Jehova nga magpabilin ini nga mga pungsod. Wala niya sila gintabog dayon, kag wala niya sila gintugyan kay Josue.

Footnote

Buot silingon, “Mga Nagahibi.”
“Timnat-sera” sa Jos 19:50 kag 24:30.
Ukon “nagsimba.”
Sa literal, “Ginbaligya.”
Ukon “nagakasubo.”