Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Hari 25:1-30

BALAYAN SANG KAUNDAN

  • Ginkibon ni Nabocodonosor ang Jerusalem (1-7)

  • Nalaglag ang Jerusalem kag templo; ang ikaduha nga pagtapok (8-21)

  • Si Gedalias ginhimo gobernador (22-24)

  • Si Gedalias ginpatay; katawhan nalagyo sa Egipto (25, 26)

  • Jehoiakin ginpagua sa prisuhan (27-30)

25  Sang ikasiam nga tuig sang paggahom ni Sedequias, sa ikanapulo nga adlaw sang ikanapulo nga bulan, ginsalakay ni Hari Nabocodonosor+ sang Babilonia ang Jerusalem upod ang tanan niya nga soldado.+ Nagkampo sila batok sa siudad kag nagpatindog sing pader sa palibot sini sa pagkibon sini,+  kag nakibon ang siudad tubtob sang ika-11 nga tuig sang paggahom ni Hari Sedequias.  Sa ikasiam nga adlaw sang ikap-at nga bulan, sobra gid ang tiggulutom+ sa siudad kag wala na sing pagkaon ang katawhan.+  Ginrumpag ang isa ka bahin sang pader sang siudad,+ gani pagkagab-i nagpinalagyo ang tanan nga soldado kag nag-agi sila sa gawang sa ulot sang duha ka pader malapit sa hardin sang hari, samtang ginapalibutan sang mga Caldeanhon ang siudad. Nagpalagyo ang hari pakadto sa Araba.+  Apang ginlagas sang Caldeanhon nga mga soldado ang hari, kag naabtan nila sia sa desyerto nga kapatagan sang Jerico, kag nag-alaplaag ang tanan nga soldado sang hari.  Dayon gindakop nila ang hari+ kag gindala nila sia sa hari sang Babilonia sa Ribla, kag ginsentensiahan nila sia.  Ginpatay nila ang mga anak nga lalaki ni Sedequias sa atubangan niya. Dayon ginbulag ni Nabocodonosor si Sedequias kag ginkadenahan sing saway nga kadena kag gindala sa Babilonia.+  Sa ikapito nga adlaw sang ikalima nga bulan sang ika-19 nga tuig sang paggahom ni Hari Nabocodonosor nga hari sang Babilonia, nagkadto sa Jerusalem si Nebuzaradan+ nga pangulo sang mga bantay, nga alagad sang hari sang Babilonia.+  Ginsunog niya ang balay ni Jehova,+ ang balay* sang hari,+ kag ang tanan nga balay sa Jerusalem.+ Ginsunog man niya ang balay sang tanan nga prominente nga tawo.+ 10  Ginrumpag sang tanan nga Caldeanhon nga mga soldado nga kaupod sang pangulo sang mga bantay ang pader sa palibot sang Jerusalem.+ 11  Ginbihag ni Nebuzaradan nga pangulo sang mga bantay ang katawhan nga nabilin sa siudad, ang mga tawo nga nagdampig sa hari sang Babilonia, kag ang iban pa nga mga pumuluyo.+ 12  Apang ginbilin sang pangulo sang mga bantay ang pila sa pinakaimol nga mga tawo agod mag-atipan sang ulubasan kag magpanguma.+ 13  Gindugmok sang mga Caldeanhon ang mga haligi nga saway+ sa balay ni Jehova, ang mga karo+ kag ang saway nga suludlan sang tubig*+ sa balay ni Jehova, kag gindala nila ang saway sa Babilonia.+ 14  Ginkuha man nila ang mga suludlan sang abo, ang mga pala, ang mga inugpalong, ang mga kopa, kag ang tanan nga saway nga kagamitan nga ginagamit nila anay sa pag-alagad sa templo. 15  Ginkuha sang pangulo sang mga bantay ang mga incensario kag ang mga yahong nga puro nga bulawan+ kag pilak.+ 16  Mabudlay gid mahibaluan kon daw ano kabug-at ang tanan nga saway halin sa duha ka haligi, sa suludlan sang tubig, kag sa mga karo nga ginpahimo ni Solomon para sa balay ni Jehova.