Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Hari 2:1-25

BALAYAN SANG KAUNDAN

  • Si Elias gindala sang buhawi (1-18)

    • Ginkuha ni Eliseo ang kunop ni Elias (13, 14)

  • Si Eliseo nagtinlo sa tubig sang Jerico (19-22)

  • Oso nagpatay mga bata sa Betel (23-25)

2  Sang tion nga dalhon na ni Jehova si Elias+ sa kalangitan paagi sa buhawi,+ naglakat si Elias kag si Eliseo+ halin sa Gilgal.+  Nagsiling si Elias kay Eliseo: “Palihug, magpabilin ka diri, bangod ginapakadto ako ni Jehova sa Betel.” Apang nagsabat si Eliseo: “Ginapanumpa ko sa buhi nga Dios nga si Jehova kag sa imo atubangan, indi ako magbulag sa imo.” Gani nagkadto sila sa Betel.+  Ang mga anak sang mga manalagna* sa Betel nagkadto kay Eliseo kag nagsiling sila sa iya: “Nahibaluan mo bala nga kuhaon na ni Jehova subong nga adlaw ang imo agalon kag indi na sia manguna sa imo?”+ Nagsabat sia: “Nahibaluan ko ina. Maghipos lang kamo.”  Nagsiling si Elias sa iya: “Eliseo, palihug magpabilin ka diri, bangod ginapakadto ako ni Jehova sa Jerico.”+ Apang nagsabat sia: “Ginapanumpa ko sa buhi nga Dios nga si Jehova kag sa imo atubangan, indi ako magbulag sa imo.” Gani nagkadto sila sa Jerico.  Ang mga anak sang mga manalagna sa Jerico nagkadto kay Eliseo kag nagsiling sila sa iya: “Nahibaluan mo bala nga kuhaon na ni Jehova subong nga adlaw ang imo agalon kag indi na sia manguna sa imo?” Nagsabat sia: “Nahibaluan ko ina. Maghipos lang kamo.”  Nagsiling si Elias sa iya: “Palihug, magpabilin ka diri, bangod ginapakadto ako ni Jehova sa Jordan.” Apang nagsabat sia: “Ginapanumpa ko sa buhi nga Dios nga si Jehova kag sa imo atubangan, indi ako magbulag sa imo.” Gani naglakat sila.  Nagsunod sa ila ang 50 sa anak sang mga manalagna kag nagtindog sila sa unhan, samtang nagatindog sila nga duha sa pangpang sang Jordan.  Dayon gin-uba ni Elias ang iya kunop.*+ Ginlukot niya ini kag ginhampak sa tubig kag natunga ang tubig. Gani nagtabok sila nga duha sa mamala nga duta.+  Sang nakatabok na sila, nagsiling si Elias kay Eliseo: “Ano ang luyag mo nga himuon ko para sa imo antes ako kuhaon sa imo?” Nagsabat si Eliseo: “Palihug, mahatagan mo bala ako sing doble nga parte*+ sang imo gahom?”*+ 10  Nagsiling sia: “Mabudlay ang ginapangabay mo. Kon makita mo ako sa tion nga kuhaon na ako, mabaton mo ini; apang kon indi, indi mo ini mabaton.” 11  Samtang nagalakat sila nga nagahambalanay, hinali nga ginbulag sila nga duha sang daw kalayo nga kangga kag mga kabayo,+ kag gindala sang buhawi si Elias sa kalangitan.+ 12  Samtang nagatan-aw si Eliseo, nagsinggit sia: “Amay ko, amay ko! Ang kangga sang Israel kag ang iya mga manugkabayo!”+ Sang indi na niya makita si Elias, gingisi niya ang iya kunop sa duha ka bahin.+ 13  Dayon ginpulot niya ang kunop*+ ni Elias nga nahulog, kag nagbalik sia kag nagtindog sa pangpang sang Jordan. 14  Dayon ginhampak niya sa tubig ang kunop* ni Elias kag nagsiling sia: “Diin si Jehova nga Dios ni Elias?” Sang ginhampak niya ang tubig, natunga ini, gani nagtabok si Eliseo.+ 15  Sang makita sia sa unhan sang mga anak sang mga manalagna sa Jerico, nagsiling sila: “Ang espiritu ni Elias yara na kay Eliseo.”+ Gani ginsugata nila sia kag nagluhod sila kag nagduko. 16  Nagsiling sila sa iya: “Ang imo mga alagad may kaupod nga 50 ka sangkol nga lalaki. Palihug, palakta sila agod pangitaon nila ang imo agalon. Basi ginhakwat sia sang espiritu* ni Jehova kag gindala sa isa sa mga bukid ukon sa isa sa mga nalupyakan.”+ Apang nagsiling sia: “Indi sila pagpalakta.” 17  Apang namilit sila tubtob nga nahuya na lang sia, gani nagsiling sia: “Palakta sila.” Kag ginpalakat nila ang 50 ka lalaki. Nagpangita sila sa sulod sang tatlo ka adlaw, apang wala nila sia makita. 18  Sang nagbalik sila kay Eliseo, didto sia nagatener sa Jerico.+ Dayon nagsiling sia sa ila: “Indi bala nga nagsiling ako sa inyo nga indi kamo maglakat?” 19  Sang ulihi, ang mga lalaki sang siudad nagsiling kay Eliseo: “Makita sang amon agalon nga maayo ang nahamtangan sang siudad;+ apang ang tubig indi maayo, kag kigas* ang duta.” 20  Nagsiling sia: “Dalhi ninyo ako sing gamay kag bag-o nga yahong kag butangi ini sing asin.” Gani gindalhan nila sia sini. 21  Dayon nagkadto sia sa tuburan sang tubig kag ginhabuyan niya ini sing asin+ kag nagsiling sia: “Amo ini ang ginsiling ni Jehova, ‘Matinlo na ini nga tubig. Indi na ini pagtunaan sang kamatayon ukon sang pagkabaw-as.’ ”* 22  Nagpabilin nga matinlo ang tubig tubtob sini nga adlaw, suno sa ginsiling ni Eliseo. 23  Halin didto, nagkadto sia sa Betel. Samtang nagalakat sia, may mga bata nga lalaki halin sa siudad nga nagyamuhat sa iya:+ “Palayo ka diri, kalbo! Palayo ka diri, kalbo!” 24  Sang ulihi, nagbalikid sia sa mga bata kag ginpakamalaut niya sila sa ngalan ni Jehova. Dayon may duha ka oso+ nga babayi nga naggua sa kagulangan kag gingus-ab ang 42 ka bata.+ 25  Halin didto, nagkadto sia sa Bukid Carmel,+ kag nagbalik sia sa Samaria.

Footnote

Ang “mga anak sang mga manalagna” mahimo nagapatuhoy sa eskwelahan para sa mga manalagna ukon sa asosasyon sang mga manalagna.
Ukon “kunop sang manalagna.”
Ukon “duha ka bahin.”
Ukon “espiritu.”
Ukon “kunop sang manalagna.”
Ukon “kunop sang manalagna.”
Ukon “hangin.”
Ukon mahimo, “ginabangdan sang pagkahulog sang ginabusong.”
Ukon mahimo, “pagkahulog sang ginabusong.”