Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Hukom 13:1-25

BALAYAN SANG KAUNDAN

  • Anghel nagpakita kay Manoa kag sa iya asawa (1-23)

  • Nabun-ag si Samson (24, 25)

13  Naghimo liwat sing malain ang mga Israelinhon sa panulok ni Jehova,+ gani gintugyan sila ni Jehova sa mga Filistinhon+ sa sulod sang 40 ka tuig.  Sa sina nga tion, si Manoa+ nga taga-Zora+ kag halin sa pamilya sang mga Danhanon+ wala sing anak, kay baw-as ang iya asawa.+  Sang ulihi, nagpakita ang anghel ni Jehova sa iya asawa kag nagsiling sia: “Bisan pa baw-as ka kag wala makapamata, magabusong ka kag magabun-ag sing lalaki.+  Indi ka gid mag-inom sing alak ukon sing makahulubog nga ilimnon,+ kag indi ka magkaon sing bisan ano nga indi matinlo.+  Magabusong ka kag magabun-ag sing lalaki, kag indi gid pag-utdan ang iya buhok,+ bangod ang bata mangin Nazareo* sang Dios halin sa iya pagkabun-ag;* kag sia ang magaluwas sa Israel batok sa mga Filistinhon.”+  Ginsugid niya ini dayon sa iya bana: “Nagpakita sa akon ang isa ka alagad sang matuod nga Dios. Makahalawhaw ang iya dagway nga daw anghel sang matuod nga Dios. Wala ko sia ginpamangkot kon diin sia halin, kag wala man niya ginsugid sa akon ang iya ngalan.+  Apang nagsiling sia sa akon, ‘Magabusong ka kag magabun-ag sing lalaki. Indi ka mag-inom sing alak ukon sing makahulubog nga ilimnon, kag indi ka magkaon sing bisan ano nga indi matinlo, bangod ang bata mangin Nazareo sang Dios halin sa pagkabun-ag* tubtob sa adlaw nga mapatay sia.’ ”  Nagpangabay si Manoa kay Jehova: “O Jehova, palihug pabalika ang alagad sang matuod nga Dios nga ginpadala mo agod matudluan kami kon paano padakuon ang mabun-ag nga bata.”  Ginpamatian sang matuod nga Dios si Manoa, kag nagpakita liwat ang anghel sang matuod nga Dios sa iya asawa. Nagapungko sia sadto sa latagon, apang indi niya kaupod si Manoa nga iya bana. 10  Nagdalagan sia dayon sa iya bana kag nagsiling sia sa iya: “Nagpakita liwat sa akon ang lalaki nga nagkadto sa akon sang isa ka adlaw.”+ 11  Gani naglakat si Manoa upod sa iya asawa kag nagkadto sila sa lalaki. Ginpamangkot niya ang lalaki: “Ikaw bala ang nagpakighambal sa akon asawa?” Nagsabat sia: “Huo.” 12  Dayon nagsiling si Manoa: “Kabay pa nga matuman ang imo ginsiling. Ano ang mangin kabuhi sang bata, kag ano ang iya himuon?”+ 13  Nagsiling ang anghel ni Jehova kay Manoa: “Dapat likawan sang imo asawa ang tanan nga ginsiling ko sa iya.+ 14  Indi sia dapat magkaon sing bisan ano nga halin sa ubas, indi sia dapat mag-inom sing alak ukon sing makahulubog nga ilimnon,+ kag indi sia dapat magkaon sing bisan ano nga indi matinlo.+ Dapat niya tumanon ang tanan nga ginsugo ko sa iya.” 15  Nagsiling si Manoa sa anghel ni Jehova: “Palihug, indi ka anay maglakat kay maihaw kami sing tinday nga kanding para sa imo.”+ 16  Apang nagsiling ang anghel ni Jehova kay Manoa: “Bisan pa magpabilin ako, indi ko man gihapon pagkaunon ang imo ihanda nga pagkaon. Apang mahimo ka maghalad sing dulot nga sinunog para kay Jehova.” Wala makahibalo si Manoa nga anghel sia ni Jehova. 17  Dayon nagsiling si Manoa sa anghel ni Jehova: “Ano ang imo ngalan,+ agod mapadunggan ka namon kon matuman na ang imo ginsiling?” 18  Apang, nagsiling sa iya ang anghel ni Jehova: “Indi ka magpamangkot tuhoy sa akon ngalan, kay tumalagsahon ini!” 19  Dayon ginkuha ni Manoa ang tinday nga kanding kag ang dulot nga uyas kag ginhalad niya ini sa ibabaw sang bato para kay Jehova. Kag naghimo Sia sing makatilingala nga butang samtang nagatan-aw si Manoa kag ang iya asawa. 20  Sang magpaibabaw ang kalayo halin sa halaran pakadto sa langit, nagpaibabaw man ang anghel ni Jehova upod sa kalayo samtang nagatan-aw si Manoa kag ang iya asawa. Kag nagluhod sila dayon kag nagduko. 21  Wala na magpakita liwat ang anghel ni Jehova kay Manoa kag sa iya asawa. Didto narealisar ni Manoa nga anghel gali sia ni Jehova.+ 22  Dayon nagsiling si Manoa sa iya asawa: “Mapatay gid kita sini, kay nakita naton ang Dios.”+ 23  Apang nagsiling ang iya asawa: “Kon luyag ni Jehova nga patyon kita, wala na niya kuntani ginbaton ang aton dulot nga sinunog+ kag dulot nga uyas, wala na niya kuntani ginpakita sa aton ining tanan nga butang, kag wala na niya kuntani ginsugid ini sa aton.” 24  Kag nagbun-ag ang asawa ni Manoa sing lalaki kag ginhingalanan sia nga Samson.+ Samtang nagadaku ang bata, ginapakamaayo sia ni Jehova. 25  Sang ulihi, ang espiritu ni Jehova nagsugod sa pagpahulag sa iya+ sang didto sia sa Mahane-dan+ sa ulot sang Zora kag Estaol.+

Footnote

Buot silingon, “isa nga gindedikar; isa nga ginpain.”
Sa literal, “halin sa taguangkan.”
Sa literal, “halin sa taguangkan.”