Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Binuhatan 18:1-28

BALAYAN SANG KAUNDAN

  • Ministeryo ni Pablo sa Corinto (1-17)

  • Pagbalik sa Antioquia sa Siria (18-22)

  • Nagkadto si Pablo sa Galacia kag Frigia (23)

  • Si Apolos ginbuligan (24-28)

18  Pagkatapos sini naghalin sia sa Atenas kag nagkadto sa Corinto.  Nakilala niya didto ang isa ka Judiyo nga si Aquila+ nga tumandok sang Ponto. Bag-o lang nag-abot si Aquila halin sa Italya upod sa iya asawa nga si Priscila, bangod nagmando si Emperador Claudio sa tanan nga Judiyo nga maghalin sa Roma. Gani nagkadto sia sa ila,  kag bangod pareho sila sing palangitan-an, nga amo ang paghimo sing tolda, nagdayon sia sa ila puluy-an kag nag-updanay sila sa ila obra.+  Nagapamulongpulong sia* sa sinagoga+ kada adlaw nga inugpahuway+ kag ginakumbinsi niya ang mga Judiyo kag mga Griego nga magtuo.  Sang mag-abot si Silas+ kag si Timoteo+ halin sa Macedonia, nangin masako gid si Pablo sa pagbantala sang pulong sang Dios, kag sa pagpanaksi sa mga Judiyo agod pamatud-an nga si Jesus amo gid ang Cristo.+  Apang sang ginpamatukan nila sia kag ginpakalain, ginwaswas niya ang iya bayo+ kag nagsiling sa ila: “Kamo ang may salabton sa inyo kamatayon.*+ Wala ako sing sala.+ Sugod karon makadto ako sa mga tawo nga indi Judiyo.”+  Gani naghalin sia didto* kag nagsaylo sa balay ni Titio Justo, nga isa ka sumilimba sang Dios, kag ang iya balay nagatambi sa sinagoga.  Apang si Crispo+ nga nagadumala nga opisyal sang sinagoga nangin tumuluo sa Ginuo, pati na ang iya bug-os nga panimalay. Kag madamo nga taga-Corinto nga nakabati sing maayong balita ang nagtuo kag nagpabawtismo.  Isa ka gab-i, nakakita si Pablo sing palanan-awon kag nabatian niya nga nagsiling ang Ginuo: “Indi ka magkahadlok, padayon ka nga magbantala kag indi ka mag-untat, 10  kay kaupod mo ako+ kag wala sing tawo nga maghalit sa imo; kay madamo pa nga tawo ang magatuo sa akon sa sini nga siudad.” 11  Gani nagpabilin sia didto sing isa ka tuig kag anom ka bulan, kag gintudlo niya sa ila ang pulong sang Dios. 12  Sang si Galio ang proconsul* sa Acaya, gindakop sang mga Judiyo si Pablo kag gindala sia sa lingkuran nga hukmanan. 13  Nagsiling sila: “Ini nga tawo nagakumbinsi sa mga tawo nga simbahon ang Dios sa paagi nga supak sa kasuguan.” 14  Apang sang mahambal na kuntani si Pablo, nagsiling si Galio sa mga Judiyo: “Kon ini nga tawo nakahimo sing sala ukon krimen, may rason ako nga pamatian kamo. 15  Apang kon ini tuhoy lang sa mga pulong kag mga ngalan kag sa inyo kasuguan,+ kamo na ang bahala sa sini. Indi ko luyag mangin hukom sa sini nga mga butang.” 16  Dayon ginpahalin niya sila sa lingkuran nga hukmanan. 17  Gani gindakop nila si Sostenes,+ ang nagadumala nga opisyal sang sinagoga, kag ginbunal sia sa atubangan sang lingkuran nga hukmanan. Apang wala gid magpasilabot si Galio sa sini. 18  Apang, pagkatapos niya magtener didto sing pila pa ka adlaw, nagpaalam si Pablo sa mga kauturan kag nagpanakayon pakadto sa Siria. Kaupod niya si Priscila kag si Aquila. Ginpautdan niya sing malip-ot ang iya buhok sa Cencrea,+ kay may panaad sia sa Dios. 19  Pag-abot nila sa Efeso, ginbilin niya sila sa siudad; apang nagsulod si Pablo sa sinagoga kag nangatarungan sia sa mga Judiyo.+ 20  Ginpangabay nila sia nga magtener pa sing malawig, apang wala sia magsugot. 21  Nagpaalam sia kag nagsiling sa ila: “Mabalik ako liwat sa inyo, kon kabubut-on ni Jehova.”* Halin sa Efeso, nagpanakayon sia 22  kag nakalab-ot sa Cesarea. Dayon nagtaklad sia sa Jerusalem kag naghapit sing makadali sa kongregasyon kag nagdulhog sa Antioquia.+ 23  Pagkatapos makatener didto sing madugaydugay, naglakat sia kag ginduaw niya ang madamo nga lugar sa Galacia kag Frigia,+ kag ginpabakod niya ang tanan nga disipulo.+ 24  May nag-abot sa Efeso nga isa ka Judiyo nga si Apolos.+ Tumandok sia sang Alejandria kag maayo maghambal; kag madamo sia sing nahibaluan sa Kasulatan. 25  Ini nga tawo gintudluan* sang dalanon ni Jehova.* Bangod makugi gid sia tungod sang balaan nga espiritu, padayon sia nga nagbantala kag nagpanudlo sing sibu tuhoy kay Jesus. Apang ang pagbawtismo ni Juan amo lamang ang iya nahibaluan. 26  Maisog sia nga naghambal sa sinagoga, kag sang nabatian sia ni Priscila kag ni Aquila,+ ginpaupod nila sia sa ila kag ginpaathag sa iya sing sibu pa ang dalanon sang Dios. 27  Bangod luyag man niya magkadto sa Acaya, ginsulatan sang mga kauturan ang mga disipulo didto kag ginpalig-on sila nga batunon sia. Pag-abot niya didto, daku gid ang iya nabulig sa mga nagtuo tungod sa wala tupong nga kaayo sang Dios; 28  kay maisog nga ginpamatud-an gid niya sing dayag nga sayop ang mga Judiyo, samtang ginpakita niya paagi sa Kasulatan nga si Jesus amo ang Cristo.+

Footnote

Ukon “Nagapangatarungan sia sa ila.”
Sa literal, “Ang inyo dugo mangin sa inyo mga ulo.”
Sa sinagoga.
Romano nga gobernador sang probinsia. Tan-awa ang Glossary.
Tan-awa ang Apendise A5.
Ukon “gintudluan paagi sa hambal.”
Tan-awa ang Apendise A5.