Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Esdras 1:1-11

BALAYAN SANG KAUNDAN

  • Si Hari Ciro nagsugo nga patindugon liwat ang templo (1-4)

  • Paghanda sang mga tinapok sa pagbalik halin sa Babilonia (5-11)

1  Sang nahauna nga tuig sang paggahom ni Hari Ciro+ sang Persia, gintandog ni Jehova ang iya tagipusuon agod matuman ang ginhambal ni Jehova paagi kay Jeremias.+ Gani, nagpasulat sia sing sugo kag ginpahibalo ini sa bug-os niya nga ginharian,+ nga nagasiling:  “Amo ini ang ginsiling ni Hari Ciro sang Persia, ‘Ginhatag sa akon ni Jehova nga Dios sang langit ang tanan nga ginharian sa duta+ kag ginsugo niya ako nga magtukod sing balay para sa iya sa Jerusalem+ nga sakop sang Juda.  Kabay pa nga mangin kaupod sang iya Dios ang bisan sin-o sa inyo nga nagaalagad sa iya. Magbalik sia sa Jerusalem nga sakop sang Juda kag tukuron liwat ang balay ni Jehova nga Dios sang Israel—sia ang matuod nga Dios—nga ang balay yara sa Jerusalem.*  Ang bisan sin-o nga magabalik+ buligan sang iya mga kaingod nga magapabilin.* Padalhan nila sia sing pilak kag bulawan kag kinahanglanon nga mga butang kag mga sapat lakip ang kinabubut-on nga dulot para sa balay sang matuod nga Dios+ sa Jerusalem.’ ”  Kag ang mga pangulo sang mga panimalay* sang Juda kag sang Benjamin kag ang mga saserdote kag mga Levinhon—ang tanan nga ang ila tagipusuon gintandog sang matuod nga Dios—naghanda sa paglakat agod patindugon liwat ang balay ni Jehova sa Jerusalem.  Ang tanan nila nga kaingod nagsakdag sa ila paagi sa paghatag sing* mga kagamitan nga pilak kag bulawan, mga pagkabutang, mga sapat, kag iban pa nga malahalon nga mga butang, wala labot sa tanan nila nga kinabubut-on nga dulot sa balay sang Dios.  Ang mga kagamitan sa balay ni Jehova nga ginkuha ni Nabocodonosor sa Jerusalem kag ginbutang sa balay sang iya dios, ginpagua man ni Hari Ciro.+  Gintugyan ini ni Hari Ciro sang Persia kay Mitredat nga tresurero. Dayon gin-isip ini ni Mitredat kag ginhatag kay Sesbazar*+ nga pangulo sang Juda.  Amo sini ang kadamuon: 30 ka bulawan nga alat, 1,000 ka pilak nga alat, 39 ka iban pa nga alat, 10  30 ka magagmay nga bulawan nga yahong, 410 ka pilak nga yahong, 1,000 ka iban pa nga kagamitan. 11  Ang kabug-usan nga kagamitan nga bulawan kag pilak 5,400. Gindala ini tanan ni Sesbazar sang ang mga tinapok+ nagbalik sa Jerusalem halin sa Babilonia.

Footnote

Ukon mahimo, “nga yara sa Jerusalem.”
Sa literal, “sang mga tawo sa iya lugar.”
Ukon “panimalay sa bahin sang amay.”
Sa literal, “nagpabaskog sang ila mga kamot sang.”
Mahimo nga si Zorobabel sa Esd 2:2; 3:8.