Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Hari 21:1-26

BALAYAN SANG KAUNDAN

  • Si Manases, hari sang Juda; pagpaagay niya sing dugo (1-18)

    • Ang Jerusalem laglagon (12-15)

  • Si Amon, hari sang Juda (19-26)

21  Nagaedad si Manases+ sing 12 ka tuig sang nangin hari sia, kag naggahom sia sa Jerusalem sing 55 ka tuig.+ Ang iya iloy amo si Hefziba.  Ginhimo niya ang malain sa panulok ni Jehova, pareho sang makangilil-ad nga mga buhat sang mga pungsod+ nga gintabog ni Jehova sa atubangan sang katawhan sang Israel.+  Ginpatindog niya liwat ang sagrado nga mataas nga mga duog nga ginguba sang iya amay nga si Ezequias,+ kag naghimo sia sing mga halaran para kay Baal kag sing sagrado nga poste,*+ pareho sang ginhimo ni Ahab nga hari sang Israel.+ Kag nagyaub sia sa tanan nga butang sa langit kag nag-alagad sa sini.+  Naghimo man sia sing mga halaran sa balay ni Jehova,+ nga tuhoy sini nagsiling si Jehova: “Ibutang ko ang akon ngalan sa Jerusalem.”+  Naghimo sia sing mga halaran sa duha ka luwang sang balay ni Jehova+ para sa tanan nga butang sa langit.+  Ginsunog* niya bilang halad ang iya anak; nagahimo sia sing madyik, nagadangop sia sa mga nagapamakot paagi sa panimad-on,+ kag nagtangdo sia sing mga espiritista kag mga manugpakot sing mga hitabo.+ Malain gid ang iya ginhimo sa panulok ni Jehova, nga nagpaakig sa Iya.  Ginbutang niya ang iya ginhimo nga tinigib nga imahen sang sagrado nga poste*+ sa balay nga tuhoy sa sini nagsiling si Jehova kay David kag kay Solomon nga iya anak: “Ibutang ko sing permanente ang akon ngalan sa sini nga balay kag sa Jerusalem nga ginpili ko sa tanan nga tribo sang Israel.+  Indi ko na pagpadalangdalangon ang Israel sa duta nga ginhatag ko sa ila mga katigulangan,+ kon tumanon nila ang tanan nga ginsugo ko sa ila,+ ang bug-os nga Kasuguan nga ginsugo sa ila sang akon alagad nga si Moises.”  Apang wala sila magtuman, kag ginpatalang sila ni Manases, gani ginhimo nila ang mas malain pa sangsa ginhimo sang mga pungsod nga ginlaglag ni Jehova sa atubangan sang mga Israelinhon.+ 10  Nagsiling si Jehova paagi sa iya mga alagad nga mga manalagna:+ 11  “Ginhimo ni Manases nga hari sang Juda ining tanan nga makangilil-ad nga butang. Mas malain pa ang iya ginhimo sangsa ginhimo sang tanan nga Amornon+ nga nauna sa iya,+ kag sia ang kabangdanan sang pagpakasala sang Juda paagi sa iya makangilil-ad nga mga diosdios.* 12  Gani nagsiling si Jehova nga Dios sang Israel: ‘Magapadala ako sing kahalitan sa Jerusalem+ kag sa Juda nga ang bisan sin-o nga makabati sini mahadlukan gid.*+ 13  Gamiton ko sa Jerusalem ang lubid nga inugtakus+ nga gingamit sa Samaria+ kag ang tunton nga gingamit sa panimalay ni Ahab,+ kag tinluan ko ang Jerusalem, pareho sang pagtrapo sa yahong nga gintinluan kag ginpakulob.+ 14  Sikwayon ko ang nabilin sa akon palanublion+ kag itugyan sila sa ila mga kaaway, kag bihagon sila kag kawaton sang ila mga kaaway ang ila mga pagkabutang,+ 15  bangod ginhimo nila ang malain sa akon panulok kag ginpaakig nila ako sugod sang adlaw nga naggua ang ila mga katigulangan sa Egipto tubtob sini nga adlaw.’ ”+ 16  Ginpaagay man ni Manases ang tuman kadamo nga dugo sang mga tawo nga wala sing sala tubtob napuno ang bug-os nga Jerusalem,+ wala labot sa iya sala nga ginbangdan sang pagpakasala sang Juda paagi sa paghimo sing malain sa panulok ni Jehova. 17  Tuhoy sa iban pa nga natabo sa kabuhi ni Manases kag ang tanan niya nga ginhimo kag ang iya pagpakasala, indi bala nga nasulat ini sa libro sang kasaysayan sang mga hari sang Juda? 18  Sang ulihi, napatay si Manases kag ginlubong sia sa hardin sang iya balay, sa hardin sang Uza.+ Si Amon nga iya anak amo ang nagbulos sa iya bilang hari. 19  Nagaedad si Amon+ sing 22 ka tuig sang nangin hari sia, kag naggahom sia sa Jerusalem sing duha ka tuig.+ Ang iya iloy amo si Mesulemet nga anak ni Haruz nga taga-Jotba. 20  Ginhimo niya ang malain sa panulok ni Jehova, pareho sang ginhimo sang iya amay nga si Manases.+ 21  Ginsunod niya ang bug-os nga dalanon sang iya amay, kag nag-alagad sia kag nagyaub sa makangilil-ad nga mga diosdios nga gin-alagad sang iya amay.+ 22  Gintalikdan niya si Jehova nga Dios sang iya mga katigulangan, kag wala sia maglakat sa dalanon ni Jehova.+ 23  Sang ulihi, naghimbon ang mga alagad ni Amon batok sa iya kag ginpatay nila ang hari sa iya mismo balay. 24  Apang ginpatay sang katawhan sini nga duta ang tanan nga naghimbon batok kay Hari Amon, kag ginbulos nila bilang hari si Josias nga iya anak.+ 25  Tuhoy sa iban pa nga natabo sa kabuhi ni Amon, ang iya ginhimo, indi bala nga nasulat ini sa libro sang kasaysayan sang mga hari sang Juda? 26  Ginlubong nila sia sa iya lulubngan sa hardin sang Uza.+ Si Josias+ nga iya anak amo ang nagbulos sa iya bilang hari.

Footnote

Tan-awa ang Glossary.
Sa literal, “Ginpaagi sa kalayo.”
Tan-awa ang Glossary.
Ang Hebreo nga termino mahimo nga may kaangtanan sa tinaga para sa “ipot” kag ginagamit sa pagtamay.
Sa literal, “ang iya mga dulunggan matingilan.”