Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Samuel 6:1-23

BALAYAN SANG KAUNDAN

  • Ang Kaban gindala sa Jerusalem (1-23)

    • Si Uzah nag-uyat sa Kaban kag napatay (6-8)

    • Gintamay ni Mical si David (16, 20-23)

6  Gintipon liwat ni David ang 30,000 ka pinili nga soldado sang Israel.  Dayon nagkadto si David sa Baale-juda upod ang iya mga tinawo agod kuhaon didto ang Kaban sang matuod nga Dios.+ Sa atubangan sini nagatawag ang katawhan sa ngalan ni Jehova sang mga kasuldadusan+ nga nagapungko sa trono sa ibabaw* sang mga kerubin.+  Ginkuha nila ang Kaban sang matuod nga Dios sa balay ni Abinadab+ nga yara sa bakulod, apang ginkarga nila ini sa isa ka bag-o nga karo.+ Si Uzah kag si Ahio nga mga anak ni Abinadab ang nagagiya sa bag-o nga karo.  Gani ginkuha nila ang Kaban sang matuod nga Dios sa balay ni Abinadab nga yara sa bakulod. Si Ahio nagalakat sa unahan sang Kaban.  Nagsaulog si David kag ang bug-os nga panimalay sang Israel sa atubangan ni Jehova nga nagapatokar sang tanan nga instrumento nga human sa kahoy nga junipero, mga arpa, iban pa nga de-kuerdas nga mga instrumento,+ mga tamburin,+ mga simbal, kag iban pa nga mga instrumento.+  Apang sang makalab-ot sila sa linasan ni Nacon, gin-uyatan ni Uzah ang Kaban sang matuod nga Dios+ kay diutayan lang magbaliskad ang karo bangod sang mga baka nga nagadala sini.  Bangod sini, nagdabdab ang kaakig ni Jehova kay Uzah, kag ginpatay sia sang matuod nga Dios+ bangod sang iya indi matinahuron nga buhat.+ Napatay sia sa tupad sang Kaban sang matuod nga Dios.  Apang naakig si David bangod ginhukman dayon ni Jehova si Uzah. Amo kon ngaa gintawag yadto nga duog nga Perez-uzah* tubtob sini nga adlaw.  Gani hinadlukan si David kay Jehova+ sina nga adlaw kag nagsiling sia: “Paano madala sa akon ang Kaban ni Jehova?”+ 10  Indi luyag ni David nga dalhon sa iya sa Siudad ni David ang Kaban ni Jehova.+ Gani ginpadala niya ini sa balay ni Obed-edom+ nga Gathanon. 11  Nagpabilin ang Kaban ni Jehova sa balay ni Obed-edom nga Gathanon sing tatlo ka bulan, kag ginpakamaayo ni Jehova si Obed-edom kag ang iya bug-os nga panimalay.+ 12  Sang ulihi, ginbalitaan si Hari David: “Ginpakamaayo ni Jehova ang panimalay ni Obed-edom kag ang tanan nga iya ginapanag-iyahan bangod sang Kaban sang matuod nga Dios.” Gani ginkuha ni David ang Kaban sang matuod nga Dios sa balay ni Obed-edom. Nagasinadya sila samtang ginadala nila ini sa Siudad ni David.+ 13  Sang nakaanom na ka tikang ang mga nagadala+ sang Kaban ni Jehova, naghalad sia sing isa ka toro nga baka kag isa ka matambok nga sapat. 14  Nagsaot si David sa atubangan ni Jehova sa bug-os niya nga kusog kag nagasuksok* si David sing efod nga linen.+ 15  Samtang ginadala ni David kag sang bug-os nga panimalay sang Israel ang Kaban+ ni Jehova, nagahinugyaw sila+ kag nagapatunog sing budyong.+ 16  Sang makalab-ot ang Kaban ni Jehova sa Siudad ni David, nagtamwa sa bintana si Mical nga anak ni Saul.+ Sang makita niya si Hari David nga nagatumbotumbo kag nagasaot sa atubangan ni Jehova, gintamay niya sia sa iya tagipusuon.+ 17  Ginbutang nila ang Kaban ni Jehova sa sulod sang tolda nga ginpatindog ni David.+ Dayon naghalad si David kay Jehova sing mga halad nga sinunog+ kag mga halad sa pag-ambitanay.*+ 18  Sang matapos na ni David ang paghalad sing mga halad nga sinunog kag mga halad sa pag-ambitanay, ginpakamaayo niya ang katawhan sa ngalan ni Jehova sang mga kasuldadusan. 19  Dayon ginhatagan niya ang tanan nga katawhan sang Israel, lalaki kag babayi, sing korte-pulseras nga tinapay, sing tinapay nga halin sa bunga sang palma, kag sing tinapay nga pasas. Dayon nagpauli ang tanan nga katawhan. 20  Pagpauli ni David agod pakamaayuhon ang iya panimalay, ginsugata sia ni Mical nga anak ni Saul.+ Nagsiling sia: “Daw ano ka halangdon ang hari sang Israel subong nga adlaw nga daw nagauba na sa atubangan sang ulipon nga mga babayi sang iya mga alagad, pareho sang buangbuang nga nagauba!”+ 21  Bangod sini, nagsiling si David kay Mical: “Para kay Jehova ang ginhimo ko. Ginpili niya ako sa baylo sang imo amay kag sang bug-os niya nga panimalay nga mangin lider sang katawhan ni Jehova nga Israel.+ Gani, magakasadya ako sa atubangan ni Jehova, 22  kag paubson ko pa ang akon kaugalingon agod mangin makahuluya ako. Apang padunggan ako sang mga ulipon nga babayi nga ginsiling mo.” 23  Bangod sini, si Mical nga anak ni Saul+ wala gid makabata tubtob napatay sia.

Footnote

Ukon mahimo, “tunga.”
Buot silingon, “Hinali nga Paghukom kay Uzah.”
Sa literal, “nagawagkus.”
Ukon “mga dulot para sa paghidait,” mga dulot nga nagapakita nga ang nagadulot may paghidait sa Dios.