Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

Binuhatan 16:1-40

BALAYAN SANG KAUNDAN

  • Ginpili ni Pablo si Timoteo (1-5)

  • Palanan-awon tuhoy sa lalaki nga taga-Macedonia (6-10)

  • Si Lidia nakumbertir sa Filipos (11-15)

  • Si Pablo kag si Silas ginbilanggo (16-24)

  • Manugbilanggo kag iya panimalay nabawtismuhan (25-34)

  • Luyag ni Pablo nga mangayo pasaylo ang mga opisyal (35-40)

16  Gani nagkadto si Pablo sa Derbe kag sa Listra+ man. May isa ka disipulo didto nga ang ngalan Timoteo.+ Anak sia sang isa ka tumuluo nga Judiyo nga babayi apang ang iya amay Griego,  kag maayo ang ginasugid tuhoy sa iya sang mga kauturan sa Listra kag Iconio.  Luyag sia updon ni Pablo sa iya paglakat. Gani gin-upod sia ni Pablo apang gintuli sia anay bangod sa mga Judiyo sa amo nga mga lugar,+ kay nahibaluan nila tanan nga ang iya amay isa ka Griego.  Samtang nagalakbay sila sa mga siudad, ginapaalinton nila sa mga kauturan ang dapat tumanon nga mga pagsulundan nga ginpamat-uran sang mga apostoles kag sang mga gulang sa Jerusalem.+  Gani, padayon nga naglig-on sa pagtuo ang mga kongregasyon kag nagdugang ang ila kadamuon adlaw-adlaw.  Dugang pa, naglibot sila sa Frigia kag sa Galacia,+ bangod gindumilian sila sang balaan nga espiritu nga magbantala sang pulong sang Dios sa probinsia sang Asia.  Sang nagdulhog sila sa Misia, luyag nila kuntani magkadto sa Bitinia,+ apang wala sila gintugutan sang espiritu ni Jesus.  Gani nag-agi na lang sila sa Misia kag nagdulhog sa Troas.  Sadto nga gab-i nakakita si Pablo sing isa ka palanan-awon—isa ka lalaki nga taga-Macedonia nga nagatindog kag nagapangabay sa iya: “Tabok ka diri sa Macedonia kag buligi kami.” 10  Sang makita ni Pablo ang palanan-awon, nagtinguha kami dayon nga magkadto sa Macedonia, kay ginhangop namon ini nga gintawag kami sang Dios agod ibantala ang maayong balita sa ila. 11  Gani nagpanakayon kami halin sa Troas kag nagdiretso sa Samotracia, apang pagkadason nga adlaw nagkadto kami sa Neapolis; 12  kag halin didto nagkadto kami sa Filipos,+ isa ka kolonya nga amo ang panguna nga siudad sa distrito sang Macedonia. Nagtener kami sing pila ka adlaw sa sini nga siudad. 13  Sang Adlaw nga Inugpahuway naggua kami sa gawang sang siudad kag nagkadto sa higad sang suba, kay naghunahuna kami nga may lugar nga palangamuyuan didto. Nagpungko kami kag nagbantala sa mga babayi nga nagtipon didto. 14  May nagpamati sa amon nga isa ka babayi nga si Lidia, nga manugbaligya sing purpura nga mga tela.* Halin sia sa siudad sang Tiatira+ kag isa ka sumilimba sang Dios. Ginbuksan ni Jehova* ang iya tagipusuon agod batunon niya ang mga ginahambal ni Pablo. 15  Sang mabawtismuhan sia kag ang iya panimalay,+ gin-agda niya kami: “Kon ginakabig ninyo ako nga matutom kay Jehova,* magdayon kamo sa akon balay.” Kag ginpilit gid niya kami. 16  Samtang nagapakadto kami sa lugar nga palangamuyuan, ginsugata kami sang isa ka alagad nga dalagita nga may demonyo. Mapaktan sini nga dalagita ang matabo sa palaabuton+ kag bangod sini, nakapanguarta sing daku ang iya mga agalon. 17  Nagsunodsunod sa amon ini nga dalagita kag nagasinggit sia: “Ini nga mga tawo mga ulipon sang Labing Mataas nga Dios+ kag ginabantala nila sa inyo ang dalanon sang kaluwasan.” 18  Padayon niya nga ginhimo ini sa sulod sang madamo nga adlaw. Sang ulihi tinak-an si Pablo sa sini. Gani, nagbalikid sia kag nagsiling sa espiritu: “Sa ngalan ni Jesucristo, ginamanduan ko ikaw nga maggua ka sa iya.” Kag gilayon nga naggua sa iya ang espiritu.