Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Hari 24:1-20

BALAYAN SANG KAUNDAN

  • Jehoiakim nagrebelde kag napatay (1-7)

  • Si Jehoiakin, hari sang Juda (8, 9)

  • Una nga pagtapok sa Babilonia (10-17)

  • Si Sedequias, hari sang Juda; ang iya pagrebelde (18-20)

24  Sang panahon sang paghari ni Jehoiakim, ginsalakay ni Hari Nabocodonosor+ sang Babilonia ang Jerusalem, kag nangin alagad niya si Jehoiakim sing tatlo ka tuig. Apang nagrebelde sia sa hari sang Babilonia.  Ginpadala ni Jehova batok sa iya ang tulisan nga mga Caldeanhon,+ mga Sirianhon, mga Moabnon, kag ang mga Ammonhon. Ginpadala niya sila batok sa Juda agod laglagon ini, suno sa ginsiling ni Jehova+ paagi sa iya mga alagad nga mga manalagna.  Natabo ini sa Juda suno sa ginsugo ni Jehova, agod tabugon niya sila+ tungod sa tanan nga sala nga ginhimo ni Manases,+  kag tungod man sa ginpaagay niya nga dugo sang mga tawo nga wala sing sala,+ kay ginpuno niya ang Jerusalem sing dugo sang mga tawo nga wala sing sala kag indi ini mapatawad ni Jehova.+  Tuhoy sa iban pa nga natabo sa kabuhi ni Jehoiakim, ang tanan niya nga ginhimo, indi bala nga nasulat ini sa libro sang kasaysayan sang mga hari sang Juda?+  Sang ulihi, napatay si Jehoiakim pareho sang iya mga katigulangan.+ Si Jehoiakin nga iya anak amo ang nagbulos sa iya bilang hari.  Wala na liwat magpadala ang hari sang Egipto sing mga soldado halin sa Egipto, bangod naagaw sang hari sang Babilonia ang tanan nga duta sang hari sang Egipto+ halin sa Nalupyakan* sang Egipto+ tubtob sa Suba Eufrates.+  Nagaedad si Jehoiakin+ sing 18 ka tuig sang nangin hari sia, kag naggahom sia sa Jerusalem sing tatlo ka bulan.+ Ang iya iloy amo si Nehusta nga anak ni Elnatan nga taga-Jerusalem.  Ginhimo niya ang malain sa panulok ni Jehova, pareho sang tanan nga ginhimo sang iya amay. 10  Sadto nga tion, ginsalakay sang mga alagad ni Hari Nabocodonosor sang Babilonia ang Jerusalem, kag ginlikupan nila ang siudad.+ 11  Nag-abot si Hari Nabocodonosor sang Babilonia sa siudad, samtang ginalikupan sang iya mga alagad ang siudad. 12  Si Hari Jehoiakin sang Juda, upod ang iya iloy, ang iya mga alagad, ang iya mga prinsipe, kag ang iya mga opisyal sang palasyo nagkadto sa hari sang Babilonia.+ Ginbihag sia sang hari sang Babilonia sang ikawalo nga tuig sang iya paghari.+ 13  Ginkuha ni Nabocodonosor ang tanan nga bahandi sa balay ni Jehova kag sa balay* sang hari.+ Gindugmok niya ang tanan nga kagamitan nga bulawan sa templo ni Jehova nga ginhimo ni Solomon nga hari sang Israel,+ suno sa gintagna ni Jehova. 14  Ginbihag niya ang tanan sa Jerusalem, ang tanan nga prinsipe,+ ang tanan nga isganan nga soldado, kag ang tanan nga sampaton nga trabahador kag panday sa metal,*+ 10,000 tanan ang ginbihag niya. Ang mga pinakaimol lang ang nabilin.+ 15  Gani, halin sa Jerusalem, gindala niya nga bihag sa Babilonia si Jehoiakin,+ ang iloy sang hari, ang mga asawa sang hari, ang mga opisyal sang palasyo, kag ang kilala nga mga tawo. 16  Gintapok man sa Babilonia sang hari sang Babilonia ang 7,000 ka soldado, kag ang 1,000 ka sampaton nga trabahador kag panday sa metal.* Sila tanan isganan nga mga lalaki kag nahanas sa pagpakig-away. 17  Si Matanias nga tiyo ni Jehoiakin+ amo ang ginbulos sa iya sang hari sang Babilonia bilang hari kag gin-islan niya ang iya ngalan nga Sedequias.+ 18  Nagaedad si Sedequias sing 21 ka tuig sang nangin hari sia, kag naggahom sia sa Jerusalem sing 11 ka tuig. Ang iya iloy amo si Hamutal+ nga anak ni Jeremias nga taga-Libna. 19  Ginhimo niya ang malain sa panulok ni Jehova, pareho sang tanan nga ginhimo ni Jehoiakim.+ 20  Natabo ini sa Jerusalem kag sa Juda bangod sa kaakig ni Jehova amo nga gintabog niya sila.+ Nagrebelde si Sedequias sa hari sang Babilonia.+

Footnote

Tan-awa ang Glossary.
Ukon “palasyo.”
Ukon mahimo, “nagapanghimo sing mga kuta.”
Ukon mahimo, “nagapanghimo sing mga kuta.”