Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Ezequiel 17:1-24

BALAYAN SANG KAUNDAN

  • Paktakon sa duha ka agila, ubas (1-21)

  • Ugbos nangin daku nga sedro (22-24)

17  Nagsiling pa si Jehova sa akon:  “Anak sang tawo, magsugid ka sing paktakon kag sing hulubaton tuhoy sa panimalay sang Israel.+  Dapat mo isiling, ‘Amo ini ang ginasiling sang Soberanong Ginuong Jehova: “May daku nga agila,+ nga may malapad nga pakpak kag malaba nga kuyos. May madabong sia nga bulbol nga may lainlain nga kolor kag naglupad sia pakadto sa Lebanon+ kag nagkuha sing ugbos sa pinakaibabaw nga sanga sang kahoy nga sedro.+  Gin-utod niya ang ugbos sa pinakaibabaw nga sanga kag gindala ini sa duta sang mga negosyante,* kag gintanom ini sa siudad sang mga negosyante.+  Dayon nagkuha sia sing binhi sang duta+ kag gintanom ini sa matambok nga duta. Kaangay sang kahoy nga sause gintanom niya ini sa higad sang katubigan.  Nagtubo ini kag nangin manubo nga puno sang ubas+ kag nagdabong, kag nanggamot ini sing madalom. Nangin puno ini sang ubas kag nagpanalingsing kag nagpananga.+  “‘“Kag may isa pa ka daku nga agila,+ nga may malapad nga pakpak kag malaba nga kuyos.+ Halin sa gintamnan sang puno sang ubas, ang mga gamot kag mga salingsing sini naggapa pakadto sa agila agod matubigan ini sang agila.+  Natanom na ini sa matambok nga duta sa higad sang katubigan, agod magpananga kag magpamunga kag mangin daku nga puno sang ubas.”’+  “Isiling mo, ‘Amo ini ang ginasiling sang Soberanong Ginuong Jehova: “Padayon bala ini nga magtubo? Wala bala sing maggabot sini+ agod madunot ang mga bunga kag malaya ang mga salingsing sini?+ Malaya gid ini amo nga indi na kinahanglan ang tuman nga kusog ukon madamo nga tawo sa paggabot sini. 10  Bisan ginsaylo ini, mamuhi pa bala ini kon itanom liwat? Indi bala ini malaya kon huypon sang hangin halin sa sidlangan? Malaya ini sa duta nga gintamnan sa sini.”’” 11  Kag nagsiling pa si Jehova sa akon: 12  “Palihug isiling mo sa rebelyuso nga panimalay, ‘Wala mo bala mahangpan ang buot silingon sini?’ Isiling mo, ‘Ang hari sang Babilonia nagkadto sa Jerusalem kag ginkuha ang hari kag ang mga prinsipe sini kag gindala niya sila sa Babilonia.+ 13  Kag nagkuha sia sing isa ka kaliwat*+ sang hari kag nakigkatipan sa iya kag ginpapanumpa sia.+ Dayon gindala niya ang pangulo nga mga lalaki sang duta,+ 14  agod paubson ang ginharian kag agod indi ini makatindog batok sa iya. Magapadayon lamang ini kon tumanon sini ang katipan sa iya.+ 15  Apang sang ulihi nagrebelde ang hari sa iya+ paagi sa pagpadala sing mga mensahero sa Egipto agod hatagan sia sing mga kabayo+ kag sing madamo nga soldado.+ Magamadinalag-on bala sia? Makalikaw bala sa silot ang naghimo sini? Malapas bala niya ang katipan kag makaluwas gihapon?’+ 16  “‘“Subong nga buhi ako,” siling sang Soberanong Ginuong Jehova, “mapatay sia sa Babilonia, sa lugar sang hari* nga nagpapungko sa iya* sa trono, ang hari nga ang panumpa gintamay niya kag ang katipan ginlapas niya.+ 17  Kag ang madamo nga soldado kag hangaway sang Paraon indi makabulig sa inaway,+ kon ang mga kaaway magpatindog sing mga pader sa palibot sini kag maghimo sing mga bungyod sa kilid sang pader agod patyon ang madamo nga kabuhi.* 18  Gintamay niya ang panumpa kag ginlapas niya ang katipan. Bisan pa nagsaad sia,* ginhimo niya ini tanan nga butang, kag indi gid sia makaluwas.”’ 19  “‘Gani amo ini ang ginasiling sang Soberanong Ginuong Jehova: “Subong nga buhi ako, pabayaron ko sia bangod gintamay niya ang akon panumpa+ kag ginlapas niya ang akon katipan. 20  Ihaboy ko ang akon lambat sa iya kag masiod sia sa sini.+ Dalhon ko sia sa Babilonia kag hukman ko sia didto bangod sa iya pagkadimatutom sa akon.+ 21  Ang makapalagyo nga mga hangaway niya mapatay sa espada, kag ang mabilin magaalaplaag sa tanan nga direksion.*+ Dayon makilala mo nga ako, si Jehova, ang nagsiling sini.”’+ 22  “‘Amo ini ang ginasiling sang Soberanong Ginuong Jehova: “Magakuha ako sing ugbos sa pinakaibabaw nga sanga sang kahoy nga sedro+ kag itanom ini, magautod ako sing ugbos halin sa pinakaibabaw nga sanga,+ kag itanom ko ini sa mataas nga bukid.+ 23  Sa mataas nga bukid sang Israel itanom ko ini; kag magapananga ini kag magapamunga kag mangin daku nga kahoy nga sedro. Kag magahapon sa sini ang tanan nga sahi sang pispis kag magapasilong sila sa handong sini. 24  Kag makilala sang tanan nga kahoy sa latagon nga ako, si Jehova, ang nagpaubos sa mataas nga kahoy, nagpataas sa manubo nga kahoy;+ ako ang nagpalaya sa berde nga kahoy kag nagpabulak sa laya nga kahoy.+ Ako, si Jehova, ang nagsiling kag naghimo sini.”’”

Footnote

Sa literal, “duta sang Canaan.”
Sa literal, “binhi.”
Si Nabocodonosor.
Si Zedequias.
Ukon “kalag.”
Sa literal, “ginhatag niya ang iya kamot.”
Sa literal, “hangin.”