Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Hari 22:1-20

BALAYAN SANG KAUNDAN

  • Si Josias, hari sang Juda (1, 2)

  • Instruksion sa pagkay-o sa templo (3-7)

  • Libro sang Kasuguan nakit-an (8-13)

  • Kalamidad gintagna ni Hulda (14-20)

22  Nagaedad si Josias+ sing walo ka tuig sang nangin hari sia, kag naggahom sia sa Jerusalem sing 31 ka tuig.+ Ang iya iloy amo si Jedida nga anak ni Adaya nga taga-Bozkat.+  Ginhimo niya ang matarong sa panulok ni Jehova kag ginsunod niya ang bug-os nga dalanon ni David nga iya katigulangan.+ Nangin matinumanon gid sia.  Sang ika-18 nga tuig sang paggahom ni Hari Josias, ginpakadto sang hari sa balay ni Jehova si Safan nga sekretaryo, nga anak ni Azalias nga anak ni Mesulam.+ Nagsiling sia kay Safan:  “Magkadto ka kay Hilkias+ nga mataas nga saserdote, kag ipakuha sa iya ang tanan nga kuarta nga ginadala sang katawhan sa balay ni Jehova+ nga ginakolekta sang mga manugbantay sang puertahan.+  Ihatag nila ini sa mga nagadumala sa pagpakay-o sang balay ni Jehova, agod ihatag man nila ini sa mga nagakay-o sang guba nga mga bahin sang balay ni Jehova,+  nga amo ang sampaton nga mga trabahador, ang mga manunukod, kag ang mga mason; kag gamiton nila ang kuarta sa pagbakal sing mga kahoy kag sing mga bato nga nabasbasan na nga kinahanglan sa pagkay-o sang balay.+  Apang indi na dapat nga usisaon sila sa kuarta nga ginahatag sa ila, bangod masaligan sila.”+  Sang ulihi, si Hilkias nga mataas nga saserdote nagsiling kay Safan nga sekretaryo:+ “Nakita ko sa balay ni Jehova ang libro sang Kasuguan.”+ Ginhatag ni Hilkias kay Safan ang libro, kag ginbasa niya ini.+  Dayon nagkadto sa hari si Safan nga sekretaryo kag nagsiling sia: “Ginkuha na sang imo mga alagad ang kuarta sa balay, kag ginhatag nila ini sa mga nagadumala sang ulubrahon sa balay ni Jehova.”+ 10  Ginsugiran man ni Safan nga sekretaryo ang hari: “May libro+ nga ginhatag sa akon si Hilkias nga saserdote.” Dayon ginbasa ini ni Safan sa hari. 11  Pagkabati sang hari sa mga pulong sang libro sang Kasuguan, gingisi niya ang iya bayo.+ 12  Dayon ginsugo sang hari si Hilkias nga saserdote, si Ahikam+ nga anak ni Safan, si Acbor nga anak ni Micaya, si Safan nga sekretaryo, kag si Asaias nga alagad sang hari: 13  “Magpamangkot kamo kay Jehova para sa akon, para sa katawhan, kag para sa bug-os nga Juda tuhoy sa mga pulong sini nga libro nga nakit-an; kay daku gid ang kaakig ni Jehova sa aton,+ bangod wala gintuman sang aton mga katigulangan ang mga pulong sini nga libro. Wala nila gintuman ang tanan nga nasulat sa sini tuhoy sa aton.” 14  Gani si Hilkias nga saserdote, si Ahikam, si Acbor, si Safan, kag si Asaias nagkadto kay Hulda nga manalagna nga babayi.+ Asawa sia ni Sallum nga manug-atipan sang mga bayo nga anak ni Tikva nga anak ni Harhas. Nagaistar sadto si Hulda sa Jerusalem sa Ikaduha nga Distrito; kag nagpakighambal sila sa iya didto.+ 15  Nagsiling si Hulda sa ila: “Amo ini ang ginsiling ni Jehova nga Dios sang Israel, ‘Silinga ninyo ang tawo nga nagpakadto sa inyo sa akon: 16  “Amo ini ang ginsiling ni Jehova, ‘Laglagon ko ini nga lugar kag ang mga pumuluyo sini, suno sa tanan nga pulong sang libro nga ginbasa sang hari sang Juda.+ 17  Bangod gintalikdan nila ako kag nagpaaso sila sing halad sa iban nga mga dios+ nga nagpaakig sa akon bangod sang tanan nga ginhimo nila,+ magadabdab ang akon kaakig batok sa sini nga lugar kag indi ini mag-ugdaw.’ ”+ 18  Apang tuhoy sa hari sang Juda nga nagsugo sa inyo nga mamangkot kay Jehova, amo ini ang isiling ninyo sa iya, “Amo ini ang ginsiling ni Jehova nga Dios sang Israel: ‘Tuhoy sa mga pulong nga nabatian mo, 19  bangod nangin mabinatunon* ang imo tagipusuon kag nagpaubos ka+ sa atubangan ni Jehova sang mabatian mo ang ginsiling ko batok sa sini nga lugar kag sa mga pumuluyo sini nga ini pakamalauton kag mangin kabangdanan sang kahadlok, kag gingisi mo ang imo bayo+ kag naghibi ka sa atubangan ko, ginpamatian ko man ikaw, siling ni Jehova. 20  Gani mapatay ka pareho sang imo mga katigulangan, kag ilubong ka sa imo lulubngan sa tion nga may kalinong, kag indi mo makita ang kalaglagan nga himuon ko sa sini nga lugar.’ ” ’ ” Dayon ginsugid nila sa hari ini nga mensahe.

Footnote

Sa literal, “mahumok.”