Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Ezequiel 30:1-26

BALAYAN SANG KAUNDAN

  • Tagna batok sa Egipto (1-19)

    • Gintagna ang pagsalakay ni Nabocodonosor (10)

  • Gahom sang Paraon magaluya  (20-26)

30  Kag nagsiling pa si Jehova sa akon:  “Anak sang tawo, magpanagna ka kag magsiling, ‘Amo ini ang ginasiling sang Soberanong Ginuong Jehova: “Maghaya kamo, ‘Makaluluoy kami kay ang adlaw magaabot!’   Kay malapit na ang adlaw ni Jehova.+ Ang tion sa paghukom sa mga pungsod+ mangin isa ka magal-um nga adlaw.+   Magaabot ang espada sa Egipto kag makugmat ang Etiopia kon magkalamatay ang mga tawo sa Egipto; Agawon ang manggad sini kag rumpagon ang mga sadsaran sini.+   Ang Etiopia,+ Put,+ Lud, kag ang tanan nga halin sa iban nga pungsod,* Kag ang Cub kag ang mga anak sang Israel nga yara sa katipan,* Mapatay sila tanan sa espada.”’   Amo ini ang ginasiling ni Jehova: ‘Mapatay man ang mga nagasakdag sa Egipto, Kag madula ang pagpabugal sini sang iya gahom.’+ “‘Mapatay sila sa espada halin sa Migdol+ tubtob sa Seyene,’+ siling sang Soberanong Ginuong Jehova.  ‘Mangin pinakamamingaw sila nga pungsod, kag ang mga siudad sini ang mangin pinakamamingaw nga mga siudad.+  Kag makilala nila nga ako amo si Jehova kon sunugon ko ang Egipto kag laglagon ko ang tanan nga nagadampig sa iya.  Sa sina nga adlaw magapadala ako sing mga mensahero nga nagasakay sa mga sakayan agod magkurog sa kahadlok ang Etiopia nga nagasalig sing sobra sa iya kaugalingon. Makugmat gid sia sa adlaw sang kalaglagan sang Egipto, kay mahanabo gid ini.’ 10  “Amo ini ang ginasiling sang Soberanong Ginuong Jehova: ‘Laglagon ko ang katawhan sang Egipto paagi kay Hari Nabocodonosor* sang Babilonia.+ 11  Pakadtuon ko sia kag ang iya guban, ang pinakamapintas nga pungsod,+ agod laglagon ang duta. Gabuton nila ang ila mga espada batok sa Egipto kag magalapta sa duta ang mga ginpatay nila.+ 12  Pamalhon ko ang dalagku nga mga kanal halin sa Nilo+ kag ibaligya ang duta sa malaut nga mga tawo. Laglagon ko paagi sa mga dumuluong ang duta kag ang tanan nga yara sa sini.+ Ako, si Jehova, ang nagsiling sini.’ 13  “Amo ini ang ginasiling sang Soberanong Ginuong Jehova: ‘Laglagon ko man ang makangilil-ad nga mga diosdios* kag ang wala sing pulos nga mga dios sang Nop.*+ Wala na sing mangin prinsipe* sa Egipto, kag pahadlukon ko ang Egipto.+ 14  Laglagon ko ang Patros+ kag sunugon ang Zoan kag silutan ang No.*+ 15  Ibubo ko ang akon kaakig sa Sin, ang pamakod sang Egipto, kag laglagon ko ang katawhan sang No. 16  Sunugon ko ang Egipto; kag makugmat gid ang Sin kag marumpag ang pader sang No, kag salakayon ang Nop* bisan adlaw! 17  Mapatay sa espada ang mga pamatan-on nga lalaki sang On* kag Pibeset, kag bihagon ang mga pumuluyo sang mga siudad. 18  Magadulom ang adlaw sa Tapanes kon balion ko didto ang mga gota sang Egipto.+ Madula na ang iya pagpabugal sang iya gahom.+ Tabunan sia sing gal-um kag bihagon ang mga pumuluyo sang iya mga banwa.+ 19  Silutan ko ang Egipto, kag makilala nila nga ako amo si Jehova.’” 20  Kag sang ikapito nga adlaw sang nahauna nga bulan sang ika-11 nga tuig, nagsiling si Jehova sa akon: 21  “Anak sang tawo, ginbali ko ang butkon sang Paraon nga hari sang Egipto; indi ini pagbugkusan sing bendahe agod indi ini mag-ayo kag magkusog sa pag-uyat sing espada.” 22  “Gani amo ini ang ginasiling sang Soberanong Ginuong Jehova: ‘Batok ako sa Paraon nga hari sang Egipto,+ kag balion ko ang iya mga butkon, ang makusog kag ang bali nga butkon,+ agod mabuy-an niya ang espada.+ 23  Dayon, paalaplaagon ko ang mga Egiptohanon sa mga pungsod kag palaptahon ko sila sa mga kadutaan.+ 24  Pabakuron ko ang mga butkon* sang hari sang Babilonia+ kag ihatag ko sa iya ang akon espada,+ kag balion ko ang mga butkon sang Paraon, kag magaugayong sia kaangay sang nagatagumatayon nga tawo sa atubangan niya.* 25  Pabakuron ko ang mga butkon sang hari sang Babilonia, apang magaluya ang mga butkon sang Paraon; kag makilala nila nga ako amo si Jehova kon ihatag ko ang akon espada sa hari sang Babilonia kag gamiton niya ini batok sa Egipto.+ 26  Kag paalaplaagon ko ang mga Egiptohanon sa mga pungsod kag palaptahon ko sila sa mga kadutaaan,+ kag makilala nila nga ako amo si Jehova.’”

Footnote

Ukon “tanan nga nagsinamo nga populasyon.”
Ayhan nagapatuhoy sa mga Israelinhon nga nakig-alyansa sa Egipto.
Sa literal, “Nabocodorosor,” lain pa nga pagtigbato.
Ang Hebreo nga termino mahimo nga may kaangtanan sa tinaga para sa “ipot” kag ginagamit sa pagtamay.
Ukon “Memfis.”
Ukon “pangulo.”
Ang Tebes.
Ukon “Memfis.”
Ang Heliopolis.
Ukon “Dugangan ko ang gahom.”
Sa atubangan sang hari sang Babilonia.