Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Tesalonica 1:1-12

BALAYAN SANG KAUNDAN

  • Mga panamyaw (1, 2)

  • Nagatubo nga pagtuo sang mga taga-Tesalonica (3-5)

  • Pagtimalos sa wala nagatuman (6-10)

  • Pangamuyo para sa kongregasyon (11, 12)

1   Halin kay Pablo, Silvano,* kag Timoteo,+ para sa kongregasyon sang mga taga-Tesalonica nga nahiusa sa Dios nga aton Amay kag kay Ginuong Jesucristo:  Kabay nga mabaton ninyo ang wala tupong nga kaayo kag paghidait halin sa Dios nga aton Amay kag kay Ginuong Jesucristo.  Tungod sa inyo mga kauturan, obligado kami nga magpasalamat pirme sa Dios. Nagakaigo ini, bangod ang inyo pagtuo nagatubo sing labi gid kag ang gugma sang kada isa kag sang tanan nagadugang sa isa kag isa.+  Gani ginapabugal namon kamo+ sa mga kongregasyon sang Dios bangod sang inyo pagbatas kag pagtuo bisan pa sang mga paghingabot kag mga kabudlayan* nga inyo ginaantos.*+  Pamatuod ini sang matarong nga paghukom sang Dios, nga nagaresulta sa pagkabig sa inyo nga takus sa Ginharian sang Dios, nga tungod sini nagaantos gid kamo.+  Ini nga paghukom sang Dios matarong bangod balusan niya sing kapipit-an ang mga nagahatag sa inyo sing kapipit-an.+  Apang kamo nga nagaantos sang kapipit-an hatagan sang kapahuwayan kaupod namon kon ipahayag na si Ginuong Jesus+ halin sa langit kaupod ang iya gamhanan nga mga anghel+  sa nagadabdab nga kalayo, samtang ginatimalusan niya ang mga wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus.+  Magabaton sila sang silot nga wala sing katapusan nga kalaglagan+ kag mahamulag sila sa atubangan sang Ginuo kag sa himaya sang iya kusog. 10  Matabo ini kon mag-abot sia agod himayaon upod sa iya mga balaan, kag sa amo man nga adlaw dayawon sia sa tunga sang tanan nga nagtuo sa iya, bangod ginpatihan ninyo ang amon ginpanaksi. 11  Tungod gid sini nagapangamuyo kami pirme para sa inyo, nga kabigon kamo sang aton Dios nga takus sa iya pagtawag.+ Kag kabay nga paagi sa iya gahom himuon niya sing bug-os ang tanan nga maayo nga iya nahamut-an kag himuon nga madinalag-on ang tanan ninyo nga buhat sang pagtuo. 12  Ini agod paagi sa inyo mahimaya ang ngalan sang aton Ginuong Jesus kag mahiusa kamo sa iya, suno sa wala tupong nga kaayo sang aton Dios kag ni Ginuong Jesucristo.

Footnote

Ginatawag man nga Silas.
Ukon “kapipit-an.”
Ukon “ginabatas.”