Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Exodo 31:1-18

BALAYAN SANG KAUNDAN

  • Ginpuno sang espiritu sang Dios ang mga trabahador (1-11)

  • Adlaw nga Inugpahuway, tanda sa ulot sang Dios kag sang Israel (12-17)

  • Duha ka tapitapi nga bato (18)

31  Nagsiling pa si Jehova kay Moises:  “Ginpili ko* si Bezalel+ nga anak ni Uri nga anak ni Hur sa tribo ni Juda.+  Pun-on ko sia sang akon espiritu* agod makatigayon sia sing kaalam, paghangop, kag ihibalo para sa tanan nga sahi sang hilimuon,  sa paghimo sing matahom nga mga desinyo, sa pagsalsal sing bulawan, pilak, kag saway,  sa pagbasbas kag sa pagporma sing mga bato nga inugtampok,+ kag sa paghimo sing tanan nga sahi sang produkto nga kahoy.+  Ginatangdo ko man nga magbulig sa iya si Oholiab+ nga anak ni Ahisamac sa tribo ni Dan, kag hatagan ko sing kaalam ang tagipusuon sang tanan nga sampaton nga trabahador,* agod himuon nila ang tanan nga ginsugo ko sa imo:+  ang tolda nga tilipunan,*+ ang kaban sang katipan*+ kag ang takop+ sa ibabaw sini, ang tanan nga kagamitan sa tolda,  ang lamesa+ kag ang mga kagamitan sini, ang kandelero nga puro nga bulawan kag ang tanan nga kagamitan sini,+ ang halaran sang incienso,+  ang halaran sang dulot nga sinunog+ kag ang tanan nga kagamitan sini, ang labador kag ang tulungtungan sini,+ 10  ang mga panapton nga hinabol sing maayo, ang balaan nga mga panapton para kay Aaron nga saserdote, ang mga panapton sang iya mga anak sa pag-alagad bilang mga saserdote,+ 11  ang inughaplas nga lana, kag ang mahamot nga incienso para sa santuaryo.+ Himuon nila ang tanan nga ginsugo ko sa imo.” 12  Nagsiling pa si Jehova kay Moises: 13  “Isiling mo sa mga Israelinhon, ‘Tumanon ninyo ilabi na ang akon kasuguan tuhoy sa mga adlaw nga inugpahuway,+ kay isa ini ka tanda sa ulot ko kag ninyo sa tanan ninyo nga kaliwatan agod mahibaluan ninyo nga ako, si Jehova, ang nagapakabalaan sa inyo. 14  Tumanon ninyo ang kasuguan tuhoy sa Adlaw nga Inugpahuway, kay balaan ini sa inyo.+ Patyon ang bisan sin-o nga nagalapas sini. Patyon* ang tawo* nga nagapangabudlay sa sini nga adlaw.+ 15  Mahimo kamo mag-obra sa sulod sang anom ka adlaw, apang magpahuway gid kamo sa ikapito nga adlaw.+ Balaan ini kay Jehova. Patyon ang bisan sin-o nga nagapangabudlay sa Adlaw nga Inugpahuway. 16  Dapat tumanon sang mga Israelinhon ang kasuguan tuhoy sa Adlaw nga Inugpahuway. Dapat nila tumanon ang Adlaw nga Inugpahuway sa tanan nila nga kaliwatan. Isa ini ka katipan tubtob san-o. 17  Isa ini ka tanda tubtob san-o sa ulot ko kag sang katawhan sang Israel,+ kay sa sulod sang anom ka adlaw ginhimo ni Jehova ang langit kag ang duta kag sa ikapito nga adlaw nag-untat sia sa pagpangabudlay kag nagpahuway.’ ”+ 18  Sang makatapos sa pagpakighambal ang Dios sa iya sa Bukid Sinai, ginhatag niya kay Moises ang duha ka tapitapi sang Katipan,*+ ang mga tapitapi nga bato nga ginsulatan sang tudlo sang Dios.+

Footnote

Sa literal, “Gintawag ko sa ngalan.”
Sa literal, “sang espiritu sang Dios.”
Sa literal, “may maalam nga tagipusuon.”
Ukon “tolda diin ang isa makigkita sa Dios.” Tan-awa ang Glossary.
Sa literal, “Pamatuod.”
Sa literal, “Utdon.”
Ukon “kalag.”
Sa literal, “Pamatuod.” Tan-awa ang Glossary.