Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Hukom 17:1-13

BALAYAN SANG KAUNDAN

  • Mga diosdios kag saserdote ni Miqueas (1-13)

17  May isa ka lalaki sa kabukiran sang Efraim+ nga ang iya ngalan si Miqueas.  Nagsiling sia sa iya iloy: “Nabatian ko nga ginpakamalaut mo ang nagkawat sang imo 1,100 ka bilog nga pilak. Yari ini sa akon kay ako ang nagkuha sini.” Nagsiling ang iya iloy: “Kabay pa nga pakamaayuhon ni Jehova ang akon anak.”  Gani ginbalik niya ang 1,100 ka bilog nga pilak sa iya iloy, apang nagsiling ang iya iloy: “Pakabalaanon ko ang pilak kay Jehova para sa akon anak, agod makapahimo ako sing tinigib nga imahen kag metal nga estatwa.*+ Pagkatapos ibalik ko ini sa imo.”  Sang mauli na niya ang pilak sa iya iloy, nagkuha ang iya iloy sing 200 ka bilog nga pilak kag ginhatag ini sa platero. Naghimo sia sing tinigib nga imahen kag metal nga estatwa;* kag ginbutang ini sa balay ni Miqueas.  Si Miqueas may isa ka balay sang mga dios, kag naghimo sia sing efod+ kag sing terapim nga mga estatwa*+ kag gin-ordenahan ang* isa sang iya mga anak agod mag-alagad bilang saserdote niya.+  Sadto nga mga adlaw, wala sing hari sa Israel.+ Ginahimo sang kada isa kon ano ang sa banta niya nga husto.*+  May isa ka pamatan-on nga lalaki sa Betlehem+ sa Juda nga halin sa pamilya ni Juda. Isa sia ka Levinhon+ nga nagaistar didto sa sulod sang pila ka tion.  Halin sa Betlehem sa Juda, naglakat ini nga lalaki agod mangita sing lugar nga maistaran niya. Sa iya paglakat, nakalab-ot sia sa balay ni Miqueas sa kabukiran sang Efraim.+  Dayon ginpamangkot sia ni Miqueas: “Taga-diin ka?” Nagsabat sia: “Isa ako ka Levinhon nga taga-Betlehem sa Juda kag nagapangita ako sing lugar nga maistaran ko.” 10  Gani nagsiling si Miqueas sa iya: “Diri ka na lang mag-istar sa akon kag himuon ko ikaw nga akon manuglaygay* kag saserdote. Hatagan ko ikaw sing napulo ka bilog nga pilak kada tuig kag sing kinahanglanon nga mga panapton kag sing pagkaon.” Nagpasugot ang Levinhon. 11  Gani nag-istar ang Levinhon upod kay Miqueas, kag ginkabig niya ining pamatan-on nga lalaki nga daw isa sang iya mga anak. 12  Gin-ordenahan man ni Miqueas ang Levinhon agod mag-alagad sia bilang saserdote para sa iya,+ kag nag-istar sia sa balay ni Miqueas. 13  Dayon nagsiling si Miqueas: “Karon nahibaluan ko nga pakamaayuhon ako ni Jehova, kay nag-alagad sa akon ang Levinhon bilang saserdote.”

Footnote

Ukon “hinurma nga estatwa.”
Ukon “hinurma nga estatwa.”
Ukon “mga dios sang isa ka panimalay; mga diosdios.”
Sa literal, “ginpuno ang kamot sang.”
Ukon “kon ano ang husto sa iya panulok.”
Sa literal, “amay.”