Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Bugna 13:1-18

BALAYAN SANG KAUNDAN

  • Mabangis nga sapat nga may pito ka ulo halin sa dagat (1-10)

  • Mabangis nga sapat nga may duha ka sungay halin sa duta (11-13)

  • Imahen sang mabangis nga sapat nga may pito ka ulo (14, 15)

  • Ang marka kag numero sang mabangis nga sapat (16-18)

13  Kag nagtindog ini* sa balas sang dagat. Kag nakita ko ang mabangis nga sapat+ nga nagatakas sa dagat,+ nga may napulo ka sungay kag pito ka ulo, kag sa mga sungay sini may napulo ka korona, apang sa mga ulo sini may mga ngalan nga nagapasipala sa Dios.  Ang mabangis nga sapat nga akon nakita kaangay sang leopardo, apang ang mga tiil sini kaangay sang mga tiil sang oso, kag ang baba sini kaangay sang baba sang leon. Kag ang dragon+ naghatag sa sapat sang gahom, trono, kag sang daku nga awtoridad.+  Nakita ko nga ang isa sa mga ulo sini napilasan sing malubha. Bisan pa malubha ang pilas nag-ayo ini,+ kag ang bug-os nga duta nagsunod sa mabangis nga sapat nga may pagdayaw.  Ginsimba nila ang dragon bangod ginhatagan sini sang awtoridad ang mabangis nga sapat. Kag ginsimba man nila ang mabangis nga sapat, nga nagasiling: “Sin-o ang kaangay sa mabangis nga sapat, kag sin-o ang makapakig-away sa sini?”  Ginhatagan ini sang dragon sang isa ka baba nga nagahambal sang matinaastaason nga mga butang kag mga pasipala kag sing awtoridad sa pagpanghikot sa sulod sang 42 ka bulan.+  Kag ang baba sini nagpasipala+ sa Dios, sa iya ngalan kag sa iya puluy-an, kag sa mga nagaistar sa langit.+  Gintugutan ini sa pagpakig-away sa mga balaan kag sa pagdaug sa ila,+ kag ginhatagan ini sing awtoridad sa tagsa ka tribo kag katawhan kag hambal kag pungsod.  Kag ang tanan nga nagaistar sa duta magasimba sa sini. Kutob sa pagtukod sa kalibutan, wala sing isa sa ila ngalan ang nasulat sa linukot sang kabuhi+ nga iya sang Kordero nga ginpatay.+  Ang bisan sin-o nga makabati, magpamati sing maayo.+ 10  Kon ang bisan sin-o dapat mabihag, mabihag sia. Kon ang bisan sin-o magpatay paagi sa espada,* dapat sia patyon paagi sa espada.+ Nagakinahanglan ini sang pagbatas+ kag pagtuo+ sa bahin sang mga balaan.+ 11  Dayon nakita ko ang isa pa ka mabangis nga sapat nga nagagua sa duta. May duha ini ka sungay nga kaangay sa iya sang kordero, apang nagahambal ini kaangay sang dragon.+ 12  Ginagamit sini ang bug-os nga awtoridad sang nahauna nga mabangis nga sapat+ sa atubangan sini. Kag ginapasimba sini ang duta kag ang mga nagaistar sa sini sa nahauna nga mabangis nga sapat, nga napilasan sing malubha apang nag-ayo.+ 13  Kag nagahimo ini sing dalagku nga mga tanda, nagpapanaug pa gani ini sang kalayo sa duta halin sa langit sa atubangan sang mga tawo. 14  Ginapatalang sini ang mga nagaistar sa duta, bangod gintugutan ini nga maghimo sing mga tanda sa atubangan sang mabangis nga sapat, kag ginasugo sini ang mga nagaistar sa duta nga maghimo sang larawan+ sang mabangis nga sapat nga napilasan sang espada apang nabuhi pa.+ 15  Kag gintugutan ini sa paghatag sing ginhawa* sa larawan sang mabangis nga sapat, agod ang larawan sang mabangis nga sapat makahambal kag makapatay sa tanan nga indi magsimba sa sini. 16  Ginapilit sini nga markahan sa tuo nga kamot ukon sa agtang ang tanan nga tawo,+ ang mga kubos, ang mga kadalagkuan, ang mga manggaranon, ang mga imol, ang mga hilway, kag ang mga ulipon, 17  agod wala sing makabakal ukon makabaligya luwas lamang sa tawo nga may marka—ang ngalan+ sang mabangis nga sapat ukon ang numero sang ngalan sini.+ 18  Diri kinahanglan ang kaalam: Ang may paghangop makahibalo sang kahulugan sang numero sang mabangis nga sapat, kay numero ini sang tawo, kag ang numero sini 666.+

Footnote

Ang dragon.
Ukon mahimo, “mapatay sa espada.”
Ukon “espiritu.”