+ 17  Ang kataason sang kada haligi 18 ka maniko,*+ kag saway ang uloulo sini. Ang kataason sang uloulo tatlo ka maniko, kag saway tanan ang sinalapid nga kulukadena nga dekorasyon kag ang prutas nga mga granada sa palibot sini.+ Amo man sini sa ikaduha nga haligi. 18  Ginbihag man sang pangulo sang mga bantay si Seraya+ nga puno nga saserdote, si Sofonias+ nga ikaduha nga saserdote, kag ang tatlo ka manugbantay sang puertahan.+ 19  Ginbihag man niya halin sa siudad ang isa ka opisyal sang palasyo nga kumander sang mga soldado, ang lima ka manuglaygay sang hari nga didto sa siudad, ang sekretaryo sang pangulo sang mga soldado nga amo ang nagatipon sa mga soldado, kag ang 60 ka lalaki halin sa katawhan sang duta nga didto sa siudad. 20  Ginbihag sila ni Nebuzaradan+ nga pangulo sang mga bantay kag gindala sila sa hari sang Babilonia sa Ribla.+ 21  Ginpatay sila sang hari sang Babilonia sa Ribla sa duta sang Hamat.+ Gani halin sa ila duta, gindala nga mga bihag ang katawhan sang Juda.+ 22  Gintangdo ni Hari Nabocodonosor sang Babilonia si Gedalias+ nga anak ni Ahikam+ nga anak ni Safan+ nga amo ang magdumala sa katawhan nga ginbilin niya sa Juda.+ 23  Sang mabalitaan sang tanan nga pangulo sang mga soldado kag sang ila mga tinawo nga gintangdo sang hari sang Babilonia si Gedalias, nagkadto sila dayon kay Gedalias sa Mizpa. Ang nagkadto amo si Ismael nga anak ni Netanias, si Johanan nga anak ni Karea, si Seraya nga anak ni Tanhumet nga Netofanhon, kag si Jaazanias nga anak sang Maacatnon, upod ang ila mga tinawo.+ 24  Si Gedalias nagpanumpa sa ila kag sa ila mga tinawo kag nagsiling sia sa ila: “Indi kamo mahadlok nga mangin alagad sang mga Caldeanhon. Mag-istar kamo sa sini nga duta kag mag-alagad kamo sa hari sang Babilonia, kag mangin maayo ang inyo kahimtangan.”+ 25  Apang sang ikapito nga bulan, si Ismael+ nga anak ni Netanias nga anak ni Elisama nga kaliwat sang hari,* nag-abot sa Mizpa upod ang napulo ka tawo, kag ginpatay nila si Gedalias pati ang kaupod niya didto nga mga Judiyo kag mga Caldeanhon.+ 26  Bangod sini, ang tanan nga katawhan, pati ang mga pangulo sang mga soldado nagpalagyo sa Egipto,+ kay nahadlok sila kon ano ang himuon sang mga Caldeanhon.+ 27  Sang ika-37 nga tuig sang pagkabihag ni Hari Jehoiakin+ sang Juda, nangin hari si Hari Evil-merodac sa Babilonia. Sang ika-27 nga adlaw sang ika-12 nga bulan sadto nga tuig, ginpagua niya si* Hari Jehoiakin sang Juda sa prisuhan.+ 28  Maayo ang pagpakighambal niya kay Jehoiakin kag ginbayaw niya ang iya trono labaw sa mga trono sang iban nga mga hari nga kaupod niya sa Babilonia. 29  Gani gin-uba ni Jehoiakin ang bayo nga iya sang priso, kag nagakaon na sia upod sa hari sa bug-os niya nga kabuhi. 30  Ginahatagan sia sang hari sing pagkaon adlaw-adlaw sa bug-os niya nga kabuhi.

Footnote

Ukon “palasyo.”
Sa literal, “saway nga Dagat.”
Ang isa ka maniko katumbas sang 44.5 ka sentimetro (17.5 ka pulgada). Tan-awa ang Apendise B14.
Sa literal, “nga binhi sang ginharian.”
Sa literal, “ginbayaw niya ang ulo ni.”