Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Ezequiel 47:1-23

BALAYAN SANG KAUNDAN

  • Sapa nagailig halin sa templo (1-12)

    • Tubig amat-amat nga nagadalom (2-5)

    • Tubig sa dagat magaayo (8-10)

    • Katunggan indi mag-ayo (11)

    • Mga kahoy nga makaon kag makapaayo (12)

  • Mga dulunan sang duta (13-23)

47  Kag gindala niya ako pabalik sa gawang sang templo.+ Didto may nakita ako nga tubig nga nagailig halin sa idalom sang atangan sang templo pakadto sa sidlangan,+ kay ang templo nagaatubang sa sidlangan. Nagailig ini paubos sa natuo nga kilid sang templo, sa bagatnan sang halaran.  Dayon nag-agi kami sa gawang sa aminhan+ kag naglibot kami pagua sa nagua nga gawang nga nagaatubang sa sidlangan.+ Didto nakita ko ang tubig nga nagailig sa natuo nga kilid sang nagua nga gawang sa sidlangan.  Paagi sa iya inugtakus nga pisi,+ ang tawo nagtakus sing 1,000 ka maniko* pakadto sa sidlangan kag ginpaubog niya ako sa tubig; ang tubig tubtob sa akon bukobuko.  Nagpadayon sia sa pagtakus sing 1,000 ka maniko kag ginpaubog niya ako liwat sa tubig. Ang tubig tubtob sa akon mga tuhod. Nagpadayon sia sa pagtakus sing 1,000 ka maniko kag ginpaubog niya ako liwat sa tubig. Ang tubig tubtob sa akon hawak.  Sang nagtakus pa gid sia sing 1,000 ka maniko, ang tubig masulog kag indi ko na maubog kay tuman ini kadalom. Dapat ini languyon.  Ginpamangkot niya ako: “Anak sang tawo, nakita mo bala ini?” Dayon ginpabalik niya ako sa pangpang.  Sang didto na ako, nakita ko sa magtimbang nga kilid sang pangpang ang madamo nga kahoy.+  Dayon nagsiling sia sa akon: “Ini nga tubig nagailig sa nasidlangan nga rehiyon padulhog sa Araba*+ pakadto sa dagat.* Kon yara na ini sa dagat,+ magaayo ang tubig didto.  Mahimo na mabuhi ang mga tinuga* sa bisan diin nga malambutan sining tubig.* Magadamo ang isda bangod magalab-ot ang tubig didto. Magaayo ang tubig sang dagat, kag mahimo na mabuhi ang tanan sa bisan diin nga malab-utan sini. 10  “Ang mga mangingisda magatindog sa higad sang dagat halin sa En-gedi+ tubtob sa En-eglaim, diin may bularan sang mga pukot. Magadamo ang nagkalainlain nga isda sa sini, kaangay sang kadamuon sang isda sa Daku nga Dagat.*+ 11  “Apang ang katunggan kag ang tubigon nga mga duog sini indi mag-ayo. Mangin maasin ini.+ 12  “Sa magtimbang nga pangpang sang kasulgan magatubo ang tanan nga sahi sang nagapamunga nga kahoy nga mahimo kaunon. Ang mga dahon sini indi malaya kag indi ini mag-untat sa pagpamunga. Kada bulan magapamunga ini bangod sang tubig nga nagailig halin sa santuaryo.+ Ang mga bunga sini makaon kag ang mga dahon sini makapaayo.”+ 13  Amo ini ang ginasiling sang Soberanong Ginuong Jehova: “Amo ini ang duta nga bahinbahinon ninyo subong palanublion sang 12 ka tribo sang Israel. Duha ka bahin ang ihatag ninyo kay Jose.+ 14  Panublion ninyo ini, kag ang kada isa pareho ang bahin.* Ini nga duta ginpanumpa ko nga ihatag sa inyo mga katigulangan;+ kag karon ginhatag* na ini sa inyo subong palanublion. 15  “Amo ini ang dulunan sang duta sa naaminhan: Halin sa Daku nga Dagat pakadto sa Hetlon,+ sa Zedad,+ 16  sa Hamat,+ sa Berota,+ sa Sibraim, nga yara sa tunga sang duta nga sakop sang Damasco kag sang Hamat, tubtob sa Hazer-haticon, nga yara sa dulunan sang Hauran.+ 17  Gani ang dulunan sini magahalin sa dagat tubtob sa Hazar-enon,+ nga nagaubay sa dulunan sang Damasco sa aminhan, kag sa dulunan sang Hamat.+ Amo ini ang naaminhan nga dulunan. 18  “Ang nasidlangan nga dulunan magahalin sa tunga sang Hauran kag sang Damasco kag nagaubay sa Jordan nga yara sa tunga sang Gilead+ kag sang Israel. Magtakus ka halin sa dulunan pakadto sa nasidlangan nga dagat.* Amo ini ang nasidlangan nga dulunan. 19  “Kag ang nabagatnan nga dulunan* magahalin sa Tamar pakadto sa katubigan sang Meribat-kades,+ dayon sa Nalupyakan,* kag padulong sa Daku nga Dagat.+ Amo ini ang nabagatnan nga dulunan.* 20  “Sa nakatundan nga kilid amo ang Daku nga Dagat, halin sa dulunan tubtob sa lugar sa pihak sang Lebo-hamat.*+ Amo ini ang nakatundan nga dulunan.” 21  “Bahinbahinon ninyo ini nga duta sa 12 ka tribo sang Israel. 22  Bahinbahinon ninyo ini nga palanublion para sa inyo kag sa mga dumuluong nga nakatigayon sang mga anak samtang nagaistar upod sa inyo. Kabigon ninyo sila nga tumandok nga mga Israelinhon. Magabaton sila sing palanublion sa tunga sang mga tribo sang Israel kaupod sa inyo. 23  Kon diin nga tribo nagaistar ang dumuluong nga pumuluyo didto man ninyo sia hatagan sing palanublion,” siling sang Soberanong Ginuong Jehova.

Footnote

Nagapatuhoy ini sa malaba nga maniko. Tan-awa ang Apendise B14.
Ukon “desyerto nga kapatagan.”
Ang Patay nga Dagat.
Ukon “kalag.”
Sa literal, “duha ka sapa.”
Ang Mediteraneo.
Sa literal, “Panublion ninyo ini, ang kada isa pareho sang iya utod.”
Sa literal, “nagtupa.”
Ang Patay nga Dagat.
Sa literal, “ang bagatnan nga kilid nga pakadto sa bagatnan.”
Nalupyakan sang Egipto. Tan-awa ang Glossary.
Sa literal, “ang bagatnan nga kilid nga pakadto sa bagatnan.”
Ukon “dulunan sang Hamat.”