Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Ezequiel 8:1-18

BALAYAN SANG KAUNDAN

  • Gindala si Ezequiel sa Jerusalem sa palanan-awon (1-4)

  •  Makangilil-ad nga mga butang nga nakita sa templo (5-18)

    • Mga babayi nga nagahibi kay Tammuz (14)

    • Mga lalaki nagasimba sa adlaw (16)

8  Kag sang ikalima nga adlaw sang ikan-om nga bulan sang ikan-om nga tuig, samtang nagapungko kami sang mga gulang sang Juda sa akon balay, nabatyagan ko nga ang gahom sang Soberanong Ginuong Jehova yara sa akon.  Samtang nagatulok ako, nakakita ako sing isa nga daw kaangay sang kalayo; halin sa iya daw hawak paubos may kalayo,+ kag halin sa iya hawak paibabaw ang iya dagway masanag, kaangay sang nagainggat nga metal.*+  Kag gin-untay niya ang daw kaangay sang kamot kag gin-uyatan ako sa buhok, kag gin-alsa ako sang espiritu sa tunga sang duta kag sang langit kag paagi sa palanan-awon halin sa Dios gindala ako sa Jerusalem, sa gawang sang nasulod nga luwang+ nga nagaatubang sa aminhan sang templo, nga may isa ka diosdios* nga nagapaakig gid sa Dios.+  Kag nakita ko ang himaya sang Dios sang Israel,+ kaangay sang nakita ko sa nalupyakan.+  Dayon nagsiling sia sa akon: “Anak sang tawo, palihug magtulok ka sa aminhan.” Gani nagtulok ako sa aminhan, kag nakita ko ining diosdios* sa aminhan sinang gawang sang halaran.  Nagsiling pa sia sa akon: “Anak sang tawo, nakita mo bala ang makangilil-ad nga mga butang nga ginahimo nila, ang mga butang nga ginahimo diri sang panimalay sang Israel+ agod magpalayo ako sa akon santuaryo?+ Apang makakita ka pa sing mas makangilil-ad sangsa sini.”  Dayon gindala niya ako sa gawang sang luwang, kag may nakita ako nga buho sa pader.  Nagsiling sia sa akon: “Anak sang tawo, palihug buhui ang pader.” Gani ginbuhuan ko ang pader, kag may nakita ako nga isa ka gawang.  Nagsiling sia sa akon: “Magsulod ka kag tan-awa ang makangilil-ad nga mga butang nga ginahimo nila diri.” 10  Gani nagsulod ako kag nakita ko nga ang palibot sang pader natigiban sang dagway sang tanan nga sahi sang nagakamang nga sapat kag makangilil-ad nga mga sapat+ kag nakita ko man didto ang tanan nga makangilil-ad nga mga diosdios* sang panimalay sang Israel.+ 11  Kag nagatindog sa atubangan sini ang 70 ka gulang sang panimalay sang Israel, upod si Jaazanias nga anak ni Safan.+ Ang kada isa sa ila may dala nga incensario, kag nagatub-ok ang mahamot nga aso sang incienso.+ 12  Nagsiling sia sa akon: “Anak sang tawo, nakita mo bala ang ginahimo sa kadulom sang mga gulang sang panimalay sang Israel? Ang tagsa sa ila yara sa nasulod nga hulot nga nahamtangan sang iya diosdios. Kay nagasiling sila, ‘Indi kita makita ni Jehova. Ginbiyaan ni Jehova ang duta.’”+ 13  Nagsiling pa gid sia sa akon: “Makakita ka pa sing mas makangilil-ad nga mga butang nga ila ginahimo.” 14  Gani gindala niya ako sa aminhan nga gawang sang balay ni Jehova, kag didto nakita ko ang mga babayi nga nagapungko kag nagahinibi tungod sa dios nga si Tammuz. 15  Kag nagsiling pa sia sa akon: “Anak sang tawo, nakita mo bala ini? Makakita ka pa sing mas makangilil-ad sangsa sini.”+ 16  Gani gindala niya ako sa nasulod nga luwang sang balay ni Jehova.+ Didto sa gawang sang templo ni Jehova, sa tunga sang portiko kag halaran, may mga 25 ka lalaki nga nagatalikod sa templo ni Jehova kag nagaatubang sa sidlangan, kag nagayaub sa adlaw.+ 17  Nagsiling sia sa akon: “Anak sang tawo, nakita mo bala ini? Diutay lang bala nga butang para sa panimalay sang Juda ang ginahimo nila nga makangilil-ad nga mga butang diri? Pun-on man bala nila ang duta sing kasingki+ kag paakigon ako paagi sa pag-untay sing sanga* sa akon ilong? 18  Gani ipakita ko sa ila ang akon kaakig. Indi ako magpakita sing kaluoy ukon pagkamainawaon.+ Bisan pa magpanawag sila sing mabaskog sa akon, indi ko sila pagpamatian.”+

Footnote

Ginsamo nga bulawan kag pilak.
Ukon “imahen.”
Ukon “imahen.”
Ang Hebreo nga termino mahimo nga may kaangtanan sa tinaga para sa “ipot” kag ginagamit sa pagtamay.
Mahimo nga sanga nga gingamit sa pagsimba sa diosdios.