Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Hageo 2:1-23

BALAYAN SANG KAUNDAN

  • Ang ikaduha nga templo mapuno sang himaya (1-9)

    • Tanan nga pungsod uyugon (7)

    • Masulod ang malahalon nga mga butang sang pungsod (7)

  • Pagpakamaayo sa pagpatindog liwat sang templo (10-19)

    • Pagkabalaan indi maglaton (10-14)

  • Mensahe kay Zorobabel (20-23)

    • “Himuon ko ikaw nga pangselyo nga singsing” (23)

2  Sang ika-21 nga adlaw sang ikapito nga bulan, may mensahe si Jehova kay Hageo+ nga manalagna, nga nagasiling,  “Palihug pamangkuta ang gobernador sang Juda+ nga si Zorobabel+ nga anak ni Sealtiel kag ang mataas nga saserdote nga si Josue+ nga anak ni Jehozadak,+ kag ang tanan nga katawhan nga nagbalik halin sa pagkabihag:  ‘Sin-o sa inyo ang nakakita anay sang himaya sini nga balay?*+ Ano ang pagtan-aw ninyo sa sini subong? Indi bala nga wala gid ini kon ipaanggid sa himaya sini sadto?’+  “‘Apang magpakabakod ka, Zorobabel,’ siling ni Jehova, ‘kag magpakabakod ka, Josue nga mataas nga saserdote nga anak ni Jehozadak.’ “‘Kag magpakabakod kamo tanan nga katawhan sini nga duta,’+ siling ni Jehova, ‘kag mag-obra na kamo.’ “‘Kay kaupod ninyo ako,’+ siling ni Jehova sang mga kasuldadusan.  ‘Dumduma ang ginsaad ko sa inyo sang naggua kamo sa Egipto,+ kag sang nagpabilin sa tunga ninyo ang akon espiritu.*+ Indi kamo magkahadlok.’”+  “Kay amo ini ang ginasiling ni Jehova sang mga kasuldadusan, ‘Sa liwat—sa indi madugay—uyugon ko ang langit kag ang duta kag ang dagat kag ang mamala nga duta.’+  “‘Uyugon ko ang tanan nga pungsod, kag magasulod ang malahalon* nga mga butang sang tanan nga pungsod;+ kag pun-on ko sing himaya ini nga balay,’+ siling ni Jehova sang mga kasuldadusan.  “‘Ang pilak akon, kag ang bulawan akon,’ siling ni Jehova sang mga kasuldadusan.  “‘Ang palaabuton nga himaya sini nga balay mas daku sangsa una,’+ siling ni Jehova sang mga kasuldadusan. “‘Kag hatagan ko sing paghidait ini nga lugar,’+ siling ni Jehova sang mga kasuldadusan.” 10  Sang ika-24 nga adlaw sang ikasiam nga bulan, sang ikaduha nga tuig sang paghari ni Dario, may mensahe si Jehova kay Hageo+ nga manalagna, nga nagasiling: 11  “Amo ini ang ginasiling ni Jehova sang mga kasuldadusan, ‘Palihug pamangkuta ang mga saserdote tuhoy sa kasuguan:+ 12  “Kon ang isa ka tawo nagadala sing balaan nga karne sa iya bayo, kag makatandog ang iya bayo sa tinapay ukon sa linaga ukon sa alak ukon sa lana ukon sa bisan ano nga pagkaon, mangin balaan bala ini?”’” Nagsabat ang mga saserdote: “Indi!” 13  Dayon nagpamangkot si Hageo: “Kon ang isa nga indi matinlo tungod nakatandog sia sa patay,* makatandog sa bisan diin sini nga butang, mangin indi matinlo bala ini?”+ Nagsabat ang mga saserdote: “Mangin indi matinlo ini.” 14  Gani nagsiling si Hageo: “‘Amo man sina ini nga katawhan, kag amo man sina ini nga pungsod sa akon atubangan,’ siling ni Jehova, ‘kag amo man sina ang tanan nga ginahimo nila; ang bisan ano nga ginahalad nila indi matinlo.’ 15  “‘Apang palihug, sugod sini nga adlaw, binagbinaga ninyo ini:* Sang wala pa masugdan ang pagpatindog liwat sa templo ni Jehova,+ 16  ano ang kahimtangan sadto? Ang isa ka tawo nga nagapaabot nga makakuha sing 20 ka sukob sang uyas, napulo lang ka sukob ang nakuha niya; kag ang isa nga luyag magkuha sing 50 ka sukob sang alak, 20 lang ka sukob ang nakuha niya;+ 17  ginhalitan ko ang tanan nga binuhatan sang inyo mga kamot. Nagpadala ako sa inyo sang pagpanglaya tungod sa mainit nga hangin kag sang peste sa mga pananom+ kag sang yelo, apang wala gid sing bisan isa sa inyo nga nagbalik sa akon,’ siling ni Jehova. 18  “‘Palihug, sugod sini nga adlaw binagbinaga ninyo ini,* sining ika-24 nga adlaw sang ikasiam nga bulan, sang adlaw nga ginpasad ang pundasyon sang templo ni Jehova.+ Binagbinaga ninyo ini: 19  May binhi pa bala sa bodega?*+ Indi bala nga wala pa sing bunga ang ubas, ang kahoy nga higuera, ang kahoy nga granada, kag ang kahoy nga olibo? Sugod sini nga adlaw pakamaayuhon ko kamo.’”+ 20  Sang ika-24 nga adlaw sang bulan,+ may mensahe liwat si Jehova kay Hageo, nga nagasiling: 21  “Isiling mo kay Zorobabel nga gobernador sang Juda, ‘Uyugon ko ang langit kag ang duta.+ 22  Laglagon ko ang mga trono sang mga hari kag dulaon ko ang gahom sang mga ginharian sang mga pungsod.+ Laglagon ko ang mga kangga kag ang mga nagasakay sa sini, kag mapukan ang mga kabayo kag ang mga nagasakay sa sini, kag magapinatyanay sila paagi sa espada.’”+ 23  “‘Sa sina nga adlaw,’ siling ni Jehova sang mga kasuldadusan, ‘gamiton ko ikaw Zorobabel+ nga anak ni Sealtiel+ kag akon alagad,’ siling ni Jehova, ‘kag himuon ko ikaw nga pangselyo nga singsing, bangod ikaw ang ginpili ko,’ siling ni Jehova sang mga kasuldadusan.”

Footnote

Ukon “templo.”
Ukon mahimo, “kag sang nagtindog sa tunga ninyo ang akon espiritu.”
Ukon “kalahamut-an.”
Ukon “tungod sa kalag.” Tan-awa ang Glossary.
Ukon “ipahamtang ang inyo tagipusuon sa sini.”
Ukon “ipahamtang ang inyo tagipusuon sa sini.”
Ukon “buho para sa uyas?”