Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Ester 6:1-14

BALAYAN SANG KAUNDAN

  • Si Mardoqueo ginpadunggan sang hari (1-14)

6  Sadto nga gab-i indi makatulog ang hari.* Gani ginpakuha niya ang libro sang maragtas sang mga tion,+ kag ginbasa ini sa hari.  Nabasahan ang tuhoy sa pagsugid ni Mardoqueo sang buko nga pagpatay* kay Hari Ahasuero nanday Bigtan kag Teres, ang duha ka opisyal sa palasyo sang hari nga nagabantay sa ganhaan.+  Nagpamangkot ang hari: “Ginpadunggan bala kag ginpadyaan si Mardoqueo tungod sini?” Nagsabat ang mga alagad sang hari: “Wala pa gid sing nahimo para sa iya.”  Sang ulihi nagpamangkot ang hari: “Sin-o ang yara sa luwang?” Sina man nga tion nagsulod si Haman sa nagua nga luwang+ sang balay* sang hari agod pangabayon ang hari nga bitayon si Mardoqueo sa usok nga ginpahimo niya.+  Nagsabat ang mga alagad sang hari: “Si Haman.”+ Gani nagsiling ang hari: “Pasudla sia.”  Sang nagsulod si Haman, nagsiling ang hari sa iya: “Ano ang dapat himuon sa tawo nga luyag padunggan sang hari?” Si Haman nagsiling sa iya kaugalingon: “Sin-o pa bala ang luyag padunggan sang hari kundi ako?”+  Gani nagsiling si Haman sa hari: “Para sa tawo nga luyag padunggan sang hari,  ipakuha ang harianon nga panapton+ kag ang kabayo nga napunihan sa ulo, nga ginasakyan sang hari.  Itugyan ang panapton kag ang kabayo sa isa sa mga dungganon nga prinsipe sang hari, kag ipasuksok nila ang panapton sa tawo nga luyag padunggan sang hari kag pasakyon nila sia sa kabayo sa plasa sang siudad, kag magasinggit sila sa unahan niya: ‘Amo ini ang ginahimo sa tawo nga luyag padunggan sang hari!’ ”+ 10  Sa gilayon nagsiling ang hari kay Haman: “Magdalidali ka! Kuhaa ang panapton kag ang kabayo, kag himua ang ginsiling mo sa Judiyo nga si Mardoqueo nga nagapungko sa gawang sang hari. Himua gid ang tanan mo nga ginsiling.” 11  Gani ginkuha ni Haman ang panapton kag ang kabayo, kag ginpasuksukan niya si Mardoqueo+ kag ginpasakay sa kabayo sa plasa sang siudad kag nagsinggit sa unahan niya: “Amo ini ang ginahimo sa tawo nga luyag padunggan sang hari!” 12  Pagkatapos sini, nagbalik si Mardoqueo sa gawang sang hari, apang si Haman dalidali nga nagpauli nga nagapangasubo kag nagapanabon sang iya ulo. 13  Sang ginsugiran ni Haman si Zeres+ nga iya asawa kag ang tanan niya nga abyan sang natabo sa iya, ang maalamon nga mga tawo nga nagalaygay sa iya kag si Zeres nga iya asawa nagsiling: “Kon sa umpisa pa lang nalutos ka na ni Mardoqueo nga isa ka Judiyo,* ginapakita sina nga indi ka makadaug sa iya; pat-od gid nga malutos ka niya.” 14  Samtang nagahambalanay pa sila, ang mga opisyal sa palasyo sang hari nag-abot kag gilayon nga gindala nila si Haman sa sinalusalo nga ginhanda ni Ester.+

Footnote

Sa literal, “nagpalagyo ang tulog sang hari.”
Sa literal, “pagpadapat sing kamot.”
Ukon “palasyo.”
Sa literal, “nga halin sa binhi sang mga Judiyo.”