Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Hukom 10:1-18

BALAYAN SANG KAUNDAN

  • Si Hukom Tola kag si Hukom Jair (1-5)

  • Israel nagrebelde kag naghinulsol (6-16)

  • Mga Ammonhon nagkampo batok sa Israel (17, 18)

10  Pagkatapos ni Abimelec, si Tola nga halin sa tribo ni Isacar amo ang nagluwas sa Israel.+ Nagaistar sia sa Samir sa kabukiran sang Efraim, kag anak sia ni Pua, nga anak ni Dodo.  Naghukom sia sa Israel sa sulod sang 23 ka tuig. Sang napatay sia, ginlubong sia sa Samir.  Pagkatapos niya, si Jair nga Gileadnon amo ang naghukom sa Israel sa sulod sang 22 ka tuig.  May 30 sia ka anak nga lalaki nga nagasakay sa 30 ka asno. May 30 sila ka siudad sa duta sang Gilead nga ginatawag nila nga Havot-jair+ tubtob sini nga adlaw.  Sang napatay si Jair, ginlubong sia sa Kamon.  Naghimo liwat sing malain ang mga Israelinhon sa panulok ni Jehova,+ kag nag-alagad sila sa mga Baal,+ sa mga imahen ni Astoret, sa mga dios sang Aram,* sa mga dios sang Sidon, sa mga dios sang Moab,+ sa mga dios sang mga Ammonhon,+ kag sa mga dios sang mga Filistinhon.+ Gintalikdan nila si Jehova kag wala na sila mag-alagad sa iya.  Dayon naakig gid si Jehova sa Israel, kag gintugyan* niya sila sa mga Filistinhon kag sa mga Ammonhon.+  Gani sugod sadto nga tuig, ginpabudlayan gid nila kag ginpigos ang mga Israelinhon. Sa sulod sang 18 ka tuig, ginpigos nila ang tanan nga Israelinhon nga nagaistar sa bahin sang Jordan sa duta sang mga Amornon sa Gilead.  Nagatabok man ang mga Ammonhon sa Jordan agod magpakig-away sa tribo ni Juda, ni Benjamin, kag ni Efraim; kag nagkalisod gid ang Israel. 10  Gani nagpangayo sing bulig kay Jehova ang mga Israelinhon:+ “Nakasala kami sa imo, kay gintalikdan ka namon nga amon Dios, kag nag-alagad kami sa mga Baal.”+ 11  Apang nagsiling si Jehova sa mga Israelinhon: “Indi bala nga ginluwas ko kamo sa Egipto+ kag sa mga Amornon,+ sa mga Ammonhon, sa mga Filistinhon,+ 12  sa mga Sidonhon, sa Amalek, kag sa Midian, sang ginpigos nila kamo? Sang mangayo kamo sing bulig sa akon, ginluwas ko kamo sa ila. 13  Apang gintalikdan ninyo ako kag nag-alagad kamo sa iban nga mga dios.+ Gani indi ko na kamo pagluwason pa.+ 14  Magpangayo kamo sing bulig sa mga dios nga ginpili ninyo.+ Sila ang paluwasa sa inyo sa tion sang inyo kabudlayan.”+ 15  Apang ang mga Israelinhon nagsiling kay Jehova: “Nakasala kami. Himua sa amon kon ano ang luyag mo himuon. Apang, palihug luwasa kami sini nga adlaw.” 16  Kag ginsikway nila ang iban nga mga dios sa tunga nila kag nag-alagad sila kay Jehova,+ amo nga indi na niya mabatas ang* pag-antos sang Israel.+ 17  Sang ulihi, nagtipon ang mga Ammonhon+ kag nagkampo sila sa Gilead. Gani nagtipon man ang mga Israelinhon kag nagkampo sila sa Mizpa. 18  Ang katawhan kag ang mga pangulo sang Gilead nagsinilingay: “Sin-o ang manguna sa aton sa pagpakig-away sa mga Ammonhon?+ Sia ang mangin pangulo sang tanan nga pumuluyo sang Gilead.”

Footnote

Ukon “Siria.”
Sa literal, “ginbaligya.”
Ukon “amo nga ang iya kalag indi na makaagwanta sa.”