+ 19  Sang makita sang iya mga agalon nga wala na sila sing paglaum nga makakuarta paagi sa iya,+ gindakop nila si Pablo kag si Silas kag ginganoy sila pakadto sa mga manugdumala nga yara sa tiendahan.+ 20  Gindala nila sila sa mga mahistrado sibil kag nagsiling: “Ginagamo sini nga mga tawo ang aton siudad.+ Mga Judiyo sila, 21  kag nagapanudlo sila sing mga kinabatasan nga indi tugot sa kasuguan nga sundon ukon himuon naton, bangod mga Romano kita.” 22  Akig nga naghambal ang mga tawo batok sa ila, kag nagsugo ang mga mahistrado sibil nga gision ang ila mga panapton kag bunalon sila sing mga bilugon.+ 23  Sa tapos sila ginbunal sing madamo nga beses, ginbilanggo nila sila kag ginmanduan nila ang manugbilanggo nga bantayan gid sila sing maayo.+ 24  Bangod sang ginmando sa iya, ginbutang niya sila sa sulod gid nga selda sang bilangguan kag ginbutang ang ila mga tiil sa mga pandog. 25  Apang sang mga tungang-gab-i na, si Pablo kag si Silas nagpangamuyo kag nagdayaw sa Dios paagi sa ambahanon,+ kag nagapamati sa ila ang mga bilanggo. 26  Sa hinali lang naglinog sing mabaskog kag nag-uyog ang mga pundasyon sang bilangguan. Dugang pa, hinali nga nagbukas ang tanan nga puertahan, kag nahubad ang mga gapos sang tanan.+ 27  Nakabugtaw ang manugbilanggo kag sang makita niya nga nabuksan ang mga puertahan sang bilangguan, gingabot niya ang iya espada kag luyag niya kuntani manginmatay, kay nagdumdom sia nga nakapalagyo ang mga bilanggo.+ 28  Apang nagsinggit si Pablo: “Indi paghaliti ang imo kaugalingon, kay yari pa kami tanan diri!” 29  Gani nagpangayo sia sing mga suga kag dalidali nga nagsulod. Nagakurog nga naghapa sia sa atubangan ni Pablo kag ni Silas. 30  Gindala niya sila sa gua kag nagsiling: “Mga Ginuo, ano ang dapat ko himuon agod maluwas ako?” 31  Nagsiling sila: “Magtuo ka kay Ginuong Jesus, kag maluwas ka, ikaw kag ang imo panimalay.”+ 32  Dayon ginhambal nila ang pulong ni Jehova* sa iya kag sa tanan nga yara sa iya panimalay. 33  Kag sadto nga oras sang kagab-ihon gin-upod niya sila kag ginhugasan niya ang ila mga pilas. Kag sia kag ang iya bug-os nga panimalay ginbawtismuhan dayon.+ 34  Gindala niya sila sa iya balay kag naghanda sia sing pagkaon sa lamesa para sa ila, kag nagkasadya gid sia upod sa iya bug-os nga panimalay karon nga nagatuo na sia sa Dios. 35  Sang adlaw na, nagpadala ang mga mahistrado sibil sing mga guardia agod magsiling: “Buy-i ini nga mga tawo.” 36  Gani ginbalita sang manugbilanggo kay Pablo ang ila ginsiling: “Nagpadala ang mga mahistrado sibil sing mga tawo agod buy-an kamo nga duha. Gani, maggua na kamo kag maayo lang nga paglakat.” 37  Apang nagsiling si Pablo sa ila: “Ginbunal nila kami sing dayag nga wala pa mapamatbatan,* bisan pa mga Romano kami,+ kag ginbilanggo kami. Karon paguaon nila kami sing tago? Indi ina mahimo! Dapat sila ang magkadto diri kag paguaon kami.” 38  Ginsugid ini sang mga guardia sa mga mahistrado sibil. Kag hinadlukan sila sang mabatian nila nga mga Romano gali ini nga mga tawo.+ 39  Bangod sini nagkadto sila kag nagpangabay sa ila, kag sang mapagua na nila sila, ginpangabay nila nga maghalin na sila sa siudad. 40  Apang naggua sila sa bilangguan kag nagkadto sa balay ni Lidia. Sang makita nila ang mga kauturan, ginpalig-on nila sila+ kag dayon naglakat.

Footnote

Ukon “manugbaligya sing purpura nga lugom.” Ang kolor nga purpura kombinasyon sang pula kag asul.
Tan-awa ang Apendise A5.
Tan-awa ang Apendise A5.
Tan-awa ang Apendise A5.
Ukon “wala pa mabista.”