Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Esdras 3:1-13

BALAYAN SANG KAUNDAN

  • Gintukod liwat ang halaran kag ginhalad ang mga halad (1-7)

  • Nagsugod ang pagpatindog sang templo (8, 9)

  • Ginpasad ang sadsaran sang templo (10-13)

3  Sang nag-abot ang ikapito nga bulan+ kag sang nagaistar na sa ila mga siudad ang mga Israelinhon,* nagtipon sila nga may paghiusa sa Jerusalem.  Si Jesua+ nga anak ni Jehozadak, ang iya mga kaupod nga saserdote, si Zorobabel+ nga anak ni Sealtiel,+ kag ang iya mga utod naghanda sa pagtukod sang halaran sang Dios sang Israel, agod makadulot sila sang mga halad nga sinunog sa sini, suno sa nasulat sa Kasuguan ni Moises,+ ang tawo sang matuod nga Dios.  Gani gintukod nila ang halaran sa ginatindugan sini anay, bisan pa nahadlok sila sa mga katawhan sa palibot nila,+ kag nagdulot sila sa ibabaw sini sang mga halad nga sinunog sa aga kag sa gab-i para kay Jehova.+  Dayon ginhiwat nila ang Kapiestahan sang mga Payagpayag* suno sa nasulat sa kasuguan,+ kag sa sini nga tion nagdulot sila sang mga halad nga sinunog sa halaran adlaw-adlaw suno sa kadamuon sang dapat idulot kada adlaw.+  Nagdulot man sila sang dulot nga sinunog+ adlaw-adlaw kag sang dulot nga sinunog para sa mga lati+ kag para sa tanan nga balaan nga kapiestahan+ para kay Jehova kag para sa tanan nga naghatag sang kinabubut-on nga dulot+ para kay Jehova.  Halin sang nahauna nga adlaw sang ikapito nga bulan+ nagdulot sila sang mga halad nga sinunog para kay Jehova, bisan wala pa mapasad ang pundasyon sang templo ni Jehova.  Ginhatagan nila sing kuarta ang mga manugtabas sang bato+ kag ang sampaton nga mga manugpangabudlay,+ kag ginhatagan man nila sing pagkaon kag ilimnon kag lana ang mga taga-Sidon kag ang mga taga-Tiro bangod sa pagdala nila sang mga tablon nga sedro halin sa Lebanon tubtob sa pantalan sang Joppe,+ suno sa ginpahanugot sa ila ni Ciro nga hari sang Persia.+  Sang ikaduha nga bulan sang ikaduha nga tuig sang ila pag-abot sa balay sang matuod nga Dios sa Jerusalem, si Zorobabel nga anak ni Sealtiel, si Jesua nga anak ni Jehozadak kag ang iban pa nila nga mga utod, ang mga saserdote kag ang mga Levinhon, kag ang tanan nga bihag+ nga nagbalik sa Jerusalem nagsugod sa pagpatindog. Gintangdo nila subong mga manugdumala sang buluhaton sa balay ni Jehova ang mga Levinhon nga nagaedad sing 20 pataas.  Gani si Jesua, ang iya mga anak kag ang iya mga utod, kag si Kadmiel kag ang iya mga anak, nga mga anak ni Juda, kag ang mga anak ni Henadad+ kag ang ila mga anak kag ang ila mga utod, nga mga Levinhon man, magkaupod nga nagdumala sang mga nagatrabaho sa balay sang matuod nga Dios. 10  Sang napasad na sang mga manugtukod ang pundasyon sang templo ni Jehova,+ ang mga saserdote nga may mga trumpeta+ nga nagasuksok sang ila panapton para sa templo, kag ang mga Levinhon nga mga anak ni Asaf nga may mga simbal, nagdayaw kay Jehova suno sa ginpatuman ni Hari David sang Israel.+ 11  Nagbulosbulos sila sa pag-amba+ sing pagdayaw kag pagpasalamat kay Jehova, “kay sia maayo; ang iya mainunungon nga gugma sa Israel wala sing katapusan.”+ Kag ang tanan nga katawhan naghugyaw sa pagdayaw kay Jehova bangod napasad na ang sadsaran sang balay ni Jehova. 12  Madamo nga tigulang nga mga saserdote, mga Levinhon, kag mga pangulo sang panimalay nga nakakita sang nahauna nga balay+ ang naghibi sing mabaskog sang nakita nila ang pagpasad sang pundasyon, samtang ang iban nagsinggit sa kalipay.+ 13  Gani indi mahibaluan sang mga tawo ang singgit sang kalipay sa gahod sang paghibi, kay nagasininggit sila sing mabaskog, kag mabatian ini bisan sa malayo.

Footnote

Sa literal, “mga anak ni Israel.”
Ukon “Temporaryo nga mga Puluy-an.”