Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Esdras 4:1-24

BALAYAN SANG KAUNDAN

  • Ginpamatukan ang pagpatindog liwat sang templo (1-6)

  • Mga kaaway nagreklamo kay Hari Artajerjes (7-16)

  • Ang sabat ni Artajerjes (17-22)

  • Nauntat ang pagpatindog sang templo (23-24)

4  Sang nabatian sang mga kaaway sang Juda kag Benjamin+ nga ginpatindog sang mga nagbalik+ halin sa pagkatapok ang templo ni Jehova nga Dios sang Israel,  nagkadto sila gilayon kay Zorobabel kag sa mga pangulo sang mga panimalay sang Israel kag nagsiling sa ila: “Mabulig kami sa inyo sa pagpatindog, kay nagasimba* man kami sa inyo Dios+ kaangay ninyo kag nagahalad kami sa iya sugod sang panahon ni Esar-hadon+ nga hari sang Asiria, nga amo ang nagdala sa amon diri.”+  Apang, si Zorobabel kag si Jesua kag ang iban pa nga pangulo sang mga panimalay sang Israel nagsabat: “Wala kamo sing kinamatarong nga magbulig sa amon sa pagpatindog sang balay sang amon Dios,+ kay kami lang ang magapatindog sang balay ni Jehova nga Dios sang Israel, subong sang ginsugo sa amon ni Hari Ciro sang Persia.”+  Kag ang mga katawhan sa palibot padayon nga nagapaluya sang buot* sang mga taga-Juda agod mag-untat sila sa pagpatindog.+  Nagsuhol sila sang mga manuglaygay agod mapauntat ang pagpatindog+ halin sang panahon ni Hari Ciro sang Persia tubtob sang panahon ni Hari Dario+ sang Persia.  Sang nagsugod sa paghari si Ahasuero, nagsulat sila sing panumbungon batok sa mga taga-Juda kag sa mga taga-Jerusalem.  Kag sang panahon man ni Hari Artajerjes sang Persia, sanday Bislam, Mitredat, Tabeel, kag ang iban pa nila nga kaupod nagsulat kay Artajerjes nga hari, kag ang ila sulat ginbadbad kag ginsulat sa Aramaiko.*+  * Si Rehum nga puno nga opisyal sang panguluhan kag si Simsai nga escriba nagsulat kay Hari Artajerjes batok sa Jerusalem, subong sang masunod:  (Halin ini kay Rehum nga puno nga opisyal sang panguluhan kag kay Simsai nga escriba kag sa iban pa nila nga kaupod, sa mga hukom kag sa iban pa nga gobernador, sa mga sekretaryo, sa mga taga-Erec,+ sa mga taga-Babilonia, kag sa mga taga-Susa+ ukon taga-Elam,+ 10  kag sa iban pa nga pungsod nga gindala nga tinapok sang gamhanan kag dungganon nga si Asenapar kag ginpapuyo sa mga siudad sang Samaria,+ kag sa iban pa nga duog sa Tabok sang Suba,* 11  kag amo ini ang kopya sang sulat nga ila ginpadala sa iya.) “Para kay Hari Artajerjes, halin sa imo mga alagad sa Tabok sang Suba: 12  Dapat mahibaluan sang hari nga ang mga Judiyo nga nagkari sa amon halin sa inyo nag-abot sa Jerusalem. Ginapatindog nila liwat ang rebelyuso kag malaut nga siudad, kag ginakay-o nila ang mga pader+ kag ang mga pundasyon sini. 13  Dapat mahibaluan sang hari nga sa tion nga mapatindog liwat ini nga siudad kag mahuman ang mga pader sini, indi na sila magbayad sang mga buhis,*+ kag mangin kapierdihan ini sa mga bahandian sang mga hari. 14  Sanglit nagakaon kami sang asin sang palasyo* kag indi namon luyag makita nga matabo ini sa hari, nagsulat kami sa hari, 15  agod mausisa ang libro sang maragtas sang inyo mga katigulangan.+ Mahibaluan ninyo sa libro sang maragtas nga ini nga siudad rebelyuso kag naghatag sing gamo sa mga hari kag mga probinsia,* kag halin pa sang una may mga nagapanguna sa pagrebelde halin sa sini nga siudad. Amo ina ang kabangdanan kon ngaa ginlaglag ini nga siudad.+ 16  Ginapahibalo namon ini sa hari nga kon mapatindog liwat ini nga siudad kag mahuman ang mga pader sini, wala ka na sing kontrol* sa imo teritoryo sa Tabok sang Suba.”+ 17  Amo ini ang sabat sang hari kay Rehum nga puno nga opisyal sang panguluhan kag kay Simsai nga escriba kag sa iban pa nila nga kaupod nga nagaistar sa Samaria kag sa iban nga duog sa Tabok sang Suba: “Paghidait sa inyo! 18  Ang inyo ginpadala nga sulat ginbasa sing maathag* sa akon. 19  Gani nagsugo ako nga usisaon ini, kag napamatud-an gid nga halin pa sang una, ini nga siudad nagabato sa mga hari kag pirme nagarebelde.+ 20  Ang Jerusalem may gamhanan nga mga hari kag naggahom sila sa tanan nga lugar sa Tabok sang Suba, kag ginbayad sa ila ang mga buhis.* 21  Gani pauntata ninyo ini nga mga tawo sa pag-obra agod indi mapatindog ang siudad tubtob ipahanugot ko. 22  Tumana gid ninyo ini agod indi na mahalitan pa ang hari.”+ 23  Pagkatapos nga ang sulat ni Hari Artajerjes ginbasa kay Rehum kag kay Simsai nga escriba kag sa ila mga kaupod, nagkadto sila gilayon sa Jerusalem kag ginpilit ang mga Judiyo nga mag-untat sa pag-obra. 24  Gani nauntat ang pagpatindog sang balay sang Dios sa Jerusalem tubtob sa ikaduha nga tuig sang paghari ni Hari Dario sang Persia.+

Footnote

Sa literal, “nagapangita.”
Sa literal, “nagapaluya sang mga kamot.”
Ukon mahimo, “ginsulat ini sa Aramaiko kag dayon ginbadbad.”
Sa orihinal, ang Esd 4:8 tubtob 6:18 ginsulat sa Aramaiko.
Ukon “Tabok-Eufrates.”
Sa orihinal nga lenguahe, tatlo ka sahi sang buhis ang ginapatuhuyan diri: personal nga buhis; alkabala; kag buhis nga ginabayad sang mga nagalabay sa dalan.
Ukon “ginasuelduhan kami sang palasyo.”
Ukon “sakop nga mga distrito.”
Sa literal, “bahin.”
Ukon mahimo, “ginbadbad kag ginbasa.”
Sa orihinal nga lenguahe, tatlo ka sahi sang buhis ang ginapatuhuyan diri: personal nga buhis; alkabala; kag buhis nga ginabayad sang mga nagalabay sa dalan.