Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Ezequiel 10:1-22

BALAYAN SANG KAUNDAN

  • Kalayo halin sa mga ruweda (1-8)

  • Mga kerubin kag mga ruweda (9-17)

  • Himaya nagbiya sa templo (18-22)

10  Samtang nagatulok ako, may nakita ako nga daw bato nga sapiro nga daw kaangay sang isa ka trono. Yara ini sa ibabaw sang daw kristal nga salog sa uluhan sang mga kerubin.+  Dayon ginsilingan niya ang lalaki nga nagabayo sing linen:+ “Magkadto ka sa tunga sang nagatiyog nga mga ruweda,+ sa idalom sang mga kerubin, kag pun-a ang imo duha ka kamot sing mga baga+ halin sa tunga sang mga kerubin kag isabwag ini sa siudad.”+ Gani nakita ko nga nagkadto sia.  Sang magkadto ang lalaki, ang mga kerubin nagatindog sa aminhan sang templo kag ang nasulod nga luwang puno sing panganod.  Dayon ang himaya ni Jehova+ nagpaibabaw halin sa mga kerubin pakadto sa atangan sang templo, kag amat-amat nga napuno sing panganod ang templo,+ kag ang luwang napuno sing kasanag sang himaya ni Jehova.  Kag ang gahod sang mga pakpak sang mga kerubin mabatian sa nagua nga luwang, kaangay ini sang tingog sang Dios nga Labing Gamhanan.+  Dayon ginsugo niya ang lalaki nga nagabayo sing linen: “Magkuha ka sing kalayo sa tunga sang nagatiyog nga mga ruweda, sa tunga sang mga kerubin,” gani nagkadto sia kag nagtindog sa tupad sang ruweda.  Kag ginkuha sang isa sa mga kerubin ang pila ka kalayo nga yara sa tunga nila+ kag ginbutang ini sa duha ka kamot sang lalaki nga nagabayo sing linen.+ Sang nakuha na niya ini, naglakat sia.  Ang mga kerubin daw may mga kamot nga kaangay sang kamot sang tawo sa idalom sang ila mga pakpak.+  Samtang nagatulok ako, may nakita ako nga apat ka ruweda. Isa ka ruweda sa tupad sang tagsa ka kerubin, kag ang mga ruweda nagainggat nga daw kaangay sang malahalon nga bato nga krisolito.+ 10  Ang hitsura sang apat ka ruweda palareho. Daw subong ini sang isa ka ruweda nga may nagasaang nga isa pa gid ka ruweda sa tunga sini. 11  Kon maghulag sila, makakadto sila sa bisan diin sa apat ka direksion nga wala nagaliso, bangod kon diin nagaatubang ang ulo didto sila nagakadto. 12  Ang ila bug-os nga lawas, ang ila likod, ang ila mga kamot, ang ila mga pakpak, kag ang mga ruweda, ang ruweda nila nga apat puno sing mata.+ 13  Nabatian ko ang isa ka tingog nga nagtawag sa mga ruweda, “Nagatiyog nga mga ruweda!” 14  Ang kada isa* may apat ka nawong. Ang una nga nawong, nawong sang kerubin; ang ikaduha, nawong sang tawo; ang ikatlo, nawong sang leon; kag ang ikap-at, nawong sang agila.+ 15  Kag nagpaibabaw ang mga kerubin—sila man ang buhi nga mga tinuga* nga nakita ko sa suba sang Kebar+ 16  Kon maghulag ang mga kerubin, nagahulag man upod sa ila ang mga ruweda; kon maglupad ang mga kerubin kag magpaibabaw halin sa duta, ang mga ruweda nagaupod man sa ila.+ 17  Kon magdulog sila, nagadulog man ang mga ruweda; kon magpaibabaw sila, nagapaibabaw man ini, kay yara man sa mga ruweda ang espiritu nga nagapanghikot sa buhi nga mga tinuga.* 18  Kag ang himaya ni Jehova+ naghalin sa ibabaw sang atangan sang templo kag nagdulog sa ibabaw sang mga kerubin.+ 19  Kag nakita ko nga naglupad ang mga kerubin. Nag-upod man sa ila ang mga ruweda. Nagdulog sila sa nasidlangan nga gawang sang templo ni Jehova, kag ang himaya sang Dios sang Israel yara sa ibabaw nila.+ 20  Sila man ang buhi nga mga tinuga* nga nakita ko sa idalom sang trono sang Dios sang Israel sa suba sang Kebar,+ gani nahibaluan ko nga mga kerubin sila. 21  Ang kada isa sa ila may apat ka nawong kag apat ka pakpak, kag may mga kamot nga daw kaangay sang kamot sang tawo sa idalom sang ila mga pakpak.+ 22  Kag ang ila nawong kaangay sang nakita ko sa suba sang Kebar.+ Ang kada isa sa ila nagalakat sing diretso.+

Footnote

Ang kada kerubin.
Sa literal, “ini ang buhi nga tinuga.”
Sa literal, “ang espiritu sang buhi nga tinuga.”
Sa literal, “Ini ang buhi nga tinuga.”