Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Ezequiel 40:1-49

BALAYAN SANG KAUNDAN

  • Gindala si Ezequiel sa Israel sa palanan-awon (1, 2)

  • Nakakita sia sang templo sa palanan-awon (3, 4)

  • Mga luwang kag mga gawang (5-47)

    • Gawang sa sidlangan (6-16)

    • Nagua nga luwang; iban pa nga gawang (17-26)

    • Nasulod nga luwang kag mga gawang (27-37)

    • Mga hulot sa pag-alagad sa templo (38-46)

    • Ang halaran (47)

  • Portiko sang templo (48, 49)

40  Sang ikanapulo nga adlaw sang nahauna nga bulan sang ika-25 nga tuig sang amon pagkabihag,+ sang ika-14 nga tuig pagkatapos ginlaglag ang siudad,+ nabatyagan ko sadto man nga adlaw nga ang gahom ni Jehova yara sa akon, kag gindala niya ako sa siudad.+  Paagi sa palanan-awon halin sa Dios, gindala niya ako sa isa ka mataas gid nga bukid sa Israel,+ sa diin may mga tinukod nga daw kaangay sang siudad sa nabagatnan nga bahin.  Sang gindala niya ako didto, nakita ko ang isa ka tawo nga daw saway ang dagway.+ Nagauyat sia sing higot nga himo sa lanot sang flax* kag sing inugtakus nga tabun-ak,*+ kag nagatindog sia sa gawang.  Ang tawo nagsiling sa akon: “Anak sang tawo, tan-awa sing maayo, pamatii, kag talupangda ang* tanan ko nga ipakita sa imo, kay amo ina kon ngaa gindala ko ikaw diri. Isugid mo sa panimalay sang Israel ang tanan nga imo makita.”+  Nakita ko ang templo* nga napalibutan sang pader. Nakita ko man ang isa ka tawo nga nagauyat sing inugtakus nga tabun-ak nga anom ka maniko ang kalabaon (ang kada maniko gindugangan sang isa ka dapal).* Gintakus niya ang pader kag may kadamulon ini nga isa ka tabun-ak kag kataason nga isa ka tabun-ak.  Dayon nagkadto sia sa gawang sa sidlangan+ kag nagsaka sa mga halintang sini. Gintakus niya ang salamputan sang gawang kag may kasangkaron ini nga isa ka tabun-ak. Ang isa pa ka salamputan may kasangkaron man nga isa ka tabun-ak.  Ang kada hulot sang mga bantay isa ka tabun-ak ang kalabaon kag isa ka tabun-ak ang kasangkaron, kag ang antad sang mga hulot lima ka maniko.+ Ang salamputan sang gawang nga malapit sa portiko sang gawang nga nagaatubang sa templo isa ka tabun-ak.  Gintakus niya ang portiko sang gawang nga nagaatubang sa templo kag ini isa ka tabun-ak.  Dayon gintakus niya ang portiko sang gawang kag ini walo ka maniko; kag ang mga haligi sa kilid sini, nga duha ka maniko. Ang portiko sang gawang nagaatubang sa templo. 10  May tigtatlo ka hulot sang mga bantay sa magtimbang nga kilid sang gawang sa sidlangan kag ang ila kadakuon palareho. Ang takus sang mga haligi sa kilid sang mga hulot palareho man. 11  Dayon gintakus niya ang gawang kag may kasangkaron ini nga 10 ka maniko; ang kasangkaron sang salamputan sang gawang, 13 ka maniko. 12  Sa atubangan sang tagsa ka hulot sang mga bantay may manubo nga pader nga nagalabaw sa pasilyo sing isa ka maniko. Ang tagsa ka hulot sang mga bantay may kasangkaron nga anom ka maniko. 13  Gintakus man niya ang gawang halin sa atop sang isa ka hulot sang mga bantay* pakadto sa atop sang isa pa kag may kasangkaron ini nga 25 ka maniko. Ang mga gawang nagaatubangay.+ 14  Dayon gintakus niya ang mga haligi sa kilid kag may kataason ini nga 60 ka maniko. Ang mga haligi sa kilid sang luwang sa mga gawang sa bug-os nga palibot may pareho man nga kataason. 15  Gintakus niya ang kalabaon halin sa atubangan sang salamputan sang gawang pakadto sa atubangan sang portiko sang nasulod nga gawang kag may kalabaon ini nga 50 ka maniko. 