Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Ester 3:1-15

BALAYAN SANG KAUNDAN

  • Si Haman ginbayaw sang hari (1-4)

  • Plano nga papason ang mga Judiyo (5-15)

3  Pagkatapos sini ginhatagan ni Hari Ahasuero si Haman+ nga anak ni Hamedata nga Agagnon+ sing mas mataas nga posisyon sangsa iban nga mga prinsipe.+  Ang tanan nga alagad sang hari sa gawang sang hari nagaduko kag nagahapa sa atubangan ni Haman, kay amo ini ang sugo sang hari. Apang si Mardoqueo wala magduko ukon maghapa sa atubangan niya.  Gani, ang mga alagad sang hari sa gawang nagsiling kay Mardoqueo: “Ngaa ginabalewala mo ang sugo sang hari?”  Adlaw-adlaw nila sia nga ginasilingan sini, apang wala sia magpamati. Gani ginhambalan nila si Haman kon bala pabay-an lang ang ginahimo ni Mardoqueo;+ kay nagsiling sia nga isa sia ka Judiyo.+  Sang nakita ni Haman nga wala nagaduko kag nagahapa sa atubangan niya si Mardoqueo, naakig gid si Haman.+  Apang indi tuman para sa iya nga si Mardoqueo lang ang patyon, kay ginsugiran nila sia tuhoy sa katawhan ni Mardoqueo. Gani nangita si Haman sing paagi kon paano papason ang tanan nga Judiyo, nga katawhan ni Mardoqueo, nga yara sa bug-os nga ginharian ni Ahasuero.  Sang nahauna nga bulan, nga amo ang bulan sang Nisan,* sang ika-12 nga tuig+ sang paggahom ni Hari Ahasuero, nag-itsa sila sang Pur+ (nga amo, ang Pagabutgabot) sa atubangan ni Haman agod mahibaluan kon ano nga adlaw kag bulan himuon ang pagpapas. Nagtupa ini sa ika-12 nga bulan, nga amo ang bulan sang Adar.*+  Kag nagsiling si Haman kay Hari Ahasuero: “May katawhan nga nagaistar+ sa nagkalainlain nga probinsia* sang imo ginharian+ nga ang kasuguan tuhay gid sa iban. Wala nila ginatuman ang kasuguan sang hari, kag indi maayo nga pabay-an lang sila sang hari.  Kon buot sang hari, maghimo sang kasuguan nga papason sila. Mabayad ako sing 10,000 ka talanton* nga pilak kag ihatag ko ini sa mga opisyal sang palasyo agod dalhon ini sa bahandian sang hari.”* 10  Ginhukas sang hari ang iya singsing nga inugpat-in+ kag ginhatag ini kay Haman+ nga anak ni Hamedata nga Agagnon,+ nga kaaway sang mga Judiyo. 11  Kag ang hari nagsiling kay Haman: “Ang katawhan kag ang ila pilak ginahatag ko sa imo, himua sa ila kon ano ang luyag mo.” 12  Gani ginpatawag ang mga sekretaryo+ sang hari sang ika-13 nga adlaw sang nahauna nga bulan. Ginsulat nila+ ang tanan nga sugo ni Haman sa mga satrapa sang hari, sa mga gobernador sang mga probinsia,* kag sa mga prinsipe sang nagkalainlain nga katawhan, sa tagsa ka probinsia,* suno sa naandan sini nga paagi sang pagsulat,* kag sa tagsa ka katawhan suno sa ila hambal. Ginsulat ini sa ngalan ni Hari Ahasuero kag ginpat-inan ini sang singsing sang hari.+ 13  Ginpadala ang mga sulat paagi sa mga mensahero sa tanan nga probinsia* sang hari, nga nagamando nga papason ang tanan nga mga Judiyo, pamatan-on man ukon tigulang nga lalaki, mga kabataan kag mga babayi, sa isa lang ka adlaw, sa ika-13 nga adlaw sang ika-12 nga bulan, nga amo ang bulan sang Adar,+ kag kuhaon ang ila pagkabutang.+ 14  Ginhatagan sang kopya sang kasuguan ang tanan nga grupo sang katawhan sa tanan nga probinsia,* agod makahanda sila sa sini nga adlaw. 15  Sa sugo sang hari, nagdalidali sa paglakat ang mga mensahero,+ kag ginhatag man ang kasuguan sa palasyo sang Susan.*+ Samtang ang hari kag si Haman nagpungko agod mag-inom sang alak, ang bug-os nga siudad sang Susan* nagakinagula.

Footnote

Tan-awa ang Apendise B15.
Tan-awa ang Apendise B15.
Ukon “sakop nga mga distrito.”
Ang isa ka talanton katumbas sang 34.2 ka kilo. Tan-awa ang Apendise B14.
Ukon mahimo, “Mabayad ako sing 10,000 ka talanton sa bahandian sang hari para sa magahimo sini nga hilikuton.”
Ukon “sakop nga mga distrito.”
Ukon “sakop nga distrito.”
Ukon “nga estilo sang pagsulat.”
Ukon “sakop nga mga distrito.”
Ukon “sakop nga distrito.”
Ukon “Susa.”
Ukon “Susa.”