Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Hari 15:1-38

BALAYAN SANG KAUNDAN

  • Si Azarias, hari sang Juda (1-7)

  • Katapusan nga mga hari sang Israel: si Zacarias (8-12), si Sallum (13-16), si Menahem (17-22), si Pekaya (23-26), si Peka (27-31)

  • Si Jotam, hari sang Juda (32-38)

15  Sang ika-27 nga tuig sang paggahom ni Hari Jeroboam* sang Israel, nangin hari si Azarias*+ nga anak ni Hari Amazias+ sang Juda.+  Nagaedad sia sing 16 ka tuig sang nangin hari sia, kag naggahom sia sa Jerusalem sing 52 ka tuig. Ang iya iloy amo si Jecolias nga taga-Jerusalem.  Ginhimo niya ang matarong sa panulok ni Jehova, pareho sang ginhimo sang iya amay nga si Amazias.+  Apang wala ginkuha ang sagrado nga mataas nga mga duog,+ kag ang katawhan nagahalad kag nagapaaso gihapon sing mga halad sa mataas nga mga duog.+  Ginpabudlayan ni Jehova ang hari kag nangin aruon sia+ tubtob napatay sia. Nag-istar sia sa lain nga balay,+ samtang si Jotam+ nga anak sang hari amo ang nagadumala sa balay* kag nagahukom sa katawhan.+  Tuhoy sa iban pa nga natabo sa kabuhi ni Azarias,+ ang tanan niya nga ginhimo, indi bala nga nasulat ini sa libro sang kasaysayan sang mga hari sang Juda?  Sang ulihi, napatay si Azarias pareho sang iya mga katigulangan,+ kag ginlubong nila sia upod sa iya mga katigulangan sa Siudad ni David. Si Jotam nga iya anak amo ang nagbulos sa iya bilang hari.  Sang ika-38 nga tuig sang paggahom ni Hari Azarias+ sang Juda, si Zacarias+ nga anak ni Jeroboam nangin hari sa Israel, kag naggahom sia sa Samaria sing anom ka bulan.  Ginhimo niya ang malain sa panulok ni Jehova, pareho sang ginhimo sang iya mga katigulangan. Ginhimo man niya ang mga sala ni Jeroboam nga anak ni Nebat, nga ginbangdan sang pagpakasala sang Israel.+ 10  Dayon si Sallum nga anak ni Jabes naghimbon batok kay Zacarias kag ginpatay niya sia+ sa Ibleam.+ Dayon sia ang nagbulos sa iya bilang hari. 11  Tuhoy sa iban pa nga natabo sa kabuhi ni Zacarias, nasulat ini sa libro sang kasaysayan sang mga hari sang Israel. 12  Natuman ang ginsiling sadto ni Jehova kay Jehu: “Ang imo mga anak tubtob sa ikap-at nga kaliwatan+ magapungko sa trono sang Israel.”+ Kag amo gid sini ang natabo. 13  Naghari si Sallum nga anak ni Jabes sang ika-39 nga tuig sang paggahom ni Hari Uzias+ sang Juda kag naggahom sia sa Samaria sing isa lang ka bulan. 14  Dayon halin sa Tirza,+ ginsalakay ni Menahem nga anak ni Gadi ang Samaria. Ginpatay niya si Sallum+ nga anak ni Jabes sa Samaria, kag sia ang nagbulos sa iya bilang hari. 15  Tuhoy sa iban pa nga natabo sa kabuhi ni Sallum kag ang iya paghimbon, nasulat ini sa libro sang kasaysayan sang mga hari sang Israel. 16  Sadto nga tion, halin sa Tirza ginsalakay ni Menahem ang Tifsa kag ginlaglag ang tanan nga yara sa sini kag sa mga teritoryo sini, bangod wala nila ginbuksan ang gawang sang siudad para sa iya. Ginpamatay niya ang tanan nga pumuluyo sini kag ginririan niya ang tiyan sang tanan nga nagabusong nga babayi. 17  Sang ika-39 nga tuig sang paggahom ni Hari Azarias sa Juda, si Menahem nga anak ni Gadi nangin hari sa Israel, kag naggahom sia sa Samaria sing napulo ka tuig. 18  Ginhimo niya ang malain sa panulok ni Jehova. Ginhimo man niya sa bug-os niya nga kabuhi ang mga sala ni Jeroboam nga anak ni Nebat, nga ginbangdan sang pagpakasala sang Israel.+ 19  Ginsalakay ni Hari Pul+ sang Asiria ang duta sang Israel, kag ginhatagan ni Menahem si Pul sing 1,000 ka talanton* nga pilak agod buligan sia nga magbakod pa gid ang iya paggahom sa ginharian.+ 20  Nagkuha si Menahem sing pilak halin sa Israel kag ginkuha niya ini halin sa prominente kag manggaranon nga mga tawo.+ Nagkuha sia sa kada tawo sing 50 ka siklo* nga pilak kag ginhatag niya ini sa hari sang Asiria. Gani nag-untat sa pagsalakay ang hari sang Asiria kag wala na sia magpabilin sa kadutaan. 21  Tuhoy sa iban pa nga natabo sa kabuhi ni Menahem,+ ang tanan niya nga ginhimo, indi bala nga nasulat ini sa libro sang kasaysayan sang mga hari sang Israel? 22  Sang ulihi, napatay si Menahem kag ginlubong sia upod sa iya mga katigulangan. Si Pekaya nga iya anak amo ang nagbulos sa iya bilang hari. 23  Sang ika-50 nga tuig sang paggahom ni Hari Azarias sang Juda, si Pekaya nga anak ni Menahem nangin hari sa Israel, kag naggahom sia sa Samaria sing duha ka tuig. 24  Ginhimo niya ang malain sa panulok ni Jehova. Ginhimo man niya ang mga sala ni Jeroboam nga anak ni Nebat, nga ginbangdan sang pagpakasala sang Israel.+ 25  Dayon ang kabulig nga opisyal ni Pekaya nga si Peka+ nga anak ni Remalias naghimbon batok sa iya. Upod ang 50 ka lalaki nga taga-Gilead, ginpatay ni Peka si Pekaya pati si Argob kag si Arye sa mabakod nga torre sang balay* sang hari sa Samaria, kag sia ang nagbulos sa iya bilang hari. 26  Tuhoy sa iban pa nga natabo sa kabuhi ni Pekaya, ang tanan niya nga ginhimo, nasulat ini sa libro sang kasaysayan sang mga hari sang Israel. 27  Sang ika-52 nga tuig sang paggahom ni Hari Azarias sang Juda, si Peka+ nga anak ni Remalias nangin hari sa Israel, kag naggahom sia sa Samaria sing 20 ka tuig. 28  Ginhimo niya ang malain sa panulok ni Jehova kag ginhimo man niya ang mga sala ni Jeroboam nga anak ni Nebat, nga ginbangdan sang pagpakasala sang Israel.+ 29  Sang nagahari si Hari Peka sang Israel, nagsalakay si Hari Tiglat-pileser+ sang Asiria kag naagaw niya ang Ijon, ang Abel-bet-maaca,+ ang Janoa, ang Kedes,+ ang Hazor, ang Gilead,+ kag ang Galilea, ang bug-os nga duta sang Neptali,+ kag ginbihag niya ang mga pumuluyo sini kag gintapok sa Asiria.+ 30  Sang ulihi, si Hosea+ nga anak ni Elah naghimbon batok kay Peka nga anak ni Remalias. Ginpatay niya si Peka, kag sia ang nagbulos sa iya bilang hari sang ika-20 nga tuig sang paghari ni Jotam+ nga anak ni Uzias. 31  Tuhoy sa iban pa nga natabo sa kabuhi ni Peka, ang tanan niya nga ginhimo, nasulat ini sa libro sang kasaysayan sang mga hari sang Israel. 32  Sang ikaduha nga tuig sang paghari ni Peka nga anak ni Remalias nga hari sang Israel, nangin hari si Jotam+ nga anak ni Hari Uzias+ sang Juda. 33  Nagaedad sia sing 25 ka tuig sang nangin hari sia, kag naggahom sia sa Jerusalem sing 16 ka tuig. Ang iya iloy amo si Jerusa nga anak ni Zadok.+ 34  Ginhimo niya ang matarong sa panulok ni Jehova, pareho sa ginhimo sang iya amay nga si Uzias.+ 35  Apang wala ginkuha ang sagrado nga mataas nga mga duog, kag ang katawhan nagahalad kag nagapaaso gihapon sing mga halad sa mataas nga mga duog.+ Sia ang nagpatindog sing naibabaw nga gawang sang balay ni Jehova.+ 36  Tuhoy sa iban pa nga natabo sa kabuhi ni Jotam, ang iya mga ginhimo, indi bala nga nasulat ini sa libro sang kasaysayan sang mga hari sang Juda? 37  Sadto nga tion, ginpadala ni Jehova batok sa Juda si Rezin nga hari sang Siria kag si Peka+ nga anak ni Remalias.+ 38  Sang ulihi, napatay si Jotam pareho sang iya mga katigulangan kag ginlubong sia upod sa iya mga katigulangan sa Siudad ni David nga iya katigulangan. Si Ahaz nga iya anak amo ang nagbulos sa iya bilang hari.

Footnote

Si Jeroboam II.
Buot silingon, “Nagbulig si Jehova.” Ginatawag sia nga Uzias sa 2Ha 15:13; 2Cr 26:1-23; Isa 6:1; kag Zac 14:5.
Ukon “palasyo.”
Ang isa ka talanton katumbas sang 34.2 ka kilo. Tan-awa ang Apendise B14.
Ang isa ka siklo katumbas sang 11.4 ka gramo. Tan-awa ang Apendise B14.
Ukon “palasyo.”