16  Ang mga hulot sang mga bantay kag ang ila mga haligi sa kilid may mga bintana nga daku sa sulod apang gamay tan-awon sa gua.+ Ini nga mga bintana makita sa magtimbang nga kilid sang gawang. Ang mga portiko may mga bintana man nga nagaatubang sa sulod sa magtimbang nga kilid kag ang mga haligi sa kilid may larawan sang mga palma.+ 17  Dayon gindala niya ako sa nagua nga luwang kag didto may nakita ako nga 30 ka kalan-an*+ nga nagakubay sa salog nga bato sa bug-os nga palibot sang luwang. 18  Ang kasangkaron sang manubo nga salog nga bato sa kilid sang mga gawang pareho sa kalabaon sang mga gawang. 19  Kag gintakus niya ang distansia* halin sa atubangan sang manubo nga gawang sa sidlangan pakadto sa atubangan sang nasulod nga luwang kag may distansia ini nga 100 ka maniko. Pareho man sini ang distansia halin sa atubangan sang manubo nga gawang sa aminhan pakadto sa atubangan sang nasulod nga luwang. 20  Ang nagua nga luwang may gawang nga nagaatubang sa aminhan. Gintakus niya ang kalabaon kag kasangkaron sini. 21  May tigtatlo ka hulot sang mga bantay sa magtimbang nga kilid sini. Ang takus sang haligi sa kilid kag sang portiko sini pareho man sa nahauna nga gawang. Ang kalabaon sini 50 ka maniko kag ang kasangkaron 25 ka maniko. 22  Ang takus sang mga bintana, portiko, kag larawan sang mga palma+ sini pareho man sang yara sa gawang nga nagaatubang sa sidlangan. May pito ka halintang pasaka, kag may portiko sa punta sini. 23  Ang nasulod nga luwang may gawang nga nagaatubang sa gawang sa aminhan; kag may gawang man nga nagaatubang sa sidlangan. Gintakus niya ang distansia halin sa isa ka gawang pakadto sa isa pa ka gawang kag may distansia ini nga 100 ka maniko. 24  Dayon gindala niya ako sa bagatnan, kag didto may nakita ako nga isa ka gawang.+ Gintakus niya ang haligi sa kilid kag ang portiko sini kag ang takus sini pareho man sa pihak nga gawang. 25  May mga bintana man sa magtimbang nga kilid sang gawang kag sa portiko sini. Ang kalabaon sini 50 ka maniko kag ang kasangkaron 25 ka maniko. 26  May pito ka halintang pasaka,+ kag may portiko sa punta sini. Ang mga haligi sa magtimbang nga kilid may larawan sang mga palma. 27  Ang nasulod nga luwang may gawang nga nagaatubang sa bagatnan. Gintakus niya ang distansia halin sa isa ka gawang pakadto sa isa pa ka gawang kag may distansia ini nga 100 ka maniko. 28  Dayon nag-agi kami sa gawang sa bagatnan kag gindala niya ako sa nasulod nga luwang. Gintakus niya ini nga gawang kag pareho man ini kadaku sa iban. 29  Ang mga hulot sang mga bantay kag ang mga haligi sa kilid kag ang portiko sini pareho man kadaku sa iban. May mga bintana man sa magtimbang nga kilid sang gawang kag sa portiko sini. Ang kalabaon sini 50 ka maniko, kag ang kasangkaron 25 ka maniko.+ 30  May mga portiko sa bug-os nga palibot. Ang kalabaon sini 25 ka maniko kag ang kasangkaron 5 ka maniko. 31  Ang portiko sini nagaatubang sa nagua nga luwang, kag may larawan sang mga palma sa haligi sini sa kilid,+ kag may walo ka halintang pasaka.+ 32  Dayon nag-agi kami sa gawang sa sidlangan kag gindala niya ako sa nasulod nga luwang. Gintakus niya ini nga gawang kag pareho man ini kadaku sa iban. 33  Ang mga hulot sang mga bantay kag ang mga haligi sa kilid kag ang portiko sini pareho man kadaku sa iban, kag may mga bintana sa magtimbang nga kilid sang gawang kag sa portiko sini. Ang kalabaon sini 50 ka maniko kag ang kasangkaron 25 ka maniko. 34  Ang portiko sini nagaatubang sa nagua nga luwang, kag ang mga haligi sa magtimbang nga kilid may larawan sang mga palma. May walo ka halintang pasaka. 35  Dayon gindala niya ako sa gawang sa aminhan.+ Gintakus niya ini nga gawang kag pareho man ini kadaku sa iban. 36  Ang mga hulot sang mga bantay kag ang mga haligi sa kilid kag ang portiko sini pareho man kadaku sa iban. May mga bintana ini sa magtimbang nga kilid. Ang kalabaon sini 50 ka maniko kag ang kasangkaron 25 ka maniko. 37  Ang mga haligi sini sa magtimbang nga kilid nagaatubang sa nagua nga luwang, kag ini nga mga haligi may larawan sang mga palma. May walo ka halintang pasaka. 38  May isa ka kalan-an nga ang puertahan malapit sa mga haligi sa kilid sang gawang. Didto nila ginahugasan ang mga dulot nga sinunog.+ 39  Sa sulod sang portiko sang gawang sa aminhan, may tigduha ka lamesa sa magtimbang nga kilid para ihawan sang dulot nga sinunog,+ dulot tungod sa sala,+ kag dulot tungod sa kasal-anan.+ 40  Sa gua sang portiko sang gawang, kon magsaka ang isa sa salamputan sang gawang sa aminhan, may tigduha man ka lamesa sa magtimbang nga kilid. 41  May apat ka lamesa sa sulod kag apat ka lamesa sa gua sang portiko sang gawang. Walo tanan ang lamesa para ihawan sang mga halad. 42  Ang apat ka lamesa para sa dulot nga sinunog human sa bato nga binasbasan. May kalabaon ini nga isa ka maniko kag tunga, kasangkaron nga isa ka maniko kag tunga, kag kataason nga isa ka maniko. Ginabutang man sa sini nga mga lamesa ang mga gamit para sa pag-ihaw sa mga dulot nga sinunog kag sa iban pa nga mga halad. 43  Ang mga bulutangan sang mga gamit may kasangkaron nga isa ka dapal, kag nahamtang ini sa palibot nga pader. Ginabutang nila sa mga lamesa ang mga karne nga inughalad. 44  Sa gua sang nasulod nga gawang may mga kalan-an sang mga manug-amba;+ yara ini sa nasulod nga luwang malapit sa gawang sa aminhan kag nagaatubang ini sa bagatnan. May isa pa ka kalan-an nga malapit sa gawang sa sidlangan kag nagaatubang ini sa aminhan. 45  Nagsiling sia sa akon: “Ining kalan-an nga nagaatubang sa bagatnan para sa mga saserdote nga nagaalagad sa templo.+ 46  Ang kalan-an nga nagaatubang sa aminhan para sa mga saserdote nga nagaalagad sa halaran.+ Mga kaliwat sila ni Zadok.+ Mga Levinhon sila nga gintangdo nga makapalapit kay Jehova sa pag-alagad sa iya.”+ 47  Dayon gintakus niya ang nasulod nga luwang. Ang kalabaon sini 100 ka maniko kag ang kasangkaron 100 ka maniko, kuadrado ini. Ang halaran yara sa atubangan sang templo. 48  Gindala niya ako sa portiko sang templo+ kag gintakus niya ang haligi sa kilid sa salamputan sang portiko, kag may kasangkaron ini nga lima ka maniko sa isa ka kilid kag tatlo ka maniko sa isa pa ka kilid. Ang isa ka haligi yara sa wala kag ang isa pa yara sa tuo. 49  Ang kasangkaron sang portiko 20 ka maniko kag ang kalabaon 11* ka maniko. Nagasaka sila sa sini paagi sa mga halintang kag may mga haligi sa magtimbang nga kilid.+

Footnote

Isa ka tanom nga ginatanom halin sang una pa. Ang lanot sini ginagamit sa paghimo sing tela nga linen.
Tan-awa ang Apendise B14.
Sa literal, “ipahamtang ang imo tagipusuon sa.”
Sa literal, “balay.” Ini ang gingamit sa kapitulo 40-48 kon ang “balay” nagapatuhoy sa kabug-usan sang templo ukon sa tinukod mismo nga templo.
Sa literal, “isa ka inugtakus nga tabun-ak nga anom ka maniko, isa ka maniko kag isa ka dapal.” Nagapatuhoy ini sa malaba nga maniko. Tan-awa ang Apendise B14.
Mahimo nga nagapatuhoy sa naibabaw nga pader sang hulot sang bantay.
Ukon “hulot.”
Sa literal, “kasangkaron.”
Ukon mahimo, “12.”