Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Ester 5:1-14

BALAYAN SANG KAUNDAN

  • Si Ester nag-atubang sa hari (1-8)

  • Kaakig kag pagkaarogante ni Haman (9-14)

5  Sang ikatlo nga adlaw,+ nagsuksok si Ester sang iya bayo nga pangrayna kag nagtindog sa nasulod nga luwang sa atubangan sang balay* sang hari, samtang nagapungko ang hari sa iya trono nga nagaatubang sa puertahan sang palasyo.  Sang makita sang hari si Rayna Ester nga nagatindog sa luwang, nalipay gid sia, amo nga gin-untay niya ang iya bulawan nga setro+ kay Ester. Dayon, nagpalapit si Ester kag gintandog ang punta sang setro.  Ginpamangkot sia sang hari: “Ano ang kinahanglan mo, Rayna Ester, kag ano ang luyag mo? Bisan pa pangayuon mo ang katunga sang akon ginharian, ihatag ko ini sa imo!”  Nagsabat si Ester: “Kon buot sang hari, magkadto ang hari kag si Haman+ karon nga adlaw sa sinalusalo nga ginhanda ko para sa iya.”  Gani nagsugo ang hari sa iya mga alagad: “Silinga ninyo si Haman nga magkadto gilayon, suno sa pangabay ni Ester.” Kag nagkadto ang hari kag si Haman sa sinalusalo nga ginhanda ni Ester.  Sang nagainom na sila sing alak, namangkot ang hari kay Ester: “Ano ang luyag mo nga pangayuon sa akon? Bisan pa pangayuon mo ang katunga sang akon ginharian, ihatag ko ini sa imo!”+  Nagsabat si Ester: “Ang luyag ko nga pangayuon amo ini,  Kon nahamuot ang hari sa akon kag kon luyag sang hari nga ihatag ang akon pangabay, magkadto ang hari kag si Haman sa sinalusalo nga akon ihanda buas, kag buas ihambal ko ang akon pangabay.”  Gani naglakat nga malipayon si Haman sina nga adlaw. Apang sang makita niya si Mardoqueo sa gawang sang hari, naakig gid sia kay wala magtindog si Mardoqueo kag magpakita sing kahadlok sa iya.+ 10  Apang, ginpunggan ni Haman ang iya kaakig kag nagpauli. Ginpatawag niya ang iya mga abyan kag si Zeres,+ nga iya asawa. 11  Ginpabugal ni Haman sa ila ang iya manggad, ang iya madamo nga anak nga lalaki,+ kag ang kadungganan kag ang mataas nga posisyon nga ginhatag sa iya sang hari labaw sa mga prinsipe kag mga alagad sang hari.+ 12  Nagsiling pa si Haman: “Indi lang ina, wala na sing iban pa nga gin-agda si Rayna Ester sa sinalusalo nga ginhanda niya+ kundi ako lang kag ang hari. Kag buas gin-agda pa gid niya ako kaupod sang hari.+ 13  Apang ini tanan indi gid makapalipay sa akon kon makita ko gihapon ang Judiyo nga si Mardoqueo nga nagapungko sa gawang sang hari.” 14  Gani nagsiling sa iya si Zeres nga iya asawa kag ang tanan niya nga abyan: “Magpahimo ka sing usok nga may kataason nga 50 ka maniko.* Kag buas sa aga isiling mo sa hari nga bitayon nila si Mardoqueo sa sini nga usok.+ Sa sina malipayon ka nga magakadto sa sinalusalo upod sa hari.” Naluyagan ni Haman ang ila ginsiling, gani nagpahimo sia sing usok.

Footnote

Ukon “palasyo.”
Mga 22.3 ka metro (73 ka pie). Tan-awa ang Apendise